ខេត្តមណ្ឌលគិរី ៖ អាជ្ញាធរខេត្តមណ្ឌលគិរី កាលពីព្រឹកថ្ងៃទី១៩ សីហា ឆ្នាំ២០២២ បានចុះពិនិត្យមើលស្ថានភាពបង្គោលព្រំដែនលេខ៦០/៣៨ (១) និងធ្វើការសាងសង់ច្រាំងនៅទីតាំងបង្គោលឡើងវិញ ដើម្បីការពារបាក់ច្រាំងបន្តទៀត…
ខេត្តមណ្ឌលគិរី ៖ អាជ្ញាធរខេត្តមណ្ឌលគិរី កាលពីព្រឹកថ្ងៃទី១៩ សីហា ឆ្នាំ២០២២ បានចុះពិនិត្យមើលស្ថានភាពបង្គោលព្រំដែនលេខ៦០/៣៨ (១) និងធ្វើការសាងសង់ច្រាំងនៅទីតាំងបង្គោលឡើងវិញ ដើម្បីការពារបាក់ច្រាំងបន្តទៀត ដែលនឹងធ្វើឱ្យបង្គោលព្រំដែនដួលរលំធ្លាក់ចូលទឹក រវាងព្រំដែនកម្ពុជា-វៀតណាម ស្ថិតនៅភូមិសាស្ត្រស្រុកកែវសីមា ដែលរងផលប៉ះពាល់ដោយជំនន់ទឹកភ្លៀងនាពេលកន្លងមក ។
លោក សាយ ម៉េងគីម អភិបាលខេត្តស្តីទីបានឲ្យដឹងថា ដោយមានការណែនាំពីសំណាក់ឯកឧត្តម ថង សាវុន អភិបាលខេត្តមណ្ឌលគិរី ដើម្បីឲ្យក្រុមការងារចុះពិនិត្យស្ថានភាពបង្គោលព្រំដែន នៅតាមបណ្តោយខ្សែបន្ទាត់ព្រំដែន ក្នុងនោះ មានបង្គោលព្រំដែនលេខ៦០/៣៨ (១) ដែលហូរច្រោះបាក់ស្រុតដីនៅជិតបង្គោល ដើម្បីធ្វើយ៉ាងណា ឱ្យមន្ត្រីជំនាញ សហការជាមួយកងកម្លាំង ក្នុងការរៀបចំសាងសង់ និងលុបច្រាំងនៅទីតាំងបង្គោលឡើងវិញ ដើម្បីការពារបាក់ច្រាំងបន្តទៀត។
លោកក៏បានណែនាំដល់កងកម្លាំងដែលកំពុងឈរជើងតាមបន្ទាត់ខ្សែបន្ទាត់ព្រំដែនកម្ពុជា- វៀតណាម ត្រូវបន្តចូលរួមទប់ស្កាត់បង្ក្រាបបទល្មើសធនធានធម្មជាតិនានា ការពារសន្តិសុខសណ្ដាប់ធ្នាប់ ការពារបូរណភាពទឹកដី ការពារជាតិមាតុភូមិ។
លោក សាយ ម៉េងគីម ក៏បានណែនាំដល់កងកម្លាំងទាំងអស់ ត្រូវយកចិត្តទុកដាក់ថែរក្សាសុខភាពឲ្យបានល្អ ព្រោះរដូវនេះ ជារដូវវស្សា នឹងត្រូវចេះរស់នៅស្អាត ហូបស្អាត ផឹកស្អាត ដើម្បីចៀសផុតពីជំងឺតម្កាត់ផ្សេងៗ ជាពិសេស ត្រូវបន្តចូលរួមអនុវត្តតាមវិធានការរបស់រាជរដ្ឋាភិបាល ៣ការពារ ៣កុំ និងវិធានការនានារបស់ក្រសួងសុខាភិបាល ដើម្បីបង្ការទប់ស្កាត់ជំងឺកូវីដ-១៩៕
ចែករំលែកព័តមាននេះ