រាជធានីភ្នំពេញ ៖ របរលក់ចំណីតាមរទេះគឺមានស្ទើរគ្រប់ទីកន្លែងនៅតាមដងផ្លូវក្នុងរាជធានីភ្នំពេញ។ មានតែរទេះមួយ ជួយឱ្យអ្នកលក់មានប្រាក់ចំណូលមធ្យម អាចប្រកបរបររកស៊ីបានយ៉ាងស្រួល ថែមទាំងចំណាយទុនតិច ប៉ុន្តែ
រាជធានីភ្នំពេញ ៖ របរលក់ចំណីតាមរទេះគឺមានស្ទើរគ្រប់ទីកន្លែងនៅតាមដងផ្លូវក្នុងរាជធានីភ្នំពេញ។ មានតែរទេះមួយ ជួយឱ្យអ្នកលក់មានប្រាក់ចំណូលមធ្យម អាចប្រកបរបររកស៊ីបានយ៉ាងស្រួល ថែមទាំងចំណាយទុនតិច ប៉ុន្តែចំណូលច្រើនគួរសមអាចដោះស្រាយជីវភាពគ្រួសារបាន ។ ការលក់ទាំងនោះមានដូចជា គុយទាវ បបរ មីឆា នំបញ្ចុក បុកល្ហុង និងគ្រឿងភេសជ្ជៈផ្សេងៗ ។
បុរសលក់បបរតាមផ្លូវម្នាក់ឈ្មោះ ចំណា សោណា បានចំណាយដើមក្នុងមួយថ្ងៃអស់១២ ទៅ១៣ម៉ឺនរៀល ប៉ុន្តែអាចលក់បានប្រាក់មកវិញក្នុងមួយថ្ងៃដល់២០ម៉ឺនរៀល ។ លោកនិយាយថា ៖ « លក់អីចឹងស្រួលម្យ៉ាងដែរ ព្រោះយើងអាចចល័តបានគ្រប់ទីកន្លែង។ កន្លែងណាមិនដាច់ យើងជិះទៅលក់នៅកន្លែងផ្សេងទៀត ហើយមិនអស់លុយថ្លៃជួលហាង ឬទិញតុកៅអីឡើយ » ។
បុរសសំបុរស្រអែមរូបនេះបន្តថា លោកបានទិញរទេះរុញអស់១៨៥ដុល្លារ ដោយមិនរាប់ទាំងម៉ូតូទេ ដោយសារលោកមានម៉ូតូហើយ ដូច្នេះ គ្រាន់តែទិញរទេះប៉ុណ្ណោះ ។ បន្ទាប់មក ត្រូវទិញសម្ភារទុកយកទៅលក់ដូចជា ចានស្នោ វែក ក្រឡដាក់គ្រឿង និងគ្រឿងធ្វើបបរថែមទៀត ។ ក្នុងមួយថ្ងៃ អ្នកមកពីខេត្តព្រៃវែងរូបនេះត្រូវលក់តាំងពីម៉ោង៦ព្រឹក រហូតដល់ម៉ោង៤ឬ៥ល្ងាចទើបចូលផ្ទះ និងបានប្រាក់ប្រហែល២០ម៉ឺនរៀល ។
លោកបញ្ជាក់ថា មុខរបរលក់បបរតាមផ្លូវនេះ ឥឡូវពេញនិយមណាស់ ហើយងាយរកស៊ីទៀតផង ព្រោះទាំងអ្នកធ្វើការ សិស្ស-និស្សិត កម្មករ គេហៅទិញមិនប្រកាន់ឡើយ។
ចំណែកអ្នកលក់គូឆាយតាមរទេះម្នាក់ទៀត ប្រាប់ថា នាងបានចំណាយទិញរទេះអស់១០០ដុល្លារ និងសម្ភារអស់៥០ដុល្លារថែមទៀត គឺលក់គូឆាយបានហើយ ។ អ្នកលក់ទឹកមុខប្រិមប្រិយ ដែលគ្រប់គ្នាតែងហៅថា អាធី បន្តថា ក្នុងមួយថ្ងៃ កញ្ញាអាចលក់បាន១០០ដុំ ចាប់លក់ពីម៉ោង២ថ្ងៃ រហូតដល់ម៉ោង៦កន្លះល្ងាច ដោយប្រើទុនប្រចាំថ្ងៃអស់៥ម៉ឺនរៀល ហើយជួនកាល លក់ដាច់បាន១០ម៉ឺនរៀល អីចឹងគឺចំណេញបានពាក់កណ្តាល ។
អ្នកលក់គូឆាយរូបនេះប្រាប់ថា ៖ « ឥឡូវនេះ អ្នកមានដើមទុនល្មមៗអី គេនាំគ្នាលក់តែចំណីតាមរទេះទេ ព្រោះវាស្រួល មិនសូវចំណាយច្រើន ហើយចំណេញលើយើងទាំងអស់តែម្តង មិនចាំបាច់ផាត់ថ្លៃជួលហាង តុកៅអី ឬជួលបុគ្គលិកឡើយ » ។
សម្រាប់យុវជនឈ្មោះ តៅ ហេងឡុង សិស្សថ្នាក់ទី១០ នៅវិទ្យាល័យព្រះយុគន្ធរ ប្រាប់ថា ខ្លួនចូលចិត្តហូបចំណីដូចជា មីឆា លតឆា ឬបបរតាមរទេះម៉ូតូ ច្រើនជាងតាមហាងដោយសារវាធូរថ្លៃ ហើយបើនិយាយពីរសជាតិវិញ គឺឆ្ងាញ់ជាងទៀតផង ។
យុវជនរូបនេះបន្ថែមថា ៖ « អាហារសម្រន់ភាគច្រើន ពេលខ្លះរវល់ បើជិះតាមផ្លូវឃើញបបរ ឬលតឆាលក់តាមផ្លូវ គឺទិញហើយ ព្រោះចំណីទាំងនេះធូរថ្លៃ ហើយឆ្ងាញ់ជាងកន្លែងលក់មានដាក់តុកៅអីត្រៀបត្រា ។ មីឆាតាមរទេះមួយប្រអប់ត្រឹមតែ៣.០០០រៀលហូបបានហើយ តែបើចូលហាងវិញ គឺ២ដុល្លារឯណោះ » ។
ចំណែករឿងអនាម័យវិញ យុវជន ហេងឡុង ឱ្យដឹងថា ក៏អាចទទួលយកបានដូចគ្នា ។ យុវជននេះនិយាយថា ៖ « ពីមុនគេគិតថា ចំណីនៅតាមផ្លូវមិនស្អាត មិនគួរទទួលទាន តែឥឡូវមិនអីចឹងទេ ឲ្យតែឆ្ងាញ់ហើយថោក មិនថាអ្នកមាន អ្នកក្រ អ្នកធ្វើការ ឬកម្មករទេ គឺសុទ្ធតែទិញហូបទាំងអស់គ្នា » ។
ទាក់ទងនឹងបញ្ហាអនាម័យនេះដែរ អ្នកលក់ទាំងអស់គួរតែមានការគ្របនំចំណីទាំងនោះឱ្យជិត ចៀសវាងដីហុយចូល សត្វរុយទំ ដែលនាំឱ្យប៉ះពាល់ដល់សុខភាពអ្នកទទួលទាន ៕
ចែករំលែកព័តមាននេះ