ខេត្តសៀមរាប ៖ កំពែងអង្គរធំជួសជុលដោយអ្នកជំនាញរបស់អាជ្ញាធរជាតិអប្សរា ។ គម្រោងនេះបានដំណើរការជួសជុលរួចជាស្ថាពរបានប្រវែង៨៣ម៉ែត្រ ហើយបានការសាទរ និងកោតសរសើរពីអ្នកជំនាញនៃគណៈកម្មាធិការអន្តរជាតិដើម្បីសម្របសម្រួលកិច្ចគាំពារ និងអភិវឌ្ឍន៍រមណីយដ្ឋានប្រវត្តិសាស្ត្រអង្គរ ហៅកាត់ថា អាយស៊ីស៊ី-អង្គរ (ICC-Angkor) ។
លោកលី វណ្ណា ប្រធាននាយកដ្ឋានអភិរក្សប្រាសាទក្នុងឧទ្យានអង្គរ និងបុរាណវិទ្យាបង្ការនៃអាជ្ញាធរជាតិអប្សរាបញ្ជាក់ប្រាប់ក្នុងឱកាសនៃកិច្ចប្រជុំ ICC.Angkor ថា របាយការណ៍បច្ចេកទេសអំពីលទ្ធផលនៃការងារជួសជុលកំពែងអង្គរធំ ត្រូវបានដាក់ជូនអ្នកជំនាញក្នុងកិច្ចប្រជុំអាយស៊ីស៊ី-អង្គរ ដែលកំពុងដំណើរការនៅស្នាក់ការអាជ្ញាធរជាតិអប្សរា ។ អ្នកជំនាញការអាយស៊ីស៊ី-អង្គរ បានសាទរនិងគាំទ្រពីសមិទ្ធផលដែលក្រុមការងាររបស់លោកបានសម្រេចបានពីការជួសជុលកំពែងអង្គរធំនេះ ។
កំពែងអង្គរធំជួសជុលរួលរាល់ជាស្ថាពរបានចំនួន ៨៣ម៉ែត្រ ដោយប្រើពេល២ឆ្នាំកន្លះ ។ ការជួសជុលនេះ គឺប្រើប្រាស់កម្លាំងពលកម្មមនុស្សផ្ទាល់ បូករួមទាំងសម្ភារជួសជុលបែបបុរាណផងដែរ ។ លោកវណ្ណា ពន្យល់ថា ការជួសជុលនេះ គឺក្រុមការងារបានប្រើប្រាស់សម្ភារបុរាណដែលមានស្រាប់តាមរយៈការបង្ហាប់ដី ទប់ដីកុំឲ្យច្រោះ ឬហូរ ក៏ដូចជាបង្កើតទីជម្រាលកុំឲ្យហូរច្រោះដីនៅលើជញ្ជាំងជាដើម។
ក្នុងដំណើរការជួសជុលនេះដែរ នាយកដ្ឋានអភិរក្សប្រាសាទក្នុងឧទ្យានអង្គរ និងបុរាណវិទ្យាបង្ការ បានគោរពទៅតាមអនុសាសន៍របស់អាយស៊ីស៊ី-អង្គរ ដែលលោកវណ្ណា បញ្ជាក់ថា មាន១៥ចំណុច ។ ដំណើរការនេះទៀតសោត ស្ថិតក្រោមការតាមដានពីអ្នកជំនាញការអាយស៊ីស៊ី-អង្គរដោយយកចិត្តទុកដាក់ ។
កំពែងអង្គរធំមានប្រវែងសរុប១២គីឡូម៉ែត្រ ក្នុងមួយជ្រុងមានប្រវែង៣គីឡូម៉ែត្រ។ កំពែងនេះមានកម្ពស់ចន្លោះ៦ម៉ែត្រ ទៅជាង៦ម៉ែត្រ ទៅតាមទីតាំង ផ្សេងៗគ្នា គឺកន្លែងខ្លះមានជញ្ជាំងថ្មបាយក្រៀមពី១៩ ទៅ២០ស្រទាប់ ។
គម្រោងជួសជុលកំពែងអង្គរធំមិនទាន់រួចរាល់នោះទេ ។ នាយកដ្ឋានអភិរក្សប្រាសាទក្នុងឧទ្យានអង្គរ និងបុរាណវិទ្យាបង្ការ បានដាក់សំណើមួយចំនួនទៅកាន់អ្នកពាក់ព័ន្ធ ដើម្បីស្នើសុំបន្តគម្រោងជួសជុលនេះជាបន្តបន្ទាប់ទៀត ៕
ចែករំលែកព័តមាននេះ