រាជធានីភ្នំពេញ ៖ នៅព្រឹកថ្ងៃអាទិត្យ ទី២៩ មករា ខាមស្អែកនេះ ប្រដាល់អន្តរជាតិពេលព្រឹករបស់ស្ថានីយទូរទស្សន៍អាស៊ីអាគ្នេយ៍ នឹងបើករេញឱ្យកីឡាករជើងខ្លាំង២រូប គឺ ឡុង សុភី និង សូត្រ ប៊ុនធី ឡើងប៉ះថៃចំថ្ងៃ
រាជធានីភ្នំពេញ ៖ នៅព្រឹកថ្ងៃអាទិត្យ ទី២៩ មករា ខាមស្អែកនេះ ប្រដាល់អន្តរជាតិពេលព្រឹករបស់ស្ថានីយទូរទស្សន៍អាស៊ីអាគ្នេយ៍ នឹងបើករេញឱ្យកីឡាករជើងខ្លាំង២រូប គឺ ឡុង សុភី និង សូត្រ ប៊ុនធី ឡើងប៉ះថៃចំថ្ងៃចូលឆ្នាំចិនមិនទាន់ចប់នៅឡើយ ដើម្បីសាកកម្លាំង ។ អ្វីដែលគេកត់សម្គាល់ គឺការប្រកួតរបស់កីឡាករទាំង២គូ ត្រូវគេរំពឹងថា នឹងទាក់ទាញការចាប់អារម្មណ៍ពីសំណាក់ទស្សនិកជន ដោយសារតែកីឡាករខ្មែរម្នាក់ត្រូវការឡើងរេញ ដើម្បីសន្សំលុយបើកហាងបាយ និងម្នាក់ទៀតត្រូវការឈ្នះ ដើម្បីរក្សាក្រេឌីត ។
ការប្រកួតដែលនឹងធ្វើឡើងចាប់ពីម៉ោង៨ព្រឹកក្រោមការរៀបចំប្រដាល់របស់ទូរទស្សន៍អាស៊ីអាគ្នេយ៍នេះ ត្រូវគេឃើញថា នៅតែមានការរំពឹងខ្ពស់មិនខុសពីការប្រកួតអន្តរជាតិមុនៗនោះទេ បើទោះជាបរិយាកាសដែលគ្រោងប្រកួតអាចនឹងចំពលរដ្ឋមួយចំនួនចេញដើរកម្សាន្តចំថ្ងៃចូលឆ្នាំចិន និងចំថ្ងៃសម្រាកផងនោះ ។ អ្នករៀបចំកម្មវិធីបានអះអាងថា អ្នកទស្សនានឹងមានចំនួនច្រើនដោយសារតែក្នុងចំនួនអ្នកដើរលេងសម្រាប់ឱកាសបុណ្យចូលឆ្នាំចិន ក៏មិនច្រើនបើធៀបនឹងអ្នកតាមដានប្រដាល់ ។
កីឡាករកម្ពុជា២រូប គឺ ឡុង សុភី និង សូត្រ ប៊ុនធី នឹងក្លាយជាគូប្រកួតស៊ីសាច់ហុតឈាមជាមួយកីឡាករថៃនៅព្រឹកថ្ងៃអាទិត្យខានស្អែក ។ អ្នករៀបចំការប្រកួតបានអះអាងថា កីឡាករទាំង៤រូប មានបំណងប៉ះគ្នាយូរហើយ ជាក់ស្ដែងកីឡាករកម្ពុជា ដោយគ្រាន់តែបានដឹងថា នឹងត្រូវឡើងប្រកួតជាមួយកីឡាករថៃ ពួកគេទាំង២រូបទទួលយកដោយការពេញចិត្ត ហើយក៏បានត្រៀមខ្លួនក្នុងការប៉ះគ្នាផងដែរ ។ លោកថា កីឡាករកម្ពុជាទាំងពីរសុទ្ធតែបានត្រៀមខ្លួនមុនពេលប៉ះគ្នា ដោយបានចំណាយពេលច្រើនជាងមួយសប្ដាហ៍ក្នុងការហ្វឹកហាត់ផង ។
លោក ញាណ សុធី អ្នករៀបចំការប្រកួតប្រចាំស្ថានីយទូរទស្សន៍អាស៊ីអាគ្នេយ៍ បានថ្លែងប្រាប់ថា ក្នុងចំណោមកីឡាករកម្ពុជា លោកបានសម្រេចចិត្តដាក់ ឡុង សុភី មកពីក្លិបសាលវ័ន្តកីឡា ដែលទើបប្រកាសថា ចង់ឡើងរេញឱ្យបានញឹកញាប់ ដើម្បីបានប្រាក់បើកហាងបាយ ឱ្យឡើងប៉ះប្រកួតជាមួយកីឡាករថៃឈ្មោះ Thai Oulek ក្នុងនាមជាគូឯកអន្តរជាតិ សម្រាប់ប្រដាល់អន្តរជាតិនៅព្រឹកថ្ងៃអាទិត្យនោះ ។ លោកថា ជំនួបរវាងពួកគេមិនមែនជារឿងចៃដន្យនោះទេ ដោយលោកគឺមានបំណងចង់ឱ្យគេប៉ះគ្នាជាមួយគូបរទេសនៅក្នុងព្រឹត្តិការណ៍នេះតែម្ដង ។ លោកថា កីឡាករ ឡុង សុភី អាចចាត់ទុកថា ជាជើងខ្លាំងម្នាក់នៅលើសង្វៀនប្រដាល់អន្តរជាតិ ទើបលោកយល់ថា វត្តមានរបស់កីឡាកររូបនេះ អាចនឹងធ្វើឱ្យព្រឹតិ្តការណ៍ប្រដាល់ព្រឹកខានស្អែកទទួលការចាប់អារម្មណ៍ ។ លោកជឿជាក់ថា កីឡាកររូបនេះ នឹងបញ្ចេញសមត្ថភាពល្អដូចជា ពូកែគេច និងពូកែវាយសន្ធាប់ ដែលគេធ្លាប់បញ្ចេញនាពេលកន្លងមក ទើបលោកយល់ថា ជំនួបរវាង ឡុង សុភី ជាមួយកីឡាករថៃ ក៏នឹងមិនធម្មតាសម្រាប់ការប្រកួតទាំងមូល ។ លោកថា កីឡាករកម្ពុជារូបនេះ មានការឈានឡើងសមត្ថភាពហើយ បើទោះជាការប្រកួតប៉ុន្មានលើកចុងក្រោយមានការប្រែប្រួលក៏នៅតែខ្លាំងដដែល ។
លោកនិយាយថា ឡុង សុភី ដ្បិតថា មិនមែនជាម្ចាស់ជើងឯក ប៉ុន្តែការប្រកួតកន្លងមក របស់គេមានការទទួលស្គាល់ផងដែរ ទើបលោកសម្រេចចិត្តដាក់ឱ្យប្រកួតជាមួយកីឡាករ Thai Oulek ដែលជាជើងខ្លាំងម្នាក់ ។ កីឡាករថៃធ្លាប់ប្រកួត១១០លើក ឈ្នះ៩១លើក ចាញ់១៧លើក និងស្មើ២លើក ក្នុងពេលកីឡាករកម្ពុជាធ្លាប់ប្រកួត១៣៩លើក ឈ្នះ១០០លើក ចាញ់២៦លើក និងស្មើ៩លើក ។
សម្រាប់កីឡាករ សូត្រ ប៊ុនធី ដែលជាម្ចាស់ខ្សែក្រវាត់មកពីក្លិបបក្សីស្លាបដែក លោកញាណ សុធី បញ្ជាក់ថា គេត្រូវប៉ះប្រកួតជាមួយកីឡាករជើងខ្លាំងមកពីប្រទេសថៃដូចគ្នាឈ្មោះ Vath Chhalasak នៅក្នុងព្រឹត្តិការណ៍ប្រដាល់អន្តរជាតិនោះដែរ ។ លោកថា ការប្រកួតរបស់គូនេះ នៅមិនទាន់ដឹងថា អ្នកណាល្អជាងអ្នកណានោះទេ ក្នុងពេលសូត្រ ប៊ុនធី ដ្បិតថា ល្បីឈ្មោះតែការប្រកួតពេលខ្លះក៏ល្អ ហើយពេលខ្លះក៏ធ្លាក់ដៃ ដែលធ្វើឱ្យអ្នកគាំទ្រពិបាកស្ទង់សម្រាប់សមត្ថភាពចុងក្រោយរបស់គេ ។ លោកថា កីឡាករថៃធ្លាប់ប្រកួត៦១លើក ឈ្នះ៥១លើក ចាញ់៨លើក និងស្មើ២លើក រីឯកីឡាករកម្ពុជាធ្លាប់ប្រកួត៨៥លើក ឈ្នះ៦៧លើក ចាញ់១៤លើក និងស្មើ២លើកនៅលើសង្វៀន ។ នៅក្នុងព្រឹត្តិការណ៍ប្រដាល់ពេលព្រឹកនៅលើសង្វៀនអាស៊ីអាគ្នេយ៍ថ្ងៃអាទិត្យខានស្អែកនោះដែរ ក៏មានការប្រកួតអន្តរជាតិផងដែរ ។
នៅប៉ុស្ដិ៍លេខ៥ ឯណោះវិញ ក៏មានការប្រកួតដ៏សំខាន់ផងដែរ គឺការប្រកួតចាញ់ធ្លាក់ៗនៅក្នុងព្រឹត្តិការណ៍ TV5 Knock Out Series ក្នុងវគ្គ១៦នាក់ យក៨នាក់បន្តទៀតនៅថ្ងៃសៅរ៍ស្អែកនេះផងដែរ ចាប់ពីម៉ោង៥ល្ងាចតទៅ ៕
ចែករំលែកព័តមាននេះ