រាជធានីភ្នំពេញ ៖ នៅថ្ងៃសៅរ៍ទី២៨ មករា ខានស្អែកនេះ កីឡាករ ភិន សុទី មកពីក្លិបកងទ័ពជើងទឹក និងកីឡាករ បឺត សង្ឃឹម មកពីក្លិបរ៉ាហាប់ស្វាយប៉ាក នឹងជួបប្រកួតជាមួយកីឡាករបរទេសនៅលើសង្វៀនទូរទស្សន៍ស៊ីធីអិន ។
រាជធានីភ្នំពេញ ៖ នៅថ្ងៃសៅរ៍ទី២៨ មករា ខានស្អែកនេះ កីឡាករ ភិន សុទី មកពីក្លិបកងទ័ពជើងទឹក និងកីឡាករ បឺត សង្ឃឹម មកពីក្លិបរ៉ាហាប់ស្វាយប៉ាក នឹងជួបប្រកួតជាមួយកីឡាករបរទេសនៅលើសង្វៀនទូរទស្សន៍ស៊ីធីអិន ។ អ្នកនិយមទស្សនាកីឡាប្រដាល់ជាច្រើននាក់ កំពុងតែរង់ចាំអ៊ុតមើលថា តើកីឡាករទាំងពីរអាចសម្រេចគោលដៅឬយ៉ាងណា ខណៈកីឡាករបរទេសដែលពួកគេត្រូវជួបនាពេលនេះ ហាក់ដូចជាមានសមត្ថភាពពិបាកផ្ដួលអីុចឹងនោះ ។
ការប្រកួតនៅថ្ងៃនោះ កីឡាករ ភិន សុទី នឹងជួបប្រកួតជាមួយកីឡាករថៃឈ្មោះ ឡាក់ជ័យ ស.ស៊ីស៊ុំភុង ក្នុងប្រភេទទម្ងន់៦៥គីឡូក្រាម ។
កីឡាករ ភិន សុទី ធ្លាប់ប្រកួត៣៧ដង ឈ្នះ២៥ដង ចាញ់១០ដង ស្នើ២ដង និងផ្ដួលគូប្រកួតឱ្យសន្លប់បាន១៣ដង ក្នុងពេលកីឡាករថៃធ្លាប់ប្រកួត៥៥ដង ឈ្នះ៤០ដង ចាញ់១៣ដង ស្នើ២ដង និងផ្ដួលគូប្រកួតឱ្យសន្លប់បាន១៣ដង ។ គូនេះពិបាកប៉ាន់ស្មានលទ្ធផលចុងក្រោយណាស់ ដោយសារកីឡាករថៃរូបនេះមិនធ្លាប់មកប្រកួតនៅលើសង្វៀនស្រុកខ្មែរ ទើបគេមិនដឹងពីសមត្ថភាពថា ខ្លាំងប៉ុនណា ។ ដូច្នេះមានតែរង់ចាំមើលការប្រកួតជាក់ស្ដែងនៅលើសង្វៀនប៉ុណ្ណោះគង់តែដឹងទេ ។
ចំណែក បឺត សង្ឃឹម ដែលត្រូវជួបប្រកួតជាមួយកីឡាករថៃឈ្មោះ វីហ្គោ ស.ដានឆ័យ ក្នុងប្រភេទទម្ងន់៥៧គីឡូក្រាមនោះ មិនទាន់ដឹងថា ស៊ីផុយ ឬពិបាកទំពារនោះទេ ។
បឺត សង្ឃឹម ធ្លាប់ប្រកួត៥០ដង ឈ្នះ៣៧ដង ចាញ់១១ដង ស្នើ២ដង និងផ្ដួលគូប្រកួតឱ្យសន្លប់បាន១៦ដង ក្នុងពេលកីឡាករថៃ ធ្លាប់ប្រកួត៥៥ដង ឈ្នះ៤៥ដង ចាញ់១០ដង និងផ្ដួលគូប្រកួតឱ្យសន្លប់បាន៦ដង ។ កីឡាករថៃរូបនេះ ធ្លាប់មកប្រកួតនៅលើសង្វៀនស្រុកខ្មែរជាច្រើនលើកឃើញថា ថ្វីដៃប្រកួតរបស់គេមិនធម្មតា ទើបគេមានមន្ទិលទៅលើសមត្ថភាព បឺត សង្ឃឹម ដែលរាងបាត់មុខយូរមិនដឹងថា អាចតតាំងជាមួយជើងខ្លាំងមកពីថៃរូបនេះបានឬអត់ ។
នៅលើសង្វៀនទូរទស្សន៍ស៊ីអិនស៊ីយប់ថ្ងៃសៅរ៍ខានស្អែកនេះដែរ ក៏មានការប្រកួតប្រដាល់អន្តរជាតិជូនទស្សនិកជនបានទស្សនាផងដែរ ។ កីឡាករ ហ៊ឹម សេរី មកពីក្លិបតាព្រហ្មមានជ័យ ត្រូវគេផ្គូផ្គងឱ្យជួបប្រកួតជាមួយកីឡាករថៃឈ្មោះ ប៉ានភេទ ស.ស៊ីស៊ុំភុង ក្នុងប្រភេទទម្ងន់៥១គីឡូក្រាម ។ កីឡាករ សុខ សុវណ្ណ មកពីក្លិបកងពលធំអន្តរាគមន៍លេខ២ ប្រកួតជាមួយកីឡាករថៃឈ្មោះ វ៉ាត់ធារ៉ាក់ដេត ស.ដានឆ័យ ក្នុងប្រភេទទម្ងន់៦០គីឡូក្រាម។ កីឡាករ សរ រាជសីហ៍ មកពីក្លិបមោងឬស្សីមរតកគុនខ្មែរ ប្រកួតជាមួយកីឡាករថៃឈ្មោះ យ៉តភូស៊ុន ស៊ីតហ្វាម៉ៃ ក្នុងប្រភេទទម្ងន់៦៩គីឡូក្រាម ។
កីឡាករថៃទាំង៣រូបនេះ មានតែវ៉ាត់ធារ៉ាក់ដេត ស.ដានឆ័យ ប៉ុណ្ណោះ ដែលធ្លាប់មកប្រកួតនៅលើសង្វៀនស្រុកខ្មែរ ក្រៅពីនោះមិនដែលឡើយ ទើបគេមិនដឹងប្រវត្ដិប្រកួតរបស់ពួកគេថា ខ្លាំងប៉ុនណា ។ ដូច្នេះបើចង់ដឹងថា អ្នកណាខ្លាំងជាងអ្នកណានោះ មានតែរង់ចាំមើលការប្រកួតជាក់ស្ដែងទាំងអស់គ្នា ។
ដោយឡែកនៅថ្ងៃអាទិត្យ ទី២៩ មករា វិញ នៅលើសង្វៀនទូរទស្សន៍ស៊ីអិនស៊ីដដែល ប្រជុំដោយកីឡាករជើងខ្លាំងក្នុងស្រុកជាច្រើនគូដែលមកសាកវិជ្ជាគុនគ្នាជូនទស្សនិកជនបានទស្សនានាថ្ងៃសម្រាកចុងសប្ដាហ៍ ដូចជា កីឡាករ ពូ ឡុង មកពីក្លិបសិល្បៈ ប្រកួតជាមួយកីឡាករ សិទ្ធ ធឹមទាន់ មកពីក្លិបសាមគ្គីកូនខ្មែរ ។ កីឡាករ វីក ឈាង មកពីសមាគមកីឡាប្រដាល់ក្រសួងការពារជាតិ ប្រកួតជាមួយកីឡាករ ហូ សុភា មកពីក្លិបឃ្លាំងមឿងកីឡា ។ កីឡាករ ឡៅ ផានាថ មកពីក្លិបមកុដរាជសីហ៍ ប្រកួតជាមួយកីឡាករ ផាន ចំណាន មកពីក្លិបរាជសីហ៍ខេត្ដបន្ទាយមានជ័យ ។ កីឡាករ ចាន់ ប៊ុនហឿន មកពីក្លិបនិរោធមានជ័យ ប្រកួតជាមួយកីឡាករ លាស់ យីន មកពីក្លិបតាព្រហ្មមានជ័យ និងគូចុងក្រោយ កីឡាករ រតនា សីហា មកពីក្លិបគុនខ្មែរ ប្រកួតជាមួយកីឡាករ សេង ឈឿន មកពីក្លិបពន្លឺវិបុល ៕
ចែករំលែកព័តមាននេះ