ខេត្តកំពង់ឆ្នាំង ៖ បុរសពិការម្នាក់បានអះអាងថា គាត់ជាអតីយុទ្ធជន ក្នុងជួរកងទព័របស់រាជរដ្ឋាភិបាល តាំងពីសម័យរដ្ឋកម្ពុជា ប៉ុន្តែដោយសារការផ្លាស់ប្តូរទីកន្លែងច្រើនដង និងដោយសារតែប្រពន្ធរត់ចោលទៅយកប្តីថ្មី ឯកសារពាក់ព័ន្ធនឹងការបញ្ជាក់ពីអត្តសញ្ញាណយោធារបស់គាត់បានបាត់អស់គ្មានសេសសល់អ្វីឡើយ ក្រៅតែមានអ្នកដែលធ្លាប់ស្គាល់គាត់ និងធ្លាប់ជាមេបញ្ជាការគាត់ប៉ុណ្ណោះ ដែលបានដឹងប្រវត្តិគាត់ច្បាស់។ នៅលើគ្រែក្រោមផ្ទះធំល្មម បុរសពិការឈ្មោះ ញ៉ែម សុភ័ណ្ឌ អាយុ៥៦ឆ្នាំ មានរៀបរាប់ថា គាត់ជាអតីតមន្ត្រីនៃមន្ទីរឃោសនាការខេត្តកំពង់ឆ្នាំង តហូតដល់ឆ្នាំ១៩៨៦ គាត់បានចេញពីឃោសនាការចូលធ្វើទាហាន ដោយស្ម័គ្រចិត្ត នៅក្នុងអង្គភាព(ង៥០)ចល័ត របស់ក្រសួងការពារប្រទេស ឈរជើងនៅបន្ទាយលង្វែក។
ក្រោយមកគាត់បានចេញទៅធ្វើទាហាននៅកងពល២៣ នៅខេត្តឧត្តរមានជ័យ ដោយរស់នៅជា មួយប្រពន្ធកូននៅទីនោះ។ ក្រោយមកគាត់បានផ្លាស់ចូលរវៈការពារព្រំដែន ឈរជើងនៅប្រាសាទព្រះវិហារ។ កាលណោះនៅឆ្នាំ២០១៣ ប្រពន្ធគាត់ឈ្មោះ សេង គា អាយុ៥០ឆ្នាំ បានចុះចោលគាត់ទៅមានប្តីថ្មី។ ដោយពិបាកចិត្តពេកគាត់បានត្រលប់មករស់នៅជាមួយបងស្រីឈ្មោះ និត សុកាន នៅខេត្តកំពង់ឆ្នាំងវិញ។ ប៉ុន្តែជាអកុសល ក្នុងឆ្នាំដដែលនោះគាត់ជួបគ្រោះថ្នាក់ចរាចរណ៍ ធ្លាក់ខ្លួនពិការដល់សព្វថ្ងៃ។
សព្វថ្ងៃនេះគាត់គ្មានផ្ទះសម្បែង រស់អាស្រ័យលើតែបងស្រីជាអ្នកចិញ្ចឹមប៉ុណ្ណោះ រាប់តាំងពីយកទៅព្យាលនៅមន្ទីរពេទ្យរាជធានីភ្នំពេញក្តី។ ប៉ុន្តែពេលនេះបងស្រីគាត់អស់លទ្ធភាពហើយ រូបគាត់លើកដៃសំពះ សុំអាជ្ញាធរខេត្ត ពិសេសប្រមុខរាជរដ្ឋាភិបាល សូមមេត្តាជួយគាត់ផង ព្រោះសព្វថ្ងៃមិនត្រឹមតែពិការទេមានជំងឺទៀត។ ចំណែកស្ត្រីឈ្មោះ និត សុកាន អាយុ៦០ឆ្នាំ ដែលជាបងស្រីវិញបានប្រាប់ថា ពេលនេះគាត់អស់លទ្ធភាព ហើយ គាត់ក៏សូមអំពាវនាវដល់បងប្អូនសប្បុរសជន និងអ្នកធ្លាប់ជាអតីតមន្ត្រីរាជការ និងទាហាននៅអង្គភាពជាមួយគ្នា សូមជួយគាត់ផងក្រែងបានថវិកាខ្លះព្យាបាលប្អូនគាត់បន្ត។
ទោះបីបែបនេះក្តី បុរសខាងលើគ្មានឯកសារណា ដែលបញ្ជាក់ថា គាត់ជាអតីតយុទ្ធជននោះទេ តែគាត់បានអះអាងថា ឯកឧត្តម អភិបាលខេត្តកំពង់ឆ្នាំងបច្ចុប្បន្ន ក៏ជាអតីតមេបញ្ជាការ របស់គាត់ដែរ រួមនឹងមេបញ្ជាការរងជាច្រើនរូបទៀត សុទ្ធតែស្គាល់គាត់ច្បាស់ទាំងអស់គ្នា៕
ចែករំលែកព័តមាននេះ