រាជធានីភ្នំពេញ ៖ ក្រោយពីមានកិច្ចព្រមព្រៀងបន្ថែមជាមួយធនាគារជាតិកាណាដា ធនាគារ ABA បានផ្លាស់ប្តូរស្លាកសញ្ញាថ្មី (ឡូហ្គោ) ដោយបន្ថែមឈ្មោះដៃគូមួយទៀត គឺធនាគារជាតិកាណាដា ។ ការផ្លាស់ប្តូរឡូហ្គោនេះ នឹងបញ្ជាក់ឱ្យឃើញពីភាពជោគជ័យមួយរបស់ធនាគារ ABA ក្នុងនាមជាដៃគូយុទ្ធសាស្ត្រជាមួយធនាគារជាតិ កាណាដា ដែលបានក្លាយជាម្ចាស់ភាគទុនិកដ៏ធំរបស់
រាជធានីភ្នំពេញ ៖ ក្រោយពីមានកិច្ចព្រមព្រៀងបន្ថែមជាមួយធនាគារជាតិកាណាដា ធនាគារ ABA បានផ្លាស់ប្តូរស្លាកសញ្ញាថ្មី (ឡូហ្គោ) ដោយបន្ថែមឈ្មោះដៃគូមួយទៀត គឺធនាគារជាតិកាណាដា ។ ការផ្លាស់ប្តូរឡូហ្គោនេះ នឹងបញ្ជាក់ឱ្យឃើញពីភាពជោគជ័យមួយរបស់ធនាគារ ABA ក្នុងនាមជាដៃគូយុទ្ធសាស្ត្រជាមួយធនាគារជាតិ កាណាដា ដែលបានក្លាយជាម្ចាស់ភាគទុនិកដ៏ធំរបស់ ABA ក្នុងឆ្នាំ២០១៦ កន្លងទៅនេះ ។
មានប្រសាសន៍នៅក្នុងពិធីបង្ហាញឡូហ្គោថ្មីជាសាធារណៈ កាលពីថ្ងៃទី២៥ មករា នៅធនាគារ ABA សាខាវិមានឯករាជ្យ លោក Askhat Azhikhanov នាយកប្រតិបត្តិធនាគារ ABA ឱ្យដឹងថា ការផ្លាស់ប្តូរឡូហ្គោថ្មីនេះ នឹងបញ្ជាក់ពីជំហររឹងមាំ កិត្តិនាមល្បីល្បាញក្នុងទីផ្សារ និងទំនុកចិត្តខ្ពស់ជូនអតិថិជន ។ ម្យ៉ាងវិញទៀត វាក៏បានបង្ហាញពីសមត្ថភាពថ្មី ភាពច្នៃប្រឌិតខ្ពស់ ថាមពលបន្ថែម និងគ្រឹះដ៏រឹងមាំរបស់ ABA ផងដែរ ។
លោកថា ៖ « ឡូហ្គោថ្មីនេះ ធ្វើឱ្យយើងទទួលបានភាពលេចធ្លោជាងគូប្រកួតប្រជែងរបស់យើង ព្រមទាំងសបញ្ជាក់ឱ្យឃើញថា ធនាគារ ABA មានការគាំទ្រយ៉ាងរឹងមាំពីស្ថាប័នហិរញ្ញវត្ថុមួយ ក្នុងចំណោមស្ថាប័នហិរញ្ញវត្ថុដ៏ធំជាងគេក្នុងទ្វីបអាមេរិកខាងជើង »។
លោក Louis Vachon នាយកប្រតិបត្តិធនាគារជាតិកាណាដា ឱ្យដឹងថា ធនាគារជាតិកាណាដា ដំបូងបានដាក់ទុនវិនិយោគក្នុងធនាគារ ABA នៅឆ្នាំ២០១៤ ហើយការបន្តនូវជំហរដ៏រឹងមាំ និងដៃគូសហការបានទទួលជោគជ័យយ៉ាងសម្បើម គឺបានក្លាយជាម្ចាស់ភាគទុនិកដ៏ធំ ដែលមានរហូតដល់៩០% នៃភាគហ៊ុនសរុប ។ លោកថា ៖ « ការដាក់សម្ពោធឡូហ្គោថ្មីនេះ យើងមានមោទនភាពក្នុងការប្រកាសជាសាធារណៈថា ធនាគារ ABA គឺជាផ្នែកមួយដ៏សំខាន់របស់ក្រុមធនាគារជាតិកាណាដា » ។
លោកបន្តថា ធនាគារ ABA មានលក្ខខណ្ឌត្រឹមត្រូវតាំងពីដំបូង ហើយស្ថាប័នទាំងពីរបានប្ដេជ្ញាចិត្តក្នុងការជួយសហគ្រិន និងជំរុញអាជីវកម្មគ្រួសារ ផ្ដល់នូវសេវាកម្មល្អៗដល់អតិថិជន ផ្ដល់ជូននូវសេវាកម្មដំណោះស្រាយហិរញ្ញវត្ថុបែបឌីជីថល និងថែរក្សាទំនាក់ទំនងរដ្ឋបាលកិច្ចល្អ ។
លោកបន្ថែមទៀតថា នៅដំណាច់ឆ្នាំ២០១៦ ធនាគារ ABA មានប្រាក់កម្ចីប្រមាណ១ពាន់លានដុល្លារ និងប្រាក់បញ្ញើសន្សំពីអតិថិជនចំនួនប្រមាណ៩០០លានដុល្លារអាមេរិក ហើយមានអត្រាកំណើនប្រមាណ៣០% បើធៀបនឹងឆ្នាំ២០១៥ កន្លងទៅ ។ លោកថា ៖ « ធនាគារ ABA នឹងនៅជាមួយអតិថិជនកម្ពុជាគ្រប់ៗរូប ដែលត្រូវការដំណោះស្រាយហិរញ្ញវត្ថុដូចជា ត្រូវការបើកអាជីវកម្មលក្ខណៈគ្រួសារនៅតាមផ្ទះជាដើម » ។
គួរបញ្ជាក់ថា ធនាគារ ABA បានបង្កើតឡើងនៅក្នុងឆ្នាំ១៩៩៦ ហើយរហូតមកដល់ចុងឆ្នាំ២០១៦ ធនាគារមានទ្រព្យសកម្មសរុប ១,១ពាន់លានដុល្លារអាមេរិក និងមូលធនភាគហ៊ុនិកសរុប១២៨លានដុល្លារអាមេរិក ។ ភាគទុនិកធំជាងគេរបស់ ABA សព្វថ្ងៃនេះ គឺធនាគារជាតិកាណាដា ដែលជាធនាគារធំបំផុតទី៦ នៅប្រទេសកាណាដា ។ គិតត្រឹមថ្ងៃទី១ មករា ២០១៧ ធនាគារ ABA មានម៉ាស៊ីនអេធីអឹមចំនួន១៦៧កន្លែងនៅទូទាំងប្រទេសកម្ពុជា ៕
ចែករំលែកព័តមាននេះ