រាជធានីភ្នំពេញ ៖ ស្ថិតនៅក្នុងវ័យ២២ឆ្នាំ កីឡាករ ពេជ្រ ម្ទេសខ្មាំង មកពីក្លិបអារុណរះកីឡា បានធ្វើឱ្យអ្នកទស្សនាផ្ទាល់នៅលើសង្វៀនភីអិនអិន មានការចាប់អារម្មណ៍យ៉ាងខ្លាំង ហើយត្រូវបានគេប្រសិទ្ធនាមឱ្យថា ជាកំពូលអ្នកប្រដាល់ប្រចាំសង្វៀនភីអិនអិនទៀតផង ។
តាមពិតកេរ្តិ៍ឈ្មោះរបស់កីឡាកររូបនេះ ល្បីល្បាញជាយូរមកហើយ ប៉ុន្តែមានអ្នកតាមដានការប្រកួតមួយចំនួនមិនទាន់ស្គាល់ពីថ្វីដៃប្រកួតរបស់គេច្បាស់លាស់នៅឡើយ ជាពិសេសអ្នកនៅម្ដុំគល់ស្ពានព្រែកព្នៅតែម្ដង ដោយពួកគេខ្លះធ្លាប់ឮតែឈ្មោះប៉ុណ្ណោះ ។ ប៉ុន្តែក្រោយពីកីឡាកររូបនេះ ប្រកួត២លើកនៅក្នុងកម្មវិធីដណ្ដើមខ្សែក្រវាត់គោជល់ប្រភេទទម្ងន់៥៧គីឡូក្រាម ផ្ដួលកីឡាករថៃឱ្យសន្លប់នៅលើសង្វៀនទាំង២លើកជាប់គ្នារួចមកនោះ ធ្វើឱ្យអ្នកតាមដានការប្រកួតនៅទីនោះមានការចាប់អារម្មណ៍កាន់តែខ្លាំង ។
ពេជ្រ ម្ទេសខ្មាំង កម្ពស់១,៦៥ម៉ែត្រ ធ្លាប់ប្រកួត៨២ដង ចាញ់តែ៩ដង និងស្មើ១ដង ធ្លាប់ផ្ដួលគូប្រកួតឱ្យសន្លប់នៅលើសង្វៀនបាន១៨ដង ។ មិនតែប៉ុណ្ណោះគេជាម្ចាស់មេដាយមាសកីឡាជាតិឆ្នាំ២០១៦ ក្នុងប្រភេទទម្ងន់៥៧គីឡូក្រាម ។ ចាប់តាំងពីគេចាប់យកអាជីពជាអ្នកប្រដាល់ក្បាច់គុនបុរាណខ្មែរមក ពេជ្រ ម្ទេសខ្មាំង មិនដែលទទួលបានចំណាត់ថ្នាក់ជាម្ចាស់ខ្សែក្រវាត់នៅតាមស្ថានីយទូរទស្សន៍មួយណានោះទេ ។ ដោយឡែកនៅក្នុងកម្មវិធីប្រកួតសមរភូមិអ្នកប្រយុទ្ធជើងឯកគោជល់នាឱកាសនេះ ពេជ្រ ម្ទេសខ្មាំង ត្រូវបានគេព្យាករទុកមុនថា នឹងអាចដណ្ដើមយកតំណែងជាម្ចាស់ខ្សែក្រវាត់មួយនេះបានមិនក្រោម៩០%នោះទេ បើទោះជាគូប្រកួតរបស់គេដែលជាកីឡាករថៃទាំង៤រូបនោះ សុទ្ធតែជាជើងខ្លាំងពិបាកបង្ក្រាបយ៉ាងណាក្តី ។
កាលពីសប្ដាហ៍មុន ពេជ្រ ម្ទេសខ្មាំង បានផ្តល់បទសម្ភាសន៍ជាមួយស្ថានីយទូរទស្សន៍ភីអិនអិន ដោយបានប្រកាសក្ដែងៗថា ខ្លួនពិតជាទទួលស្គាល់ថា គូប្រកួតរបស់គេទាំង៤រូបសុទ្ធតែជាជើងខ្លាំងដែលមានបទពិសោធន៍ប្រកួតនៅលើសង្វៀនយ៉ាងជោកជាំ ប៉ុន្តែខ្លួននឹងមិនធ្វើឱ្យអ្នកគាំទ្រខកបំណងឡើយ ។ ម្យ៉ាងវិញទៀតទម្លាប់របស់ខ្លួនបើឈានជើងឡើងសង្វៀនហើយ ត្រូវតែប្រយុទ្ធឱ្យដឹងសខ្មៅ មិនខ្វល់ថា គូប្រកួតរបស់ខ្លួនខ្លាំងប៉ុណ្ណានោះទេ ។ ជាការពិតគ្រាន់តែឈានជើងឡើងសង្វៀនភីអិនអិនតែ២ប្រកួតប៉ុណ្ណោះ ពេជ្រ ម្ទេសខ្មាំង ត្រូវបានអ្នកគាំទ្រភាគច្រើនចាត់ទុកជាអាយដលរបស់ពួកគេរួចទៅហើយ ព្រោះថា ឱ្យតែដល់វេនកីឡាកររូបនេះឡើងប្រកួតម្ដងៗ មានអ្នកគាំទ្រចូលរួមទស្សនាស្ទើរតែរកកន្លែងអង្គុយលែងបាន ។
គួររំលឹកថា ពេជ្រ ម្ទេសខ្មាំង សព្វថ្ងៃនេះមិនត្រឹមតែជាកីឡាករប្រដាល់ផ្នែកក្បាច់គុនបុរាណខ្មែរប៉ុណ្ណោះនោះទេ ថែមទាំងជាកីឡាករប្រដាល់សាកលក្នុងក្រុមជម្រើសជាតិទៀតផង ៕
ចែករំលែកព័តមាននេះ