ហួសហេតុ ! អាងជានគរបាលបើកឡានបុកគេហើយ ដេញវាយគេទៀត
រាជធានីភ្នំពេញ ៖ មន្ត្រីនគរបាលមួយរូបស្រវឹងស្រាជោកបានបើករថយន្តម៉ាកឡិចស៊ីស RX300 បុកម៉ូតូ១គ្រឿងហើយថែមទាំងចុះដេញវាយអ្នកជិះម៉ូតូរត់ចោលម៉ូតូទៀត …
រាជធានីភ្នំពេញ ៖ មន្ត្រីនគរបាលមួយរូបស្រវឹងស្រាជោកបានបើករថយន្តម៉ាកឡិចស៊ីស RX300 បុកម៉ូតូ១គ្រឿងហើយថែមទាំងចុះដេញវាយអ្នកជិះម៉ូតូរត់ចោលម៉ូតូទៀត ពេលសមត្ថកិច្ចចុះទៅដល់សួរនាំ និងថតរូបភាព ស្រាប់តែត្រូវជនបង្កនោះយកទូរស័ព្ទអាយហ្វូន១គ្រឿង និងវិទ្យុទាក់ទង១គ្រឿងបោកចោលទៀត បង្កឲ្យមានការភ្ញាក់ផ្អើលកាលពីវេលាម៉ោង៦ និង៥០នាទីយប់ ថ្ងៃទី២៨ ខែមករា ឆ្នាំ២០១៧នៅតាមបណ្ដោយផ្លូវលេខ៣៦៩ កែងផ្លូវបេតុង ស្ថិតក្នុងភូមិព្រះពន្លា សង្កាត់ព្រែកប្រា ខណ្ឌច្បារអំពៅ ។
បើតាមសំដីជនរងគ្រោះឈ្មោះ ខាំ ថានិត ភេទប្រុស អាយុ២២ឆ្នាំ ជាសិស្សវិទ្យាល័យនៅស្វាយរៀង ស្នាក់នៅភូមិភ្នំស្រូវ ឃុំរាជ្យមុន្នី ស្រុកកំពង់រោទិ៍ ខេត្តស្វាយរៀង បានប្រាប់អ្នកយកព័ត៌មានឲ្យដឹងថា មុនពេលកើតហេតុគាត់រស់នៅខេត្តស្វាយរៀងទេ នៅថ្ងៃចូលឆ្នាំប្រពៃណីចិនគាត់បានមកលេងបងប្អូននៅសង្កាត់ព្រែកប្រា ខណ្ឌច្បារអំពៅ ហើយខ្ចីម៉ូតូបងជីដូនមួយម៉ាកហុងដាឌ្រីម ពណ៌ខ្មៅ ស៊េរីឆ្នាំ២០១៤ ពាក់ស្លាកលេខ ភ្នំពេញ 1CH-4375 ជិះទៅផ្សារ ពេលមកដល់ផ្លូវលេខ៣៦៩កែងផ្លូវបេតុង ស្រាប់តែរថយន្តឡិចស៊ីស RX300 ពណ៌ស្ករ អត់ស្លាកលេខ បើកបរដោយមន្ត្រីនគរបាលម្នាក់បានបត់ឆ្វេងមកបុកម៉ូតូគាត់ពេញទំហឹង ភ្លាមៗនោះមន្ត្រីនគរបាលដែលជាអ្នកបើករថយន្តបានចុះពីលើរថយន្តដោយដៃមានកាន់បំពង់ទីបហើយដេញវាយគាត់ ធ្វើឲ្យគាត់ភ័យពេកបានរត់ចោលម៉ូតូ ហើយជិះម៉ូតូឌុបទៅប្រាប់បងប្អូនជីដូនមួយឲ្យមកដោះស្រាយ ។
ជនរងគ្រោះបន្តទៀតថា ក្រោយពីរត់ចេញពីកន្លែងកើតហេតុ ក៏ហៅបងប្អូនមកដោះស្រាយ ដោយមាននគរបាលផ្នែកវាស់វែងខណ្ឌច្បារអំពៅបានធ្វើការវាស់វែង និងឃាត់បុរសជាអ្នកបើក និងរថយន្តបង្កហេតុ ព្រមទាំងម៉ូតូយកទៅខណ្ឌច្បារអំពៅ ។
ប្រភពពីនគរបាលប៉ុស្តិ៍ព្រែកប្រា បានឲ្យដឹងថា បន្ទាប់ពីមានប្រជាពលរដ្ឋទូរស័ព្ទប្រាប់ថា មានគ្រោះថ្នាក់ចរាចរណ៍ សមត្ថកិច្ចក៏ចុះទៅដល់ភ្លាម ឃើញមានម៉ូតូម៉ាកហុងដាឌ្រីម និងរថយន្តឡិចស៊ីស RX៣០០ អ្នកបើកបរជាមន្ត្រីនគរបាល ។ ពេលដែលសមត្ថកិច្ចទៅសួរនាំ និងថតរូបភាពទុកជាឯកសារ ក៏ត្រូវមន្ត្រីនគរបាលដែលជាអ្នកបើករថយន្តដណ្ដើមយកទូរស័ព្ទរបស់លោកនាយរងប៉ុស្តិ៍ព្រែកប្រាគប់ចោល ភ្លាមនោះសមត្ថកិច្ចបានទាញវិទ្យុទាក់ទងហៅផ្នែកព្រហ្មទណ្ឌប៉ុស្តិ៍ និងកងអន្តរាគមន៍ពីអធិការដ្ឋាននគរបាលខណ្ឌឲ្យជួយអន្តរាគមន៍ ក៏ត្រូវអ្នកបើករថយន្តបង្កដែលស្រវឹងនោះឆក់យកវិទ្យុទាក់ទងពីសមត្ថកិច្ចបោកចោលទៀត ធ្វើឲ្យសមត្ថកិច្ចទ្រាំមិនបានចាប់វាយខ្នោះយកទៅប៉ុស្តិ៍ ហើយប្រគល់ឲ្យផ្នែកចរាចរណ៍ខណ្ឌវាស់វែង និងវាស់ជាតិអាកុល និងដាក់ពាក្យបណ្ដឹងពីបទបំផ្លាញទ្រព្យសម្បត្តិរបស់សមត្ថកិច្ចដោយចេតនាពេលចុះអន្តរាគមន៍រឿងគ្រោះថ្នាក់ចរាចរណ៍ ។
ចំណែកបុរសអ្នកបើករថយន្តដែលជាមន្ត្រីនគរបាល នៅពេលអ្នកយកព័ត៌មានសួរនាំ មិននិយាយអ្វីទាំងអស់ គ្រាន់តែប្រាប់ថា អ្នកកាសែតដឹងថាថ្ងៃនេះជាថ្ងៃអីទៅបានហើយ អ្នកណាក៏ផឹកស្រាដែរ សូម្បីតែអ្នកកាសែតក៏ផឹកដែរ ។
ក្រោយពេលកើតហេតុ ជនរងគ្រោះ និងសមត្ថកិច្ចដែលរងគ្រោះសុទ្ធតែដាក់ពាក្យប្តឹងជនបង្កដើម្បីទាមទារសំណង និងសុំឲ្យសមត្ថកិច្ចវាស់ជាតិអាល់កុល ៕
ចែករំលែកព័តមាននេះ