ខេត្តព្រះសីហនុ ៖ នៅដើមខែមករា ឆ្នាំ២០១៧នេះ នាវាទេសចរណ៍បរទេសខ្នាតយក្សដែលនាំភ្ញៀវទេសចរចូលចតនិងធ្វើទស្សនកិច្ចនៅព្រះរាជាណាចក្រកម្ពុជា មានការកើនឡើង ពិសេសនៅព្រឹកថ្ងៃទី២១ ខែមករា
ខេត្តព្រះសីហនុ ៖ នៅដើមខែមករា ឆ្នាំ២០១៧នេះ នាវាទេសចរណ៍បរទេសខ្នាតយក្សដែលនាំភ្ញៀវទេសចរចូលចតនិងធ្វើទស្សនកិច្ចនៅព្រះរាជាណាចក្រកម្ពុជា មានការកើនឡើង ពិសេសនៅព្រឹកថ្ងៃទី២១ ខែមករា នាវាទេសចរណ៍បរទេសមួយគ្រឿងឈ្មោះ AIDA BELLA បាននាំភ្ញៀវទេសចរចម្រុះជាតិសាសន៍ជិត៣.០០០នាក់ ចូលចតនៅកំពង់ផែអន្តរជាតិក្រុងព្រះសីហនុ ។
លោកវរសេនីយ៍ទោ ង៉ុយ ជៀន នាយប៉ុស្តិ៍នគរបាលច្រកទ្វារអន្តរជាតិក្រុងព្រះសីហនុបានឱ្យដឹងថា នាវាទេសចរណ៍ AIDA BELLA មានសញ្ជាតិអីុតាលី បណ្តោយ២៣០ម៉ែត្រ ទទឹង៣២ម៉ែត្រ និងជម្រៅទឹក៧,៣០ម៉ែត្រ បាននាំភ្ញៀវទេសចរបរទេសចម្រុះជាតិសាសន៍ជិត៣.០០០នាក់ ចូលចតមនៅកំពង់ផែអន្តរជាតិក្រុងព្រះសីហនុ ដើម្បីធ្វើទស្សនកិច្ចរយៈពេល១ថ្ងៃ ក្នុងនោះភ្ញៀវទេសចរចំនួន១.៩៩១នាក់ (ស្រី១.០២៣នាក់) មាន២៥សញ្ជាតិផ្សេងគ្នា និងមាននាវិកសរុបចំនួន៥៩៣នាក់(ស្រី១២០នាក់) មាន២៥សញ្ជាតិ ។
នាវាទេសចរណ៍ AIDA BELLA បាននាំភ្ញៀវទេសចរបរទេសចម្រុះជាតិសាសន៍ចាកចេញពីកំពង់ផែប្រទេសវៀតណាម ចូលចតនៅកំពង់ផែអន្តជាតិក្រុងព្រះសីហនុ នាវេលាម៉ោង៧និង២០នាទីព្រឹកថ្ងៃទី២១ ខែមករា ។ បើតាមការគ្រោងទុក នាវានេះនឹងធ្វើដំណើរចាកចេញពីប្រទេសកម្ពុជាឆ្ពោះទៅកាន់ប្រទេសថៃ នៅវេលាម៉ោង៦ល្ងាចថ្ងៃដដែល។
ភ្ញៀវទេសចរបរទេសដែលធ្វើដំណើរតាមនាវា AIDA BELLA ភាគច្រើនមានវ័យចំណាស់ ហើយភ្ញៀវដែលមានសញ្ជាតិច្រើនជាងគេគឺ អាល្លីម៉ង់ចំនួន១.៧៦៤នាក់ អូស្ត្រាលី ១០៧នាក់ និងក្រៅពីនោះមានភ្ញៀវទេសចរសញ្ជាតិផ្សេងៗទៀត ។
ភ្ញៀវទេសចរបរទេសដែលធ្វើដំណើរតាមនាវាខាងលើ បានទស្សនាកម្សាន្តនៅតាមទីប្រជុំជននានា រមណីយដ្ឋានវប្បធម៌ តំបន់ឆ្នេរមានខ្សាច់សស្អាត ខ្សល់អាកាសបរិសុទ្ធ និងតំបន់នេសាទ ទំនប់រលក ។ ម្យ៉ាងទៀត ឆ្នេរសមុទ្រកម្ពុជាត្រូវបានបញ្ចូលជាក្លិបឆ្នេរស្អាតជាងគេលើសកលលោក ទាក់ទាញភ្ញៀវទេសចរបរទេសមកលេងកម្សាន្តមានការកើនឡើង ពីមួយឆ្នាំទៅមួយឆ្នាំ ។ ដោយសារតែប្រទេសកម្ពុជាមានសុខសុវត្ថិភាព និងមានការអភិវឌ្ឍលើគ្រប់វិស័យ ជាពិសេសខេត្តព្រះសីហនុមានការអភិវឌ្ឍហេដ្ឋារចនា
សម្ព័ន្ធនានាជាបន្តបន្ទាប់ ដែលរាជរដ្ឋាភិបាលកម្ពុជា ចាត់ទុកជាប៉ូលសេដ្ឋកិច្ចយ៉ាងសំខាន់ ក្នុងចំណោមប៉ូលសេដ្ឋកិច្ចមាន រាជធានីភ្នំពេញ ខេត្តសៀមរាប និងខេត្តព្រះសីហនុ ។
ម្យ៉ាងខេត្តព្រះសីហនុជាតំបន់ទេសចរណ៍ធម្មជាតិ មានកោះ៣២ដែលបាននិងកំពុងអភិវឌ្ឍកែលម្អឲ្យក្លាយជាតំបន់ទេសចរណ៍ធម្មជាតិ មានភ្ញៀវទេសចរបរទេសមកលេងកម្សាន្តកើនឡើងគួរឲ្យកត់សម្គាល់មានដូចជា កោះតូច កោះរ៉ុងសន្លឹម និងកោះមួយចំនួនទៀតក្នុងខេត្តព្រះសីហនុ។
សូមបញ្ជាក់ថា កាលពីថ្ងៃទី៧ ខែមករា កន្លងទៅ នាវាទេសចរណ៍ AIDA BELLA នេះ បាននាំភ្ញៀវទេសចរបរទេសចម្រុះជាតិសាសន៍ជិត ៣.០០០នាក់ ចូលចតនៅកំពង់ផែអន្តរជាតិក្រុងព្រះសីហនុ ប្រកបដោយសុវត្ថិភាព ៕
ចែករំលែកព័តមាននេះ