រាជធានីភ្នំពេញ ៖ បន្ទាប់ពីចាញ់មួយប្រកួតម្នាក់ នៅថ្ងៃប្រកួតបើកឆាកក្នុងកម្មវិធីសមរភូមិអ្នកប្រយុទ្ធគុនខ្មែរកាលពីសប្ដាហ៍មុនរួចមក យុគ យក្សផ្លែ មកពីក្លិបបុរីរាជសីហ៍មានរិទ្ធ និងម៉ន សាម៉េត មកពីក្លិបការិយាល័យទី៥កងទ័ពជើងគោក មិនដឹងថា មួយណាសម្រេចគោលដៅនោះទេ ពេលជួបកីឡាករថៃនៅថ្ងៃអាទិត្យ ទី២៩ មករា សប្ដាហ៍
នេះ ។
សម្រាប់ការប្រកួតនៅក្នុងសប្ដាហ៍នេះ យុគ យក្សផ្លែ ត្រូវជួបប្រកួតជាមួយកីឡាករថៃឈ្មោះ ផេត ងិនថង ខណៈ ម៉ន សាម៉េត ត្រូវជួបប្រកួតជាមួយកីឡាករថៃឈ្មោះកាំ ឡៃយោគ ។ យុគ យក្សផ្លែ និងម៉ន សាម៉េត ទើបតែរកបានមួយពិន្ទុម្នាក់ប៉ុណ្ណោះ ព្រោះប្រកួតលើកទី១ សុទ្ធតែចាញ់ពិន្ទុកីឡាករថៃដូចគ្នា ។ ចំណែកលើកនេះ ទាំងយុគ យក្សផ្លែ និងម៉ន សាម៉េត ហាក់មានសង្ឃឹមតិចណាស់ ព្រោះថា កីឡាករថៃទាំង២រូបនេះសុទ្ធតែជាជើងខ្លាំងដែលមានប្រវត្តិប្រកួតមិនធម្មតាឡើយ ។
យុគ យក្សផ្លែ ធ្លាប់ប្រកួត១៣០ដង ឈ្នះ១១២ដង ចាញ់១៥ដង ស្មើ៣ដង ចំណែកកីឡាករថៃ ផេត ងិនថង ធ្លាប់ប្រកួត៨៧ដង ឈ្នះ៧៤ដង ចាញ់១១ដង ស្មើ២ដង ។ យោងតាមប្រវត្តិប្រកួតទើបធ្វើឱ្យអ្នកគាំទ្រភាគច្រើនមិនសូវមានជំនឿចិត្តលើ យុគ យក្សផ្លែ ប៉ុន្មានទេ ។
ចំណែកម៉ន សាម៉េត វិញ ធ្លាប់ប្រកួត១០២ដង ឈ្នះ៨៧ដង ចាញ់១២ដង ស្មើ៣ដង និងធ្លាប់ផ្ដួលគូប្រកួតឱ្យសន្លប់បាន៥៥ដង ក្នុងពេលកីឡាករថៃ កាំ ឡៃយោគ ធ្លាប់ប្រកួត៩៨ដង ឈ្នះ៧៩ដង ចាញ់១៦ដង និងស្មើ៣ដង ។ គូនេះបើទោះជា ម៉ន សាម៉េត មានប្រវត្តិប្រកួតច្រើនជាងមែន ប៉ុន្តែបើចង់យកឈ្នះប្រហែលជាមិនងាយឡើយ ។ កាំ ឡៃយោគ ទាំងកម្លាំង និងល្បិចប្រយុទ្ធ គឺល្អខ្លាំងណាស់ ដូច្នេះគេខ្លាចតែម៉ ន សាម៉េត មិនអាចស៊ូរួចជាមួយកីឡាករថៃបាន៥ទឹកពេញផងក៏មិនដឹង ។
ដោយឡែកគូប្រកួតមិត្តភាពធម្មតាវិញ កីឡាករ ឃន គឹមហេង មកពីក្លិបតាព្រហ្មមានជ័យ ប្រកួតជាមួយកីឡាករ លីន វិរៈ មកពីក្លិបបុរីរាជសីហ៍មានរិទ្ធ និងកីឡាករ សូត្រ ខេវិន មកពីក្លិបបក្សីស្លាបដែក ប្រកួតជាមួយកីឡាករ ឡុង សុភ័ស្ស មកពីក្លិបសាលវ័ន្តកីឡា ៕
ចែករំលែកព័តមាននេះ