រាជធានីភ្នំពេញ ៖ សេចក្តីរាយការណ៍ឱ្យដឹងថា មានការភ្ញាក់ផ្អើលមួយ ដោយសារនារីម្នាក់ឌុបបុរសជាគូស្នេហ៍តាមម៉ូតូមកកាន់ប៉ុស្តិ៍ប៉ូលិស និងប្រាប់ថា បានបោកប្រាស់នាងអស់ទាំងខ្លួនប្រាណនិងទ្រព្យជាច្រើន រួមទាំងម៉ូតូម៉ាកស្គូពីមួយគ្រឿងផងដែរ ព្រោះតែបុរសនេះសន្យាខ្យល់ ថានឹងរៀបការជាមួយនាង តែអ្វីៗសុទ្ធតែការបោកប្រាស់ទាំងអស់ ។
ហេតុការណ៍នេះ កើតឡើងកាលពីថ្ងៃទី២៧ មករា ស្ថិតក្នុងប៉ុស្តិ៍ចោមចៅ សង្កាត់ចោមចៅ ខណ្ឌពោធិ៍សែនជ័យ ។ លុះនៅព្រឹកថ្ងៃទី២៨ នេះ ស្រាប់តែបានលេចមុខប្រពន្ធដើមបីកូនខ្ចី និងស្ត្រីជាម្តាយក្មេកមកកាន់ប៉ុស្តិ៍ប៉ូលិសដែរ ។
នារីខាងលើមានអាយុ២៩ឆ្នាំ ជាកម្មការិនីរោងចក្រ មានទីលំនៅខេត្តកំពង់ស្ពឺ ។ រីឯបុរសជាប់ចោទឈ្មោះអ៊ឹម សុខជា អាយុ២៦ឆ្នាំ (ពិការដៃម្ខាង) ធ្វើការខាងសំណង់ មានទីលំនៅក្នុងភូមិតាម៉ឺន ឃុំទួលអំពិល ស្រុកបរសេដ្ឋ ខេត្តកំពង់ មានប្រពន្ធកូនខ្ចីទើបបាន១ខែ ឈ្មោះចាន់ អាង ។
បើតាមប្រភពពីនារីរងគ្រោះនិយាយថា នាងត្រូវជននេះបោកអស់រលីងពីខ្លួន ដោយយកទ្រព្យសម្បត្តិសរុបអស់ជាង១ពាន់ដុល្លារទៅហើយ និងម៉ូតូស្គូពីមួយគ្រឿងទៀត ។ ជននេះអួតថា ខ្លួនគេជាអាណិកជនអាមេរិក ដោយសន្យារៀបការជាមួយនាង តែសន្យាម្តងថ្ងៃនេះម្តងនោះ លុះនៅថ្ងៃទី២៧ មករា គឺជាថ្ងៃសន្យាដើម្បីចូលរោងការ តែគ្មានអ្វីកើតឡើងនោះឡើយ ។
ជននេះបានប្រាប់ថា ម្តាយគេនៅអាមេរិកនោះបានស្លាប់ ត្រូវតែពន្យារពេលរៀបការសិន ។ នាងមិនជឿនូវអ្វីដែលគេនិយាយនោះទេ ហើយជននេះនិយាយទៀតថា សាកសពម្តាយនៅអាមេរិកនោះ នឹងដឹកមកកាន់ប្រទេសខ្មែរ ដាក់នៅវត្តវិហារសួគ៌ ដោយចង់នាំនាងទៅមើល ។ នាងក៏ព្រមទៅ តែត្រូវនាងដឹកជននេះមកកាន់ប៉ូលិសទៅវិញ ព្រោះដឹងថាជននេះបោកហើយ។
ពួកគេទាំង២នាក់នៅក្នុងប៉ុស្តិ៍ប៉ូលិស១យប់ ហើយឮខាងប្រុសនិយាយជាមួយនារីរងគ្រោះថា កុំធ្វើបាបគេអី គេនឹងសងអ្វីៗគ្រប់យ៉ាងនោះវិញ ហើយម៉ូតូស្គូពីដាក់បញ្ចាំនោះ គេនឹងរកលុយដើម្បីលោះមកវិញ ។
ទោះបីជាយ៉ាងណា ទាំង២នាក់កំពុងស្ថិតក្នុងប៉ូលិសនៅឡើយ ដោយមិនដឹងថា មានដំណោះស្រាយបែបណាទេ ។
ចែករំលែកព័តមាននេះ