ខេត្តមណ្ឌលគិរី ៖ ដើម្បីធានានូវសុខមាលភាពជូនប្រជាពលរដ្ឋ ក្នុងឱកាសពិធីបុណ្យចូលឆ្នាំចិន-វៀតណាមនេះ មន្ត្រីសាខាកាំកុងត្រូលប្រចាំខេត្តមណ្ឌលគិរី ដឹកនាំដោយលោក
ខេត្តមណ្ឌលគិរី ៖ ដើម្បីធានានូវសុខមាលភាពជូនប្រជាពលរដ្ឋ ក្នុងឱកាសពិធីបុណ្យចូលឆ្នាំចិន-វៀតណាមនេះ មន្ត្រីសាខាកាំកុងត្រូលប្រចាំខេត្តមណ្ឌលគិរី ដឹកនាំដោយលោក ចាន់ វាសនា ប្រធានសាខាកាំកុងត្រូលខេត្ត សហការជាមួយមន្ទីរពាណិជ្ជកម្មខេត្ត និងនគរបាលប្រឆាំងបទល្មើសសេដ្ឋកិច្ចខេត្ត បានចុះធ្វើការត្រួតពិនិត្យ គុណភាពទំនិញ ដែលអាជីវករលក់ដូរនៅផ្សារសែនមនោរម្យ ស្ថិតនៅក្រុងសែនមនោរម្យ កាលពីព្រឹកថ្ងៃទី២៤ ខែមករា ឆ្នាំ២០១៧។
លោក ចាន់ វាសនា បានឲ្យដឹងថា គោលបំណងនៃការចុះត្រួតពិនិត្យទំនិញនេះ ដោយផ្អែកទៅលើការណែនាំ របស់អគ្គនាយកដ្ឋានកាំកុងត្រូល ជាពិសេសអនុសាសន៍របស់អគ្គនាយកដ្ឋានកាំកុងត្រូល បានណែនាំដល់មន្ត្រីកាំកុងត្រូល គ្រប់សាខាទាំងអស់ ទូទាំងប្រទេសឲ្យធ្វើការត្រួតពិនិត្យទំនិញ ជាផលិតផលម្ហូបអារហារ តាមទីផ្សារជាប្រចាំ ដើម្បីធានាសុខភាពប្រជាពលរដ្ឋ ជាអ្នកប្រើប្រាស់។ លោកប្រធានសាខាកាំកុងត្រូលខេត្ត បានឲ្យដឹងទៀតថា ជាលទ្ធផលក្នុងការចុះពិនិត្យនោះ មន្ត្រីកាំកុងត្រូលបានធ្វើការ បានធ្វើតេស្តរកសារធាតុគីមីប៉ូរ៉ាក់ លើមុខទំនិញសាច់ក្រកត្រីងៀត ត្រីហើម នំបញ្ចុក សរសៃគុយទាវ លត សរសៃមី និងបានធ្វើតេស្តរកសារធាតុគីមី Sodium Hyodrosufite លើមុខទំនិញខ្ញីហាន់ស្រាប់ សណ្តែកបណ្តុះ រកសារធាតុ Formalim លើត្រីប្រហុក ជាលទ្ធផលមុខទំនិញទាំងនោះអត់មានសារធាតុគីមីប៉ូរ៉ាក់ទេ។
ក្នុងការចុះពិនិត្យនោះ មន្ត្រីជំនាញបានបន្តធ្វើតេស្តរកសារធាតុគីមីប៉ូរ៉ាក់ លើគុយទាវសរសៃធំ ជាលទ្ធផលមានសារធាតុគីមីប៉ូរ៉ាក់ចូល។ ជាមួយគ្នានេះដែរ សមត្ថកិច្ចចម្រុះ បានសហការជាមួយមន្ទីរឧស្សាហកម្ម និងសិប្បកម្មខេត្ត ចុះទៅដល់ម្ចាស់សិប្បកម្មធ្វើគុយទាវសរសៃធំ ហើយមន្ត្រីជំនាញ បានណែនាំ និងធ្វើកិច្ចសន្យាឲ្យម្ចាស់សិប្បកម្មបញ្ឈប់ការដាក់សារធាតុគីមីប៉ូរ៉ាក់ចូលក្នុងសរសៃគុយទាវពេលផលិត ក្នុងការចុះអង្កេតនោះដែរ ម្ចាស់សិប្បកម្មធ្វើគុយទាវសរសៃធំ បានយល់ព្រមបញ្ឈប់ដាក់ប៉ូរាក់ចូល ដោយសារគាត់អត់ដឹងថា ច្បាប់ហាមឃាត់ បន្ទាប់មកមន្ត្រីជំនាញបានដកហូតសរសៃគុយទាវដែលមានជាតិប៉ូរាក់៣.៥០គីឡូក្រាម ដើម្បីធ្វើការដុតកម្ទេចចោល។
ទន្ទឹមនឹងនោះ មន្ត្រីជំនាញ បានធ្វើការអប់រំ ក៏ដូចជាណែនាំដល់អាជីវករ ឲ្យដាក់តាំងលក់ទំនិញដែលមានគុណភាពល្អ មានស្លាកសញ្ញាត្រឹមត្រូវ និងហាមដាច់ខាត ទំនិញដែលគ្មានកាលបរិច្ឆេទច្បាស់លាល់ ជាពិសេស ហួសកាលបរិច្ឆេទប្រើប្រាស់ ដែលខុសបទបញ្ញតិ នៃច្បាប់ព្រមទាំងបិទស្លាកស្ទីកគ័រ និងបង្ហាញដល់អាជីវករ ក៏ដូចជាប្រជាពលរដ្ឋនូវរបៀបមើលថ្ងៃខែកំណត់នៃការបរិច្ឆេទ និងការជ្រើសរើសផលិតផលម្ហូបអាហារ ដែលមានសុវត្ថិភាព សម្រាប់ទទួលទាន៕
ចែករំលែកព័តមាននេះ