សហព័ន្ធកីឡាទូកក្តោងកម្ពុជានិយាយពីការចូលរួមព្រឹត្តិការណ៍ Windsurfing Championship នៅថៃ

ថ្ងៃទី ២៤ ខែ មករា ឆ្នាំ ២០១៧
ម៉ោង ០៣:០៣
bopha bopha

ប្រទេសថៃ ៖ កាលពីថ្ងៃទី២០ រហូតដល់ថ្ងៃទី២៣ មករា កីឡាករទូកក្ដោងកម្ពុជា បានចូលរួមព្រឹត្តិការណ៍ Windsurfing Championship (ការប្រកួតទូកក្ដោងអន្តរជាតិ) នៅឆ្នេរសមុទ្រជំទៀន ទីក្រុងប៉ាតាយ៉ា ប្រទេសថៃ ។ ព្រឹត្តិការណ៍នេះ ក៏មានការបង្ហាញខ្លួនពីសំណាក់កីឡាករ-កីឡាការិនីដែលសុទ្ធសឹងតែជាម្ចាស់មេដាយនៅក្នុងព្រឹត្តិការណ៍ស៊ីហ្គេម និងអាស៊ីហ្គេមមកពីបណ្តាប្រទេសអាស៊ានទាំង១០ផងដែរ ទើបជារឿងមោទនភាពមួយដែលកីឡាករកម្ពុជាមានឱកាសបង្ហាញខ្លួន និងទទួលបានបទពិសោធន៍ច្រើនពីព្រឹត្តិការណ៍នេះ ។

កីឡាករដែលត្រូវបានសហព័ន្ធកីឡាទូកក្តោងកម្ពុជាបញ្ជូនទៅមានចំនួន២នាក់ គឺកីឡាករ ហៀង ស៊ុនហេង អាយុ១៤ឆ្នាំ និងកីឡាករ សូត្រ មេសា អាយុ១៤ឆ្នាំ ដែលសុទ្ធតែជាជើងខ្លាំងនៅក្នុងការប្រកួតទូកក្ដោងនាពេលកន្លងមក ។ អ្នកទាំងពីរតំណាងឱ្យកម្ពុជាពេញរយៈពេល៣ថ្ងៃ ដោយក្នុងមួយថ្ងៃត្រូវប្រកួត៣ជុំ តាំងពីម៉ោង១រសៀលតទៅជារៀងរាល់ថ្ងៃ ។

កីឡាករទាំងពីរត្រូវបានចាត់ឈ្មោះឱ្យចូលរួមប្រកួតក្រោយពេលបញ្ចប់ការហ្វឹកហាត់ និងផ្លាស់ប្តូរបទពិសោធន៍ជាមួយកីឡាករជម្រើសជាតិថៃនៅប៉ាតាយ៉ា បានត្រឹមរយៈពេលមួយខែជាលើកទីពីរមុនព្រឹត្តិការណ៍ ។

មន្ត្រីអ្នកដឹកនាំការប្រកួតបញ្ជាក់ថា កីឡាករឆ្នើមទាំងពីរ គឺជាកម្លាំងស្នូលរបស់សហព័ន្ធកីឡាទូកក្ដោងកម្ពុជា ហើយក្រោយការហ្វឹកហាត់នឹងមានឱកាសចូលរួមប្រកួតជាលក្ខណៈអន្តរជាតិជាបន្តបន្ទាប់ជាមួយនឹងបរទេស ។ ជាក់ស្ដែងមុនពេលទៅប្រកួតនៅក្នុងប្រទេសថៃ ក្រុមកម្ពុជាបានទៅប្រកួតជម្រុះជាមួយក្រុមមួយចំនួននៅប្រទេសសិង្ហបុរី កាលពីថ្ងៃទី១១ ដល់ទី១៥ មករា ឆ្នាំ២០១៧ ជុំទី១០ ។ កីឡាករ ហៀង ស៊ុនហេង បានយកឈ្នះកីឡាករមកពីប្រទេសឥណ្ឌា ដែលធ្លាប់ហ្វឹកហាត់ និងចូលរួមប្រកួតរយៈពេលបីឆ្នាំមកហើយ ។ នេះជាការដកស្រង់បទពិសោធន៍ពីកីឡាករជើងឯកជារៀមច្បងផង និងជាឱកាសក្នុងការត្រៀមរៀបចំខ្លួនដើម្បីដណ្ដើមយកពានរង្វាន់ពីប្រទេសក្នុងតំបន់ក៏ដូចជាការឈានទៅដល់ការដណ្ដើមយកពានរង្វាន់ផ្សេងៗទៀតផងដែរ ។

មន្ត្រីសហព័ន្ធបានអះអាងថា តាំងពីដើមឆ្នាំ២០១៧មក សហព័ន្ធទូកក្ដោងកម្ពុជា រៀបចំឱ្យកីឡាករជើងខ្លាំងទាំងពីរហ្វឹកហាត់ពង្រឹងសមត្ថភាព និងឱ្យចូលប្រកួតជាអន្តរជាតិកាន់តែច្រើន ដើម្បីបណ្ដុះពួកគេឱ្យក្លាយជាធនធានកីឡាករពិតប្រាកដនៅពេលកម្ពុជាក្លាយជាម្ចាស់ផ្ទះសម្រាប់ព្រឹត្តិការណ៍ស៊ីហ្គេម២០២៣ ដែលកម្ពុជាត្រូវការដណ្ដើមមេដាយឱ្យបានច្រើនជាងគេក្នុងនាមជាអ្នករៀបចំព្រឹត្តិការណ៍នោះ ។

លោក ថោង រដ្ឋស័ក្តិ អនុប្រធានសហព័ន្ធបានអះអាងថា វត្តមានរបស់កីឡាករកម្ពុជាទៅប្រកួតនៅក្នុងប្រទេសថៃ គឺជាការឆ្លើយតបតាមការអញ្ជើញរបស់សហព័ន្ធកីឡាទូកក្តោងសិង្ហបុរី ដែលស្នើឱ្យកម្ពុជាទៅចូលរួមប្រកួតកីឡាទូកក្តោងលើកទី៣៦ ដែលមានឈ្មោះថា 36Th Singapore Open Windsurfing Championship នៅប្រទេសសិង្ហបុរី ចាប់ពីថ្ងៃទី១១ ដល់ថ្ងៃទី១៥ ខែមករា ឆ្នាំ២០១៧ ជាលក្ខណៈអន្តរជាតិ ដែលមានកីឡាករចូលរួមចំនួន១០០នាក់ មកពីបណ្តាប្រទេសផ្សេងៗនៅលើពិភពលោក និងបន្តទៅប្រកួតនៅក្នុងប្រទេសថៃ ជាជំហានបន្ទាប់ទៀតកាលពីថ្ងៃទី២០ រហូតដល់ថ្ងៃទី២៣ មករា ។ លោកថា សម្រាប់ព្រឹត្តិការណ៍ដែលបានធ្វើឡើងនៅក្នុងប្រទេសសិង្ហបុរី គឺជាលើកទី១ ដែលកម្ពុជាមានឱកាសបានចេញប្រកួតជាអន្តរជាតិ និងជាលើកទី២ សម្រាប់សហព័ន្ធកីឡាទូកក្តោងកម្ពុជាទៅប្រកួតជាលក្ខណៈអន្តរជាតិនៅក្នុងប្រទេសថៃ ។

លោកថា សហព័ន្ធកីឡាទូកក្តោងកម្ពុជា ក៏បានបញ្ជូនកីឡាករមួយរូបទៀតដែលមានឈ្មោះ ឌុច ប៊ុនធឿន ទៅចូលរួមប្រកួតទូកក្តោងប្រភេទ Laser 470 ក្នុងពេលទៅប្រកួតនៅក្នុងប្រទេសសិង្ហបុរីផងដែរ ដើម្បីពង្រឹងសមត្ថភាពកីឡាករកម្ពុជាលើឆាកអន្តរជាតិ ។ សហព័ន្ធកីឡាទូកក្តោងកម្ពុជា ទើបតែបានកកើតកាលពីថ្ងៃទី១៥ ខែសីហា ឆ្នាំ២០១៥ គឺមានអាយុទើបតែជាង១ឆ្នាំ៤ខែប៉ុណ្ណោះ ប៉ុន្តែលោកថា សហព័ន្ធទទួលបានលទ្ធផលល្អគួរឲ្យកត់សម្គាល់ បើទោះជាមានអាយុកាលក្មេងខ្ចីជាងគេ បើធៀបនឹងប្រទេសផ្សេងទៀត ក្នុងតំបន់ដែលមានកីឡាប្រភេទនេះច្រើនឆ្នាំមកហើយ ។

លោកថា កន្លងមក សហព័ន្ធកីឡាទូកក្តោងកម្ពុជាធ្លាប់តែបញ្ជូនកីឡាករទៅហ្វឹកហាត់នៅក្រៅប្រទេស ដើម្បីផ្លាស់ប្តូរបទពិសោធន៍ជាមួយកីឡាករជម្រើសជាតិនៅក្នុងប្រទេសថៃ និងប្រទេសផ្សេងៗប៉ុណ្ណោះ ទើបលោកចាត់ទុកថា គឺជាផ្លែផ្កាល្អមួយដែលកម្ពុជាមានឱកាសបានប្រកួតជាលក្ខណៈស្ទាបស្ទង់សមត្ថភាពផ្លូវការនៅក្នុងប្រទេសថៃ ដែលទើបបញ្ចប់កាលពីថ្ងៃទី២៣ មករា នៅទីក្រុងប៉ាតាយ៉ា ។ យ៉ាងណាក៏ដោយ លោកបានទទួលស្គាល់ថា កីឡាករកម្ពុជានៅមិនទាន់មានឱកាសដណ្ដើមបានមេដាយពីការប្រកួតជាអន្តរជាតិទាំង២លើកនោះនៅឡើយទេ តែសម្រាប់បទពិសោធន៍ និងបច្ចេកទេសដែលកីឡាករកម្ពុជាទទួលបាន គឺច្រើន ហើយមុតស្រួចដែលអាចប្រែក្លាយជាធនធានកីឡាករឆ្នើមដោយមិនលំបាកនាពេលអនាគត ។ លោកក៏ប្រកាសនាំយកកីឡាករកម្ពុជា ទៅហ្វឹកហាត់យកជំនាញបន្ថែមឱ្យបានខ្លាំងក្លា ដើម្បីឡើងប្រកួតនៅក្នុងព្រឹត្តិការណ៍ដទៃផងដែរ ជាមួយនឹងការរំពឹងថា ការបង្ហាញខ្លួនលើកក្រោយៗរបស់កម្ពុជាពិតជាដណ្ដើមបានមេដាយជូនជាតិ ៕