រាជធានីភ្នំពេញ ៖ សហព័ន្ធកីឡាចំបាប់កម្ពុជា កាលពីថ្ងៃទី២៦ មករា កន្លងមកនេះ បានរៀបចំធ្វើមហាសន្និបាតប្រចាំឆ្នាំរបស់ខ្លួន ដើម្បីបោះឆ្នោតជ្រើសរើសសមាជិកគណៈកម្មការប្រតិបត្តិអាណត្តិថ្មីសម្រាប់ឆ្នាំ
រាជធានីភ្នំពេញ ៖ សហព័ន្ធកីឡាចំបាប់កម្ពុជា កាលពីថ្ងៃទី២៦ មករា កន្លងមកនេះ បានរៀបចំធ្វើមហាសន្និបាតប្រចាំឆ្នាំរបស់ខ្លួន ដើម្បីបោះឆ្នោតជ្រើសរើសសមាជិកគណៈកម្មការប្រតិបត្តិអាណត្តិថ្មីសម្រាប់ឆ្នាំ២០១៧-២០២០ ជាបន្តទៀត ។
យោងទៅលើការឯកភាពគ្នា និងមានការពេញចិត្តពីមន្ត្រីសហព័ន្ធផងនោះ មហាសន្និបាតបានសម្រេចប្រកាសតែងតាំងសមាជិកគណៈកម្មការប្រតិបត្តិអាណត្តិចាស់ឱ្យនៅដដែល ។ សមាជិកគណៈកម្មការប្រតិបត្តិអាណត្តិចាស់មានចំនួន៧រូប ក្នុងនោះមានលោក វ៉ាត់ ចំរើន ជាប្រធានសហព័ន្ធ លោក ខេ ស៊ីបានេត អនុប្រធានទី១ លោក ទី សុវណ្ណា អនុប្រធានទី២ លោក ធិន វិចិត្រ អគ្គលេខាធិការ កញ្ញា ចូវ សុធារ៉ា អគ្គហិរញ្ញឹក លោក ហុក ឈាងគីម សមាជិក និងលោក និង សាវុធ សមាជិក ។
លោក វ៉ាត់ ចំរើន អគ្គលេខាធិការគណៈកម្មាធិការជាតិអូឡាំពិកកម្ពុជា និងជាប្រធានសហព័ន្ធកីឡាចំបាប់កម្ពុជា បានមានប្រសាសន៍ថា ឆ្នាំ២០១៦ កន្លងមកនេះ គឺជាឆ្នាំធ្វើកំណែទម្រង់របស់សហព័ន្ធកីឡាជាតិ ។ ដោយឡែកនៅឆ្នាំ២០១៧នេះ សហព័ន្ធកីឡាជាតិទាំងអស់ ត្រូវតែកែសម្រួលនីតិវិធីតួនាទីមន្ត្រីសហព័ន្ធ ដើម្បីស្វែងរកគុណភាព សមត្ថភាពពិតប្រាកដ ជួយដល់សហព័ន្ធឱ្យមានដំណើរការបានល្អ ជាពិសេសក្នុងការគ្រប់គ្រងរៀបចំធ្វើផែនការការងារបច្ចេកទេសដោយខ្លួនឯង ។
លោកបានសង្កត់ធ្ងន់ថា ឆ្នាំ២០១៧នេះ ក្រសួងអប់រំ យុវជន និងកីឡា បានកំណត់ទិសដៅរួចហើយថា សហព័ន្ធកីឡាជាតិទាំងអស់ត្រូវតែរៀបចំខ្លួនពង្រឹងសមត្ថភាពបច្ចេកទេស ជាពិសេសបណ្ដុះបណ្ដាលកីឡាករថ្នាលសម្រាប់ត្រៀមប្រកួតនៅក្នុងឱកាសដែលកម្ពុជា ធ្វើជាម្ចាស់ផ្ទះកីឡាស៊ីហ្គេមលើកទី៣២ ឆ្នាំ២០២៣។
លោកបន្តថា ចំបាប់ត្រូវតែពង្រឹងសមត្ថភាពរបស់ខ្លួនឡើងវិញ ។ ពេលនេះយើងមានគ្រូបរទេសចំនួន២រូប គ្រូកូរ៉េសម្រាប់បង្ហាត់ដល់ក្រុមឈុតធំ និងគ្រូស្ម័គ្រចិត្តជនជាតិអាមេរិកាំងមួយរូបទៀតសម្រាប់បង្ហាត់ដល់កីឡាករថ្នាល។
នៅក្នុងអាណត្តិថ្មីនេះ ត្រូវតែបណ្ដុះបណ្ដាលអាជ្ញាកណ្ដាលកម្រិតអន្តរជាតិឱ្យបានយ៉ាងតិចក៏៣នាក់ដែរ ព្រោះថា នៅពេលកម្ពុជាធ្វើជាម្ចាស់ផ្ទះប្រកួតកីឡាស៊ីហ្គេម យើងត្រូវតែមានអាជ្ញាកណ្ដាលកម្រិតអន្តរជាតិ ។ លោកបានឱ្យដឹងទៀតថា ដើម្បីធ្វើឱ្យកីឡាខ្លាំងត្រូវកំណត់ទិសដៅខ្លួនឯងឱ្យបានច្បាស់ គឺ ទី១-ការអភិវឌ្ឍជំនាញ ទី២-បំផុសអ្នកចូលរួមឱ្យបានច្រើន និងទី៣-ត្រូវរៀបចំគ្រប់គ្រងប្រកបដោយប្រសិទ្ធភាព ។
លោកបានបញ្ជាក់ឱ្យដឹងទៀតថា រយៈពេល៤ឆ្នាំនេះ បើវិស័យកីឡាចំបាប់មិនខ្លាំងនៅក្នុងតំបន់អាស៊ានទេ នោះគឺពិបាកហើយ ។ ដូច្នេះក្នុងនាមសហព័ន្ធដែលមានសក្ដានុពលមួយដែរនោះ ត្រូវតែប្រឹងប្រែងបន្ថែមទៀតក្នុងការស្វែងរកយុទ្ធសាស្ត្រថ្មីៗ និងធ្វើកំណែទម្រង់ឱ្យបានស៊ីជម្រៅ ដើម្បីជំរុញឱ្យវិស័យកីឡាចំបាប់ទទួលបានជោគជ័យ ៕
ចែករំលែកព័តមាននេះ