ខេត្តប៉ៃលិន ៖ ប្រជាពលរដ្ឋរស់នៅក្នុងខេត្តប៉ៃលិន ជាច្រើន បាននាំគ្នាព្រួយបារម្ភយ៉ាងខ្លាំងចំពោះបញ្ហាកំដៅកាន់តែកើនឡើងនៅឆ្នាំ២០១៧នេះ ហើយទឹកអូរមួយចំនួនចាប់ផ្តើមរីងស្ងួតហួតហែងជាបណ្តើរៗ ខណៈព្រៃឈើជើងភ្នំខៀវ ត្រូវបានគេលួចកាប់ទន្ទ្រាន ដើម្បីយកដីដាំដំណាំ ដូចជាពោត សណ្តែក ដំឡូង មី ចេក ស្វាយ និងដំណាំផ្សេងៗជាច្រើនទៀត។ មូលហេតុទាំងនេះហើយ ទើបធ្វើឱ្យអាកាសធាតុកាន់តែក្តៅឡើងៗ ពីមួយថ្ងៃទៅមួយថ្ងៃ បណ្តាលឱ្យខ្សត់ទឹកភ្លៀង និងខ្វះខាតប្រើប្រាស់ថែមទៀតផង។
ប្រជាពលរដ្ឋជាច្រើននាក់ បានលើកឡើងថា ព្រៃតំបន់អភិរក្សភ្នំខៀវ គ្រប់កន្លែង ត្រូវបានគេលួចកាប់ទន្ទ្រានរាល់ថ្ងៃ ដោយយកដីដាំដំណាំសម្រាប់ប្រយោជន៍ផ្ទាល់ខ្លួន រហូតដល់ឆ្នាំ២០១៦ កន្លងទៅថ្មីៗធ្វើឱ្យអាកាសធាតុក្តៅខ្លាំង ក្លាយទៅជារីងស្ងួតទឹកអូរ ស្ទឹង បឹងបួរ ជាច្រើន នៅទូទាំងខេត្តប៉ៃលិន។ ប្រភពបន្តទៀតថា នៅឆ្នាំថ្មី២០១៧នេះ ប្រជាពលរដ្ឋនឹងកាន់តែខ្វះទឹកប្រើប្រាស់ ហើយមូលហេតុដែលនាំឱ្យមានកំដៅកាន់តែក្តៅឡើងបែបនេះ ដោយសារតែប្រជាពលរដ្ឋខ្លួនឯង នាំគ្នាបន្តកាប់ព្រៃអភិរក្សភ្នំខៀវ ដើម្បីយកដីធ្វើកសិកម្ម លុះអត់មានដើមឈើទាក់ទាញទឹកភ្លៀង ទើបធ្វើឱ្យអាកាសធាតុប្រែប្រួល មានភ្លៀងតិចតួចបំផុត។
ចំណែកដំណាំដាំដុះវិញ ដោយសារតែអត់សូវមានភ្លៀងគ្រប់គ្រាន់ ពេលពួកគាត់ដាំ ដុះរួចហើយ ក៏ក្លាយទៅជាងាប់អស់រលីង ដោយដាំជាច្រើនលើកច្រើនសារ ហើយកសិផល ក៏ពុំសូវទទួលបានទិន្នផលខ្ពស់ដែរ ដោយពីមួយឆ្នាំទៅមួយឆ្នាំកាន់តែថយចុះគួរឱ្យកត់សម្គាល់ផងដែរ។ លើសពីនេះខាងមន្ទីរបរិស្ថាន ក៏ដូចជាអាជ្ញាធរភូមិឃុំស្រុកខេត្តហាក់ដូច ជាមិនអើពើយកចិត្តទុកដាក់ចំពោះបញ្ហាព្រៃឈើ ដែលត្រូវគេកាប់បំផ្លាញនេះឡើយ។ ពាក់ព័ន្ធទៅនឹងបញ្ហានេះ លោក កឹម សុខា ប្រធានមន្ទីរបរិស្ថានខេត្តប៉ៃលិន បានឱ្យដឹងថា ខាងលោកតែងតែចាត់ឱ្យមន្ត្រីក្រោមឱវាទចុះទៅត្រួតពិនិត្យជាញឹកញាប់ លុះពេលត្រលប់មកផ្ទះវិញ ខណៈស្ងាត់មនុស្ស ទើបជនល្មើសនាំគ្នាលួចកាប់បំផ្លាញ ហើយបើសិនជាមានការបំផ្លាញព្រៃឈើបែបនេះបន្តទៀត លោកនឹងចាត់ការតាមផ្លូវច្បាប់។
សូមបញ្ជាក់ថា ព្រៃឈើនៅជើងភ្នំខៀវ និងនៅកណ្តាលភ្នំខៀវ ត្រូវគេលួចកាប់រាល់ថ្ងៃជិតអស់រលីងទៅហើយ មើលទៅប្រហែលជា៥ទៅ១០ឆ្នាំខាងមុខទៀត នឹងលែងមាន ព្រៃឈើសល់សម្រាប់ទាក់ទាញអាកាសធាតុទៀតហើយ៕
ចែករំលែកព័តមាននេះ