រាជធានីភ្នំពេញ ៖ អាជ្ញាធរអគ្គិសនីកម្ពុជាបានឲ្យដឹងថា នៅក្នុងចុងខែមីនា ឆ្នាំ២០១៧នេះ សេវាករដែលបានទិញអគ្គិសនីដុំចេញពីបណ្តាញខ្សែបញ្ជូនរង និងប្រជាពលរដ្ឋដែលបានប្រើប្រាស់អគ្គិសនីចេញពីខ្សែបណ្តាញជាតិ នឹងទទួលបានការលក់ចុះថ្លៃពីអគ្គិសនីកម្ពុជា ។
លោក តេង សុខុមាល នាយកបញ្ជីថ្លៃលក់អគ្គិសនី នៃអាជ្ញាធរអគ្គិសនីកម្ពុជា បានថ្លែងឲ្យដឹងនាព្រឹកថ្ងៃព្រហស្បតិ៍ ទី២៦ មករា ម្សិលមិញថា យោងផែនការរបស់រាជរដ្ឋាភិបាល ពាក់ព័ន្ធនឹងវិស័យអគ្គិសនី អាជ្ញាធរអគ្គិសនីកម្ពុជាមានកាតព្វកិច្ចពិគ្រោះយោបល់ អនុវត្តទៅតាមនីតិវិធីផ្លូវច្បាប់ ក្នុងនោះសម្រាប់ការលក់ដុំចេញពីអនុស្ថានីយផ្ទាល់ គឺបានកំណត់នៅក្នុងរយៈពេល៥ឆ្នាំ ដោយអត្រាថ្លៃស្មើៗគ្នា នៅក្នុងផែនការចាប់ពីឆ្នាំ២០១៦ ទៅដល់ឆ្នាំ២០២០ ។
លោកបន្តថា ពាក់ព័ន្ធការកែសម្រួលបញ្ជីថ្លៃលក់អគ្គិសនីរបស់អ្នកកាន់អាជ្ញាប័ណ្ណបញ្ជូនរង សម្រាប់ការលក់អគ្គិសនីដុំតង់ស្យុងមធ្យម នៅក្នុងឆ្នាំ២០១៦គឺលក់ក្នុងតម្លៃ១៤,៧សេនដុល្លារក្នុងមួយគីឡូវ៉ាត់ម៉ោង ចាប់ពីចុងខែមីនាឆ្នាំ២០១៧តទៅគ្រោងនឹងលក់ចេញក្នុងតម្លៃ១៤,៥សេនដុល្លារក្នុងមួយគីឡូវ៉ាត់ម៉ោង ។ ក្នុងនោះសម្រាប់គម្រោងលក់ឲ្យអតិថិជនប្រើប្រាស់ក្នុងវិស័យឧស្សាហកម្ម ពាណិជ្ជកម្ម និងរោងចក្រនានា ដែលបានទិញពីខ្សែបញ្ជូនរង មានអានុភាពត្រង់ស្វូដំឡើងចាប់ពី២៧៥គីឡូវ៉ាត់ម៉ោង (KVA)ឡើងទៅនៅក្នុងឆ្នាំ២០១៦ ថ្លៃលក់១៦,៧៥សេនដុល្លារ មកនៅត្រឹម១៦,៥សេនដុល្លារក្នុងមួយគីឡូវ៉ាត់ម៉ោងវិញ ។
លោក តេង សុខុមាល បានឲ្យដឹងថា អគ្គិសនីកម្ពុជាគ្រោងដាក់សម័យប្រជុំនៅក្នុងដើមខែមីនា ឆ្នាំ២០១៧ខាងមុខនេះ ដើម្បីឲ្យប្រជាពលរដ្ឋដែលតអគ្គិសនីចេញពីបណ្តាញជាតិនៅតាមទីប្រជុំជននានា ទទួលថ្លៃលក់ត្រឹម១០គីឡូចុះក្រោមក្នុងតម្លៃ៦១០រៀល នៅក្នុងមួយគីឡូវ៉ាត់ម៉ោង និងអ្នកប្រើប្រាស់លើស២០០គីឡូវ៉ាត់ម៉ោងឡើងទៅពីតម្លៃ៧៨០រៀល មកនៅត្រឹម៧៧០រៀលក្នុងមួយគីឡូវ៉ាត់ម៉ោងវិញ ។
លោក វង្សី វិស្សុត រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុបានថ្លែងថា ដោយសារការវិនិយោគលើវិស័យថាមពលអគ្គិសនីរបស់រដ្ឋាភិបាលជាច្រើន ដើម្បីបង្កើនផលិតភាពសេដ្ឋកិច្ចជាតិ ជាលទ្ឋផលតម្លៃអគ្គិសនីកម្ពុជានឹងចុះថ្លៃបន្ថែមទៀតនៅទូទាំងប្រទេស ក្នុងឆ្នាំ២០១៧នេះ ដោយនឹងលក់ជូនប្រជាពលរដ្ឋក្នុងតម្តៃ៦១០រៀលប៉ុណ្ណោះ ក្នុងមួយគីឡូវ៉ាត់ម៉ោង ។ លោកបន្តថា ការបញ្ចុះតម្លៃអគ្គិសនី នឹងជួយសម្រួលយ៉ាងច្រើនដល់ជីវភាពរបស់ប្រជាពលរដ្ឋ ព្រោះការពង្រីកសេវាបញ្ចូនសេវាកម្មអគ្គិសនីដល់ជនបទ ជាគោលដៅរបស់រាជរដ្ឋាភិបាលក្នុងការលើកកម្ពស់ជីវភាពរបស់ប្រជាពលរដ្ឋ ។
ជាយូរមកហើយ សេដ្ឋវិទូកម្ពុជានានាតែងលើកឡើងពីបញ្ហាប្រឈមក្នុងសេដ្ឋកិច្ចកម្ពុជា ដែលត្រូវដោះស្រាយជាបន្ទាន់រួមមាន តម្លៃអគ្គិសនី សម្រួលប្រព័ន្ធឡូជីស្ទិក និងធ្វើយ៉ាងណាឲ្យបរិយាកាសវិនិយោគនៅកម្ពុជាមានភាពកាន់តែល្អប្រសើរ ។
លោកបណ្ឌិត ម៉ី កល្យាណ ទីប្រឹក្សាជាន់ខ្ពស់នៃឧត្តមក្រុមប្រឹក្សាសេដ្ឋកិច្ចជាតិបានថ្លែងថា អ្វីដែលកម្ពុជាត្រូវដោះស្រាយ គឺបញ្ហាតម្លៃអគ្គិសនី កាត់បន្ថយតម្លៃដើមនៃការផលិត សម្រួលប្រព័ន្ធដឹកជញ្ជូនឲ្យមានភាពល្អប្រសើរ និងធ្វើយ៉ាងណាឲ្យបរិយាកាសវិនិយោគនៅកម្ពុជាកាន់តែមានភាពល្អប្រសើរ ដើម្បីលើកកម្ពស់ការប្រកួតប្រជែងរបស់កម្ពុជា ។ លោកបន្តថា កម្ពុជាត្រូវប្រឹងប្រែងបន្ថែមទៀត ដើម្បីលើកកម្ពស់ការប្រកួតប្រជែង កាត់បន្ថយការិយាធិបតេយ្យ ដើម្បីធ្វើយ៉ាងណាទាក់ទាញអ្នកវិនិយោគបន្ថែមមកកម្ពុជាឲ្យកាន់តែច្រើន ។
លោកបន្តថា ៖ « អគ្គិសនីនៅកម្ពុជានៅមានបញ្ហាប្រឈមជាច្រើនទាក់ទងនឹងប្រព័ន្ធខ្សែបញ្ជូន ទាក់ទងនឹងគុណភាពបណ្តាញ និងមានការដាក់ចរន្តជាញឹកញាប់ »។ លោកបន្តថា៖ «គុណភាពអគ្គិសនីជាអ្វីដែលកម្ពុជាគួរផ្តោតបន្ថែម ធ្វើយ៉ាងណាកុំឲ្យចរន្តខ្សោយឡើងចុះ ធ្វើយ៉ាងណាកុំឲ្យដាច់ជាញឹកញាប់ និងធ្វើយ៉ាងណាឲ្យបណ្តាញមានស្ថិរភាព ដើម្បីជួយឲ្យវិស័យឧស្សាហកម្មមិនរងផលប៉ះពាល់ ដោយសារអគ្គិសនីគ្មានគុណភាព »៕
ចែករំលែកព័តមាននេះ