ខេត្តកំពង់ស្ពឺ ៖ រថយន្តម៉ាកតូពិច ស៊េរីចាស់កែច្នៃ០១គ្រឿង ដែលបានដឹកឈើប្រភេទម្រេញ ឬហៅរាជថ្កុល ចំនួន១៤ដុំ ម្រុងយកទៅលក់ឱ្យមេឈ្មួញធំ ស្តុបនៅម្តុំផ្សារក្រាំងចេក ប៉ុន្តែសំណាងមិនល្អ ក៏ជាប់អន្ទាក់កម្លាំងមន្ត្រីជំនាញការិយាល័យដែនជម្រកសត្វព្រៃភ្នំឱរ៉ាល់ ប៉ុន្តែគួរឱ្យស្តាយ រថយន្ត០២គ្រឿងផ្សេងទៀតត្រូវតៃកុងបើករត់គេចខ្លួនបាត់ស្រមោល ។
ការបង្ក្រាបរថយន្តដឹកឈើខាងលើនេះ បានកើតឡើងកាលពីយប់ថ្ងៃទី១៩ ខែសីហា ឆ្នាំ២០២២ នៅចំណុចភូមិតាគ្រាំង ឃុំតាសាល ស្រុកឱរ៉ាល់ ខេត្តកំពង់ស្ពឺ ។
បើតាមមន្ត្រីជំនាញបរិស្ថានដែនជម្រកសត្វព្រៃភ្នំឱរ៉ាល់ បាននិយាយឱ្យដឹងថា រថយន្តដឹកឈើពេញដែលបង្ក្រាបបាននោះ ជាប្រភេទរថយន្តម៉ាកតូពិច ស៊េរីចាស់ ពណ៌ខៀវ គ្មានពាក់ផ្លាកលេខនោះទេ ។
មន្ត្រីជំនាញបរិស្ថានបានបន្ថែមទៀតថា ដំបូងគឺមានការរាយការណ៍មកថា មានរថយន្តដឹកឈើឆ្លងកាត់ស្នាក់ការ ។ ក្រោយពីទទួលបានព័ត៌មានភ្លាម កម្លាំងជំនាញរៀបចំកម្លាំងធ្វើការបង្ក្រាបបានតែម្តង ដោយក្នុងរថយន្តនោះមានឈើជ្រុងឡាំងរួច ចំនួន១៤កំណាត់ ដែលមានមុខកាត់ចាប់ពី៣០ ទៅ៥០ជុំ ប្រវែង៣ម៉ែត្រ ដោយបានដាក់បង្កប់ក្នុងអុសពេញប្រៀបតែម្តង ហើយចំនួនឈើនៅក្នុងរថយន្ត កម្លាំងជំនាញនៅមិនទាន់បានធ្វើការវាស់វែងនោះឡើយ ។
ប្រភពដដែលបន្តថា ការបង្ក្រាបរថយន្តដឹកឈើខាងលើនេះ គឺមានការយកចិត្តទុកដាក់ពី លោក ហ៊ុល ម៉ារ៉ា ប្រធានការិយាល័យដែនជម្រកសត្វព្រៃភ្នំឱរ៉ាល់ នៃមន្ទីរបរិស្ថានខេត្តកំពង់ស្ពឺ លោកបានដាក់បទបញ្ជាឲ្យលោក ហម សុខចាន់ ជានាយរងការិយាល័យដែនជម្រកសត្វព្រៃភ្នំឱរ៉ាល់ ដឹកនាំមន្ត្រីចុះធ្វើការទប់ស្កាត់ និងឈានដល់ការបង្ក្រាបរថយន្តដឹកឈើម្រេញពេញមួយរថយន្ត ដោយមានម៉ាក តូពិច ពណ៌ខៀវ ប្រភេទរថយន្តកែច្នៃគ្មានផ្លាកលេខ ដោយពុំស្គាល់ម្ចាស់រថយន្តនោះឡើយ ដោយសារភ្លាមៗនោះ ដោយម្ចាស់រថយន្ត (តៃកុង) បានរត់គេចខ្លួនបាត់ស្រមោល ដោយបន្សល់តែរថយន្តប៉ុណ្ណោះ ។
លោក ហ៊ុល ម៉ារ៉ា ប្រធានការិយាល័យដែនជម្រកសត្វព្រៃភ្នំឱរ៉ាល់ នៃមន្ទីរបរិស្ថានខេត្តកំពង់ស្ពឺ បន្តថា ក្រោយពីបង្ក្រាប និងធ្វើការរឹបអូសរថយន្ត០១គ្រឿងខាងលើ ស្ថិតក្នុងភូមិតាគ្រាំង ឃុំតាសាល ស្រុកឱរ៉ាល់ ខេត្តកំពង់ស្ពឺ ដើម្បីយកមករក្សារទុកនៅដែនជម្រកសត្វព្រៃភ្នំឱរ៉ាល់ ដោយរត់ចាំធ្វើការវាស់វែងនៅពេលក្រោយ។
តាមការបង្ហើបពីសមត្ថកិច្ច ក្នុងស្រុកឱរ៉ាល់ថា រថយន្តដឹកឈើដែលកម្លាំងជំនាញធ្វើការបង្ក្រាបបាន០១គ្រឿង ហើយរត់គេចអស់០២គ្រឿងចូលព្រៃបាត់នោះ ជារថយន្តរបស់ឈ្មោះ តាជន់ (ហៅតាចុន) ប្រពន្ធឈ្មោះយាយវិត (ហៅយាយដើមរកា) ដែលបានដឹកជញ្ជូនឈើចេញពីតំបន់ជាំ យកទៅលក់ឱ្យមេឈ្មួញដ៏ធំចាំទទួលទិញនៅម្តុំផ្សារក្រាំងចេក ក្នុងឃុំក្រាំងចេក ស្រុកឧដុង្គ ខេត្តកំពង់ស្ពឺ មានឈ្មោះ ឌឹម សុភ័ណ្ឌ (ហៅគ្រលីងគ្រលោង) ដែលមានឈ្មោះល្បីជាច្រើនឆ្នាំមកហើយ ដែលសមត្ថកិច្ចមិនដែលបង្ក្រាបមេឈ្មួញនេះបានម្តងណាឡើយ។ ខណៈពេលដែលការដឹកជញ្ជូនឈើពីតំបន់ជាំ ក្នុងឃុំតាសាល ស្រុកឱរ៉ាល់ ឆ្លងកាត់ស្នាក់ការសមត្ថកិច្ចជាច្រើនស្ថាប័ន ឆ្លងកាត់ស្រុកថ្ពង ទើបទៅដល់កន្លែងស្តុបទុករបស់មេឈ្មួញធំ នៅក្នុងស្រុកឧដុង្គ ។
គួររំលឹកផងដែរថា ក្រោយពីមន្ត្រីជំនាញបានធ្វើការយករថយន្តដឹកឈើចូលក្នុងការិយាល័យដែនជម្រកសត្វព្រៃភ្នំឱរ៉ាល់រួចមក មានប្រភពបែកធ្លាយព័ត៌មានមកថា ក្រុមឈ្មួញឈើខាងលើ មានរថយន្តរហូតដល់ទៅ០៣គ្រឿងឯណោះ សម្រាប់ជាមធ្យោបាយធ្វើសកម្មភាពដឹកជញ្ជូនបទល្មើសព្រៃឈើផងដែរ។
ព័ត៌មានពិស្តារនឹងមានផ្សាយជូននៅពេលក្រោយបន្តទៀត ។
ចែករំលែកព័តមាននេះ