រាជធានីភ្នំពេញ ៖ ក្នុងទស្សនវិស័យឆ្នាំ២០១៧ កំណើនសេដ្ឋកិច្ចពិភពលោកត្រូវបានរំពឹងថា នឹងមានអត្រាខ្ពស់ជាងឆ្នាំ២០១៦ បើទោះបីជាមានបញ្ហាប្រឈម ភាពមិនច្បាស់លាស់ និងមានហានិភ័យមួយចំនួនក៏ដោយ ។ ដោយឡែក កម្ពុជាក្នុងឆ្នាំ២០១៧នេះ បើតាមស្ថាប័នហិរញ្ញវត្ថុអន្តរជាតិធំៗ ក៏ដូចជារាជរដ្ឋាភិបាលបានព្យាករថា សេដ្ឋកិច្ចកម្ពុជា នឹងបន្ដស្ថិតនៅលើគន្លងនៃកំណើនរយៈពេលវែងក្នុងអត្រាកំណើនខ្ពស់ប្រមាណ៧% ក្នុងឆ្នាំ២០១៧។ ចុះបើសេដ្ឋកិច្ចពិភពលោក និងក្នុងតំបន់កំពុងប្រឈមនឹងបញ្ហាបែបនេះ តើកម្ពុជាអាចនៅតែរក្សាកំណើនសេដ្ឋកិច្ចបានខ្ពស់ដូចការរំពឹងទុកដែរឬយ៉ាងណា ?
បើតាមលោក ឈាង វណ្ណារិទ្ធ ប្រធាននាយកដ្ឋានគោលនយោបាយម៉ាក្រូសេដ្ឋកិច្ច និងសារពើពន្ធនៃអគ្គនាយកដ្ឋានគោលនយោបាយសេដ្ឋកិច្ច និងហិរញ្ញវត្ថុសាធារណៈ នៃក្រសួងសេដ្ឋកិច្ច និងហិរញ្ញវត្ថុ បានលើកឡើងក្នុងវេទិកាសាធារណៈស្ដីពី «ការគ្រប់គ្រងម៉ាក្រូសេដ្ឋកិច្ច និងថវិកាឆ្នាំ២០១៧» ថា ៖ «បញ្ហាប្រឈមជាសកលនៅឆ្នាំ២០១៧ សម្រាប់ប្រទេសក្នុងតំបន់ នឹងជួបប្រទះការឡើងថ្លៃនៃប្រាក់ដុល្លារអាមេរិក ដែលអាចធ្វើឱ្យប៉ះពាល់ដល់ការប្រកួតប្រជែង ជាពិសេស ប្រទេសកម្ពុជាប្រើប្រាស់ប្រាក់ដុល្លារច្រើន ។ ការថមថយនៃកំណើនសេដ្ឋកិច្ចចិន ជាការរំពឹងទុកអាចធ្វើឱ្យប៉ះពាល់ដល់វិស័យហិរញ្ញវត្ថុ ក៏ដូចជាពាណិជ្ជកម្ម ។ ការចាកចេញរបស់ប្រទេសអង់គ្លេសពីសហភាពអឺរ៉ុប ដែលអាចធ្វើឱ្យមានការផ្លាស់ប្តូរគោលនយោបាយពាណិជ្ជកម្មជាមួយដៃគូ ។ ការងើបឡើងនៃតម្លៃប្រេង និងតម្លៃទំនិញផ្សេងៗ គឺអាចប៉ះពាល់ដល់ប្រទេសមួយចំនួន ជាពិសេស កម្ពុជាបាននាំចូលប្រេងច្រើន និងកំណើនយឺតនៃពាណិជ្ជកម្មសកលលោក » ។
ទេសាភិបាលធនាគារជាតិនៃកម្ពុជា លោក ជា ចាន់តូ មានប្រសាសន៍ថា សេដ្ឋកិច្ចពិភពលោក រួមទាំងប្រទេសក្នុងតំបន់អាចជួបបញ្ហាប្រឈមនឹងហានិភ័យនៃការថមថយដូចជា ផលប៉ះពាល់អវិជ្ជមានពីនិន្នាការឡើងថ្លៃនៃប្រាក់ដុល្លារអាមេរិកចំពោះការនាំចេញ និងវិស័យទេសចរណ៍របស់កម្ពុជា ដែលមានសេដ្ឋកិច្ចដុល្លារូបនីយកម្មខ្ពស់ ។ ភាពរឹតត្បិតនៃស្ថានភាពហិរញ្ញវត្ថុអន្តរជាតិ អាចកាត់បន្ថយលំហូរមូលធនចូលក្នុងតំបន់ និងអាចមានឥទ្ធិពលបន្តមកលើកម្ពុជា តាមរយៈការបន្ថយលំហូរវិនិយោគិន និងដាក់សម្ពាធលើការបង្កើនអត្រាការប្រាក់នៅកម្ពុជា បន្ទាប់ពីគណៈកម្មាធិការទីផ្សារចំហរបស់ធនាគារកណ្តាលអាមេរិកសម្រេចដំឡើងអត្រាការប្រាក់គោលចំនួន០,២៥% ដល់០,៧៥% កាលពីខែធ្នូ ឆ្នាំ២០១៦ ។ ការកើនឡើងនៃភាពប្រកួតប្រជែងនៅលើទីផ្សារនាំចេញជាមួយប្រទេសក្នុងតំបន់ និងនិន្នាការកើនឡើងនៃការអនុវត្តគោលនយោបាយពាណិជ្ជកម្មគាំពារនិយមនៅប្រទេសអភិវឌ្ឍន៍ ដែលអាចដាក់សម្ពាធលើការនាំចេញរបស់កម្ពុជា ។
លោកថា ៖ « ចំពោះហានិភ័យខាងក្នុង សេដ្ឋកិច្ចកម្ពុជា គឺអាចប្រឈមនឹងការថយចុះនៃល្បឿនកំណើនក្នុងវិស័យសំណង់ និងអចលនទ្រព្យ ។ កំណើនឥណទានយ៉ាងឆាប់រហ័សទៅលើវិស័យនេះ និងការថយចុះនៃឧត្តមភាពប្រកួតប្រជែងផ្នែកថ្លៃ ដោយសារកំណើនប្រាក់បៀវត្សនិយោជិត ។ ទន្ទឹមនឹងនេះ កម្ពុជាក៏បន្តមានបញ្ហាប្រឈមរចនាសម្ព័ន្ធចម្បងៗមួយចំនួនដូចជា កម្រិតដុល្លារូបនីយកម្មខ្ពស់, តម្លៃខ្ពស់នៃថាមពល និងដឹកជញ្ជូន, កង្វះខាតផ្នែកហេដ្ឋារចនាសម្ព័ន្ធរូបវ័ន្ដ និងកង្វះធនធានមនុស្សមានជំនាញ» ។
ដើម្បីរួមចំណែកគាំទ្រកំណើនប្រកបដោយចីរភាព ស្របតាមគោលនយោបាយរបស់រាជរដ្ឋាភិបាល និងរក្សាកំណើនសេដ្ឋកិច្ចឆ្នាំ២០១៧ លោក ជា ចាន់តូ មានប្រសាសន៍ថា ៖ « ធនាគារជាតិនៃកម្ពុជា នឹងបន្តអនុវត្តគោលនយោបាយរូបិយវត្ថុប្រកបដោយភាពប្រុងប្រយ័ត្ននិងទន់ភ្លន់ ដើម្បីរក្សាស្ថិរភាពថ្លៃ និងតម្លៃប្រាក់រៀល សំដៅរួមចំណែកពង្រឹងស្ថិរភាពម៉ាក្រូសេដ្ឋកិច្ច ។ ក្នុងទិសដៅនេះ ការលើកកម្ពស់ការប្រើប្រាស់ប្រាក់រៀលឲ្យកាន់តែទូលំទូលាយ នៅតែជាគោលនយោបាយចម្បងមួយដើម្បីពង្រឹងប្រសិទ្ធភាពគោលនយោបាយរូបិយវត្ថុបន្ថែមទៀត ជាពិសេស តាមរយៈការបន្តអភិវឌ្ឍទីផ្សារអន្តរធនាគារ ទីផ្សារប្តូរប្រាក់ និងឧបករណ៍គោលនយោបាយរូបិយវត្ថុនានាផ្អែកតាមយន្តការទីផ្សារ » ។
ធនាគារជាតិនៃកម្ពុជា នឹងបន្តពង្រឹងការអភិវឌ្ឍវិស័យធនាគារ និងហេដ្ឋារចនាសម្ព័ន្ធហិរញ្ញវត្ថុពាក់ព័ន្ធនានា ដើម្បីឱ្យវិស័យធនាគារកាន់តែមានសមាហរណកម្មខ្ពស់ទៅក្នុងតំបន់និងពិភពលោក មានភាពប្រកួតប្រជែងនិងប្រសិទ្ធភាពដោយផ្អែកគោលការណ៍ទីផ្សារ ហើយមានលក្ខណៈពិពិធភាព និងភាពរឹងមាំ ដែលនឹងបន្តរួមចំណែករក្សាស្ថិរភាពហិរញ្ញវត្ថុ និងទ្រទ្រង់កំណើនសេដ្ឋកិច្ចប្រកបដោយចីរភាព សមធម៌ និងបរិយាប័ន្ន ស្របតាមយុទ្ធសាស្ត្រអភិវឌ្ឍន៍វិស័យហិរញ្ញវត្ថុ ឆ្នាំ២០១៥-២០២៥ ដើម្បីសម្រេចបាននូវគោលដៅនេះ សមត្ថភាពត្រួតពិនិត្យ បទប្បញ្ញត្តិ និងចែករំលែកព័ត៌មាន។
ឥណទាននឹងត្រូវពង្រឹង ហើយយុទ្ធសាស្ត្រពាក់ព័ន្ធនឹងប្រព័ន្ធទូទាត់ បរិយាប័ន្នហិរញ្ញវត្ថុ កិច្ចការពារអតិថិជន និងការអប់រំផ្នែកហិរញ្ញ នឹងត្រូវរៀបចំឡើង ។ ក្រៅពីនេះ ធនាគារជាតិនៃកម្ពុជានឹងបន្តពង្រឹងគុណភាពស្ថិតិ និងការសិក្សាស្រាវជ្រាវសំដៅគាំទ្រដល់ការរៀបចំ និងអនុវត្តគោលនយោបាយនានា ដោយផ្អែកលើវិទ្យាសាស្ត្រ និងការវិនិច្ឆ័យច្បាស់លាស់គ្រប់ជ្រុងជ្រោយ ៕
ចែករំលែកព័តមាននេះ