រាជធានីភ្នំពេញ ៖ សម្តេចក្រឡាហោម ស ខេង រដ្ឋមន្ត្រីក្រសួងមហាផ្ទៃកាលពីថ្ងៃទី២៥ មករា បានធ្វើដំណើរតាមឧទ្ធម្ភាគចក្រជាលើកដំបូងត្រួតពិនិត្យបទល្មើសនេសាទ
រាជធានីភ្នំពេញ ៖ សម្តេចក្រឡាហោម ស ខេង រដ្ឋមន្ត្រីក្រសួងមហាផ្ទៃកាលពីថ្ងៃទី២៥ មករា បានធ្វើដំណើរតាមឧទ្ធម្ភាគចក្រជាលើកដំបូងត្រួតពិនិត្យបទល្មើសនេសាទនៅលើបឹងទន្លេសាប អមដំណើរដោយលោកឧត្តមសេនីយ៍នេត សាវឿន ,លោករដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ និងមន្ត្រីមួយចំនួនទៀត ។ ដំណើរត្រួតពិនិត្យនោះធ្វើឡើងបន្ទាប់ពីការបង្កើតគណៈកម្មការបង្ក្រាប និងទប់ស្កាត់បទល្មើសលើផ្ទៃបឹងទន្លេសាប នៅចុងឆ្នាំ២០១៦ ។
ការត្រួតពិនិត្យរកឃើញថា នៅខេត្តកំពង់ធំ និងកំពង់ឆ្នាំងបទល្មើសនេសាទកើតមានច្រើន ខណៈនៅបាត់ដំបង សៀមរាប ពោធិ៍សាត់មិនសូវកើតមានទេ ។ ប៉ុន្តែនៅថ្ងៃទី២៤ មករា សមត្ថកិច្ចចម្រុះរបស់ក្រសួងបានបង្ក្រាបបទល្មើសនេសាទក្នុងភូមិសាស្ត្រខេត្តពោធិ៍សាត់ ដែលប្រើប្រាស់ឧបករណ៍អួនក្រឡាញឹក ប្រើប្រាស់ម៉ាស៊ីនអូសទាញ និងឧបករណ៍យ៉ាំងកាវជាច្រើនវង់ និងចាប់ឃាត់ខ្លួនមនុស្ស៤១នាក់ ។
រកឃើញបទល្មើសនេសាទកើតមានច្រើននៅខេត្តកំពង់ធំ និងកំពង់ឆ្នាំង ដូច្នេះសម្តេចក្រឡាហោមស ខេង ដែលជាប្រធានគណៈកម្មការបង្ក្រាប និងទប់ស្កាត់បទល្មើសលើផ្ទៃបឹងទន្លេសាប និងជារដ្ឋមន្ត្រីក្រសួងមហាផ្ទៃបានសម្រេចកោះអញ្ជើញអភិបាលខេត្តទាំងពីរមកភ្នំពេញ ដើម្បីជួបប្រជុំរកដំណោះស្រាយនៅថ្ងៃទី២៨ មករា ។
ចំពោះខេត្តសៀមរាប បាត់ដំបង ពោធិ៍សាត់ វិញអញ្ជើញត្រឹមអភិបាលរងខេត្តមកចូលរួម ។
មុនដំណើរត្រួតពិនិត្យបទល្មើសនេសាទតាមឧទ្ធម្ភាគចក្រពីសម្តេចក្រឡាហោម ស ខេង គឺកម្លាំងបង្ក្រាបបទល្មើសនេសាទបានចុះទៅត្រួតពិនិត្យសកម្មភាពល្មើសនានា តាំងពីថ្ងៃទី១៧ មករា ដោយរកឃើញអួនដាក់ត្រីជិត១០វង់នៅក្នុងខេត្តក្រចេះ ។
គិតចាប់តាំងពីរដ្ឋាភិបាលបង្កើតគណៈកម្មការបង្ក្រាប និងទប់ស្កាត់បទល្មើសលើផ្ទៃបឹងទន្លេសាបនៅចុងឆ្នាំ២០១៦មក គឺឃាត់មនុស្សបាន៥២នាក់បញ្ជូនទៅតុលាការ រឹបអូសទូក ម៉ាស៊ីន កាណូត ជាង២០គ្រឿង និងដុតបំផ្លាញឧបករណ៍ល្មើសដែលជាស្បៃមុង ឬអួនរាប់ពាន់ម៉ែត្រ ។
សូមរម្លឹកថា សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានព្រមានដកអភិបាលខេត្តនៅជុំវិញបឹងទន្លេសាប បើខេត្តណា នៅតែមានបទល្មើសនេសាទ កើតមានច្រើន ។ សម្តេចបានសង្កត់ធ្ងន់ថា នឹងបន្តសកម្មភាព បង្ក្រាបបទល្មើសនេសាទ ជាលក្ខណៈទ្រង់ទ្រាយធំ ជាបន្តបន្ទាប់ ដើម្បីដោះស្រាយឲ្យបាន នូវបញ្ហាបទល្មើលនេសាទ នៅក្នុងបឹងទន្លេសាបនេះ ។
ការថ្លែងរបស់សម្តេចក្រឡាហោម នៅក្នុងពិធីបិទសន្និបាត បូកសរុបលទ្ធការងារ ប្រចាំឆ្នាំ២០១៦ និងលើកទិសដៅ ឆ្នាំ២០១៧ របស់សាលាខេត្តសៀមរាប កាលពីថ្ងៃទី២៨ ខែធ្នូ ឆ្នាំ២០១៦ កន្លងមក ។
សម្តេចក្រឡាហោម ស ខេង ក៏បានបញ្ជាក់អោយដឹងថា ដើម្បីបង្ក្រាបបទល្មើសនេសាទ នៅក្នុងបឹងទន្លេសាទ ដោយប្រើប្រាស់ ទូកល្បឿនលឿន ប្រភេទរ៉ូយ៉ាល់ ហើយសកម្មភាពនេះ ធ្វើជាប្រចាំ ដោយសម្តេច និងជិះយន្តហោះពិនិត្យមើល ពីខាងលើក្នុង ២សប្តាហ៍ម្តង ឬ១ខែម្តង ។
សូមបញ្ជាក់ថា ថ្ងៃមួយ សម្តេចក្រឡាហោមបានជិះយន្តហោះទៅបាត់ដំបង ដោយឆ្លងកាត់បឹងទន្លេសាប សម្តេចមើលពីលើឃើញថា បទល្មើសនេសាទ មានច្រើន ទាំងនៅកណ្តាលបឹងទន្លេសាប និងព្រៃលិចទឹក នៅជុំវិញ ដែលបញ្ហានេះចាំបាច់ត្រូវឲ្យយើងដោះស្រាយជាបន្ទាន់ ៕
ចែករំលែកព័តមាននេះ