កាលពីព្រឹកថ្ងៃ២៣ មករា ២០១៧ លោកប្រាយុទ្ធ ច័ន្ទអូចា នាយករដ្ឋមន្ត្រី និងជាប្រធានគណៈកម្មការសន្តិសុខជាតិថៃបានបំពេញតួនាទីនៅឯទីស្តីការនាយករដ្ឋមន្ត្រីជាធម្មតា ប៉ុន្តែមានចំណុចគួរឱ្យចាប់អារម្មណ៍មួយត្រង់ថា នៅគណៈរដ្ឋមន្ត្រីមានការកែសម្រួលទីតាំងភូមិសាស្ត្រមួយ ឬហៅថា «រៀបចំលើករាសី» ដោយយកពាងដាំឈូកធុនធំចំនួន១០ ដាក់តាំងលំអនៅវាលស្មៅខាងមុខអគារ ។
ការរៀបចំលើករាសីនោះ គឺយកឈូកពណ៌ស្វាយ ខៀវ ស៊ីជម្ពូ និងពណ៌ស ដាក់តាំងលំអនៅវាលស្មៅខាងមុខត្រង់បរិវេណផ្លូវដើររបស់នាយករដ្ឋមន្ត្រី ។ នាយករដ្ឋមន្ត្រីយល់ស្របតាមការរៀបចំនោះ ព្រោះវាជាផ្នែកមួយលើករាសីដល់មេដឹកនាំប្រទេស ។
កាសែតថៃបញ្ជាក់ថា ការយកពាងដាំឈូក និងជ្រើសពណ៌ឈូកតាំងលំអនៅខាងមុខវិមានរដ្ឋាភិបាលនេះ ក្រៅពីបង្កើតភាពស្រស់ស្អាត ក៏បង្កើនសិរីមង្គលសួស្តីដល់រដ្ឋាភិបាល និងនាយករដ្ឋមន្ត្រីផងដែរ ។ ផ្កាឈូក គឺជាផ្កាដែលជនជាតិថៃប្រើក្នុងការបូជាព្រះ ។
ឈូកជាផ្កាប្រើសម្រាប់ពិធីមង្គលសួស្តីដែលគេនិយមដាំនៅក្នុងផ្ទះនឹងបង្កើនសិរីសួស្តី ។ មនុស្សនៅក្នុងសម័យបុរាណមានជំនឿថា គ្រួសារណាដែលដាំឈូកនៅក្នុងផ្ទះជួយឱ្យមនុស្សក្នុងក្រុមគ្រួសារនោះមានទឹកចិត្តបរិសុទ្ធ ស្រស់ ស្អាត និងស្រស់ស្រាយ ។ លើសពីនេះពលរដ្ឋមានជំនឿថា បើប្ញស ឬក្រអៅឈូកវែងបង្ហាញពីសម្ព័ន្ធភាពរបស់ក្រុមគ្រួសារចេះស្រឡាញ់ជ្រោមជ្រែងគ្នា និងមានតែសេចក្តីសុខ ។ រីឯផ្កាឈូកបង្ហាញពីការរស់នៅរបស់ក្រុមគ្រួសារ ទោះបីជាកើតនៅក្នុងភក់ក្តីនៅពេលផុសចេញពីទឹកនឹងមានលក្ខណៈស្រស់ស្រាយ ស្រទាប់ផ្កាឈូកស្អាតបរិសុទ្ធគ្មានអ្វីមកប្រឡូកប្រឡាក់បាន បើនិយាយពីធម៌បញ្ជាក់ថា រួចផុតពីកិលេស និងការកើតទុក្ខទាំងពួក ។
អត្ថន័យរបស់ផ្កាឈូកពណ៌ខៀវ គឺជ័យជម្នះក្នុងចិត្ត និងឈ្នះកិលេស ។
ផ្កាឈូកពណ៌ស សំដៅលើភាពបរិសុទ្ធ ស្ងប់ស្ងាត់ក្នុងចិត្ត និងស្រស់ស្រាយ ។
ពណ៌ស្វាយ គឺផ្សារភ្ជាប់នឹងភាពអាថ៌កំបាំង។ពណ៌ស៊ីជម្ពូ គឺជាផ្កាដ៏ឆើតឆាយ និងចាត់ទុកថា ជាផ្កាឈូកតំណាងឱ្យព្រះពុទ្ធនិងទឹកចិត្ត មានក្តីស្រឡាញ់ និងយល់ចិត្តអ្នកដទៃ៕
ចែករំលែកព័តមាននេះ