ខេត្តកំពង់ធំ ៖ ស្ត្រីអភ័ព្វដែលត្រូវប្តីស្លាប់ចោល២៣ឆ្នាំមកហើយ បានបន្សល់ទុកកូនស្រី៤នាក់ឱ្យធ្លាក់ខ្លួនមានជម្ងឺដើរមិនរួចម្តងម្នាក់ៗ ហើយត្រូវបានប្តីបោះបង់ចោលទៀត បន្សល់ទុកកូនប្រុសស្រី និងខ្លួនពិការរស់យ៉ាងសែនលំបាកវេទនាជាមួយម្តាយជាស្ត្រីមេម៉ាយ និងជីដូនចាស់ជរា ។ គ្រាន់តែដឹងប៉ុណ្ណោះពិតជាគួរឱ្យសង្វេគទៅហើយ សួរថា តើជីវិតអភ័ព្វនេះ ហេតុអី ព្រហ្មលិខិតដាក់ទោសធ្ងន់ធ្ងរម្ល៉េះ?
ប្រភពព័ត៌មានដែលទទួលបានផ្ទាល់ពីស្ត្រីអភ័ព្វឈ្មោះ រុន ផុន អាយុ៦១ឆ្នាំរស់នៅភូមិពាមគ្រែង ឃុំក្តីដូង ស្រុកកំពង់ស្វាយ បានលើកដៃសំពះរៀបរាប់ប្រាប់កោះសន្តិភាព ទាំងទឹកមុខក្រៀមក្រំនារសៀលថ្ងៃទី២២ មករា ថា អ្នកមីងបានរៀបការជាមួយនឹងស្វាមីឈ្មោះហ៊ឹម សុខ បើគិតរហូតមកដល់ពេលនេះមានអាយុ៦៦ឆ្នាំ ។
ចំណងអាពាហ៍ពិពាហ៍ជាមួយស្វាមីអ្នកមីងមានកូនប្រុសស្រីចំនួន៩នាក់ ស្រី៧នាក់ និងប្រុស២នាក់ ។ លុះដល់ឆ្នាំ១៩៨៤ ប្តីអ្នកមីងក៏ទទួលមរណៈភាពទៅ ។ អ្នកមីងបន្តរស់នៅជាមួយកូនៗទាំង៩នាក់ និងម្តាយចាស់ជរាឈ្មោះ អៃ មឿន អាយុ៨១ឆ្នាំ ។
អ្នកមីងបន្តថា ការតស៊ូក្នុងឆាកជីវិតជាស្ត្រីមេម៉ាយមិនបានធ្វើឱ្យគាត់ចុះចាញ់ទេ ទីបំផុតកូនប្រុស-ស្រីបានរៀបការបន្តបន្ទាប់អស់៧នាក់ នៅសល់កូនស្រី២នាក់មិនទាន់ការ ។ តែអ្វីដែលគួរឱ្យអាណោចអធ័មនោះ គឺក្នុងចំណោមកូនស្រីទាំង៧នាក់របស់គាត់ មានចំនួន៤នាក់ធ្លាក់ខ្លួនមានជម្ងឺទន់ដៃទន់ជើង ដើរលែងរួច គឺបានត្រឹមតែកិលឡើងជិះរទេះរុញទាំងលំបាកប៉ុណ្ណោះ។ ដោយសារតែកូនស្រីរបស់គាត់មានជំងឺបែបនេះ ប្តីរបស់ពួកគេដែលត្រូវជាកូនប្រសាបានលែងលះគ្នាបន្តបន្ទាប់អស់ចំនួន៣នាក់ដែរ ដោយបានបន្សល់ទុកចៅៗនៅជាមួយគាត់ដែលបន្ថែមនូវបន្ទុកចិញ្ចឹមកាន់តែធ្ងន់ឡើង ។
អ្នកមីងបន្តថា កូនស្រីៗរបស់គាត់ទាំង៤នាក់នេះ មិនមែនពិការតាំងពីកើតមក ឬក៏ពីតូចៗនោះទេ គឺពួកនាងមានជម្ងឺនៅក្នុងអាយុរបស់ពួកគេចាប់ពី២៥ឆ្នាំឡើងទៅ ។ កូនៗពិការទាំង៤នាក់ គួរឱ្យសង្វេគនេះមាន ៖
ទី១-ឈ្មោះ សុខ មុំ អាយុ៤០ឆ្នាំ រៀបការរួចមានកូនស្រីម្នាក់ ត្រូវប្តីលែងចោល ទើបតែស្លាប់ជាង២០ថ្ងៃនេះ ។
ទី២-ឈ្មោះ សុខ រ៉ូ អាយុ៣៨ឆ្នាំ រៀបការរួចមានកូន២នាក់ ប្រុសម្នាក់ស្រីម្នាក់ ត្រូវប្តីរត់ចោលទៀត ។
ទី៣-សុខ ភឿន អាយុ៣០ឆ្នាំ រៀបការរួច មានកូនប្រុសម្នាក់ ក៏ត្រូវប្តីរត់ចោលដែរ ។
ទី៤-ឈ្មោះ សុខ លីដា អាយុ២៧ឆ្នាំ មិនទាន់រៀបការ ក៏ធ្លាក់ខ្លួនពិការទៀត ។
នៅសល់កូនពៅស្រីម្នាក់ទៀត ដោយគាត់ភ័យខ្លាចពិការដែរ បានជន្លៀសឱ្យទៅរស់នៅជាមួយបងប្អូននៅខេត្តផ្សេងទៀតឱ្យឆ្ងាយពីគ្នា។
នៅពេលរៀបរាប់បានបន្តិច អ្នកមីងហាក់អួលណែនដើមកបង្ហូរទឹកភ្នែកនឹកតូចចិត្តនឹងវាសនារបស់ខ្លួនធ្ងន់ហួសហេតុ មិនគួរណា កើតមកជាមនុស្សនឹងគេដែរ បែរជាជួបប្រទះនូវរឿងអកុសលយ៉ាងដូច្នេះសោះ ។ អ្នកមីងតែងគិតថា មានពេលខ្លះចង់តែផឹកថ្នាំបំពុលសម្លាប់ខ្លួនឱ្យផុតសមុទ្រទុក្ខ ប៉ុន្តែដោយសារតែនឹកឃើញកំពុងទទួលបន្ទុកមើលថែជម្ងឺកូនៗទាំង៤ និងមើលថែម្តាយចាស់និងចៅៗ ។
គាត់រៀបរាប់ទៀតថា ពិតជាគ្មានជម្រើសនោះទេ ដែលដីស្រែគោក្របីត្រូវបានលក់អស់គ្មានសល់ យកប្រាក់មកមើលជម្ងឺកូនៗ សង្ឃឹមថានឹងបានជាសះស្បើយបានខ្លះ តែមើលមិនជាទាល់តែសោះ ដែលចុងក្រោយប្រាក់ក៏អស់ ជំពាក់បំណុលគេ ហើយកូនក៏ពិការដដែល។
ដោយសារក្តីអស់សង្ឃឹមក្នុងជិវិតអ្នកមីងមានតែម្រាមដៃ១០លើកឡើងប្រណមថា «សូមសប្បុរសជនក្នុងនិងក្រៅប្រទេស សម្តេច ទ្រង់ឯកឧត្តម លោកឧកញ៉ា លោកជំទាវ មេត្តាជួយឧបត្ថម្ភជាថវិកា សម្ភារដល់ក្រុមគ្រួសារអភ័ព្វរបស់ខ្ញុំផង ដើម្បីឱ្យខ្លួនខ្ញុំមានលទ្ធភាពចិញ្ចឹមកូនៗអភ័ព្វទាំង៤ និងម្តាយចាស់ជរាបន្តទៅទៀត ទំរាំដល់ថ្ងៃស្លាប់ ពីព្រោះរហូតមកដល់ពេលនេះខ្ញុំអស់លទ្ធភាពហើយ កេរអាករទាំងប៉ុន្មានត្រូវបានលក់អស់ដើម្បីព្យាបាលជម្ងឺកូន តែផ្ទុយទៅវិញបានត្រឹមតែប៉ងប្រាថ្នាប៉ុណ្ណោះ» ៕
ចែករំលែកព័តមាននេះ