ខេត្តសៀមរាប ៖ កំណាត់ផ្លូវវង់តូចចាប់ពីខាងកើតកសិន្ធុអង្គរវត្ត ដល់ខាងកើតស្រះស្រង់ប្រវែង៣៧៥៨ម៉ែត្រ ដែលរងនូវការខូចខាតដោយអន្លើ ត្រូវបានជួសជុលឡើងវិញទាំងស្រុងដោយអាជ្ញាធរជាតិអប្សរា តាម
ខេត្តសៀមរាប ៖ កំណាត់ផ្លូវវង់តូចចាប់ពីខាងកើតកសិន្ធុអង្គរវត្ត ដល់ខាងកើតស្រះស្រង់ប្រវែង៣៧៥៨ម៉ែត្រ ដែលរងនូវការខូចខាតដោយអន្លើ ត្រូវបានជួសជុលឡើងវិញទាំងស្រុងដោយអាជ្ញាធរជាតិអប្សរា តាមការគ្រោងទុកផ្លូវនេះនឹងរួចរាល់ទាំងស្រុងនៅដើមខែកុម្ភៈ ឆ្នាំ២០១៧ ។
តាមការបញ្ជាក់របស់លោកហេង គឹមឡេង ប្រធាននាយកដ្ឋានទ្រទ្រង់បច្ចេកទេស និងគម្រោងអន្តរវិស័យ ឱ្យដឹងថា៖ «គម្រោងកែលម្អផ្លូវវង់តូចពីខាងកើតកសិន្ធុអង្គរទៅដល់ខាងកើតស្រះស្រង់ គឺត្រូវបញ្ចប់ត្រឹមចំណុចខាងត្បូងស្រះស្រង់សិន ។ ពីមុនផ្លូវនេះមានទទឹងពី៥ម៉ែត្រទៅ៦ម៉ែត្រ តែពេលនេះយើងបានកែលម្អឱ្យមានទទឹងសរុប៩ម៉ែត្រ ដូចផ្លូវពីមុខអង្គរវត្តទៅខ្លោងទ្វារទន្លេអុំដែរ ។
ក្នុងការកែលម្អផ្លូវនេះ គឺត្រូវពង្រីកគ្រឹះរងជាប្រភេទក្រួសក្រហមកម្រាស់២០សង្ទីម៉ែត្រសងខាងឱ្យបានទទឹង៩ម៉ែត្រ បន្ទាប់មកក្រាលគ្រឹះចម្បងពីល្បាយថ្មកម្រាស់១៥សង្ទីម៉ែត្រលើផ្ទៃផ្លូវទាំងមូលដែលមានទទឹង៩ម៉ែត្រនោះ។ ជំហានបន្ត គឺក្រាលកម្រាលប្រភេទ DBST ៦ម៉ែត្រនៅកណ្តាល និង១,៥ម៉ែត្រអមសងខាងជាប្រភេទ SBST ។ បន្ថែមពីនោះ ក៏មានផ្លូវវាងដើមឈើមួយចំនួនដើម្បីរក្សាការពារដើមឈើទាំងនោះទៀតផង» ។
ជាការកត់សម្គាល់ក្នុងអំឡុងពេលនៃការជួសជុលនេះក៏បានបង្កការហុយរំខាន ខ្លះៗដល់ការធ្វើដំណើររបស់ប្រជាពលរដ្ឋ ក៏ដូចជាភ្ញៀវទេសចរដែលទស្សនាតំបន់ឧទ្យានអង្គរ។ ម្យ៉ាងទៀតស្ថានភាពផ្លូវនៅពេលនេះគឺកំពុងចាក់កៅស៊ូ និងរោយកម្ទេចថ្មតាមលក្ខណៈបច្ចេកទេស ដែលចៀសមិនផុតពីការហុយដីដោយអន្លើក្នុងមួយរយៈពេលខ្លី ។
ត្រង់ចំណុចនេះអ្នកជំនាញបានពន្យល់ថា ក្នុងរយៈពេលនៃការចាក់បំពេញកៅស៊ូ ភ្លាមៗយើងមិនអាចឱ្យប៉ះទឹកបានទេ រហូតដល់កៅស៊ូឡើងជ្រាបស្មើសាច់ល្អទើបអាចប៉ះទឹកបាន។ ដូចនេះ ស្ថាប័នជំនាញ អាជ្ញាធរជាតិអប្សរាសូមការអធ្យាស្រ័យ និងការយោគយល់ពីប្រជាពលរដ្ឋ ក៏ដូចជាពីសំណាក់ភ្ញៀវទេសចរទាំងអស់ ដែលបានទៅទស្សនាតំបន់រមណីយដ្ឋានអង្គរ ចំពោះផលលំបាកតិចតួចដែលបង្កឡើងពីការស្ថាបនាផ្លូវនេះ។ ម្យ៉ាងទៀតក្នុងពេល ឆាប់ៗខាងមុខបន្ទាប់ពីចាក់កៅស៊ូរួចរាល់ទាំងស្រុង ផ្លូវនេះនឹងបាត់ហុយ ហើយក្លាយជាផ្លូវមួយដ៏ល្អសម្រាប់ការធ្វើដំណើរ ងាយស្រួលក្នុងការទស្សនាប្រាង្គប្រាសាទប្រកបដោយផាសុកភាព ៕
ចែករំលែកព័តមាននេះ