ស៊ើបដឹងអស់ហើយ នៅតែមិនបានសម្រេចដដែល
ខេត្តកំពង់ចាម ៖ បុរសនៅលីវម្នាក់ បន្ទាប់ពីស៊ើបដឹងអស់ថា ប្តី និងម្តាយរបស់នាងមិននៅផ្ទះ ឯឪពុកជាមនុស្សចាស់ជរាមិនអាចធ្វើអ្វីកើត ក៏ចូលទៅបើកមុងថ្នមៗ រួចចាប់ឱប …
ខេត្តកំពង់ចាម ៖ បុរសនៅលីវម្នាក់ បន្ទាប់ពីស៊ើបដឹងអស់ថា ប្តី និងម្តាយរបស់នាងមិននៅផ្ទះ ឯឪពុកជាមនុស្សចាស់ជរាមិនអាចធ្វើអ្វីកើត ក៏ចូលទៅបើកមុងថ្នមៗ រួចចាប់ឱបប៉ុនប៉ងចាប់រំលោភ តែត្រូវនាងដឹងខ្លួនទាន់ស្រែកផ្អើលឆោឡោបង្កឲ្យមានការភ្ញាក់ផ្អើល និងត្រូវសមត្ថកិច្ចចាប់ខ្លួនបញ្ជូនទៅសាលាដំបូងខេត្តនាព្រឹកថ្ងៃទី២៣ ខែមករាឆ្នាំ២០១៧ ។
លោកវរសេនីយ៍ទោ ហេង វណ្ណា អធិការនគរបាលស្រុកស្រីសន្ធរ បានឲ្យដឹងថា ជនសង្ស័យឈ្មោះ នឿន សុខនៅ ភេទប្រុស អាយុ២៦ឆ្នាំ ជាជាងធ្វើផ្ទះ ហើយនៅលីវ រស់នៅភូមិប្រាំយ៉ាម ឃុំប្រាំយ៉ាម ស្រុកស្រីសន្ធរ ចំណែកស្ត្រីរងគ្រោះឈ្មោះ ឆ.គ អាយុ៣៥ឆ្នាំ មានប្តី និងមានកូនម្នាក់ ។
លោកអធិការ ឲ្យដឹងទៀតថា មុនពេលកើតហេតុជនសង្ស័យបានជិះម៉ូតូពីផ្ទះរបស់ខ្លួនទៅផឹកស៊ីជាមួយមិត្តភក្តិរហូតដល់ស្រវឹងស្រឿងៗ លុះនៅម៉ោង១ និង៣០នាទីរំលងអាធ្រាត្រ ឈានចូលព្រឹកថ្ងៃទី២១ ខែមករា ឆ្នាំ២០១៧ ទើបត្រឡប់មកផ្ទះវិញ ខណៈពេលដែលជិះម៉ូតូត្រឡប់មកផ្ទះវិញនោះក៏កើតមានចំណង់ផ្លូវភេទ ក៏ទុកម៉ូតូនៅចុងភូមិកន្លែងស្ងាត់ ហើយដើរតម្រង់មកផ្ទះស្ត្រីរងគ្រោះ ។ ពេលមកដល់ផ្ទះស្ត្រីរងគ្រោះឃើញនាងកំពុងដេកនៅលើគ្រែក្រោមផ្ទះជាមួយឪពុកចាស់ជរាក៏ដោះអាវក្រៅចេញ រួចបង្ហើបមុងថ្នមៗចូលទៅឱបស្ត្រីរងគ្រោះបំណងចង់រួមភេទ តែត្រូវស្ត្រីរងគ្រោះដឹងខ្លួនទាន់ ស្រែកផ្អើលឆោឡោធ្វើឲ្យជននេះ ស្ទុះរត់ចេញទៅទាំងប្រញាប់គេចខ្លួនបាត់ ។
លោកវរសេនីយ៍ទោ ហេង វណ្ណា បន្តទៀតថា បន្ទាប់ពីមានការភ្ញាក់ផ្អើលដល់អ្នកជិតខាង សមត្ថកិច្ចក៏ទៅដល់កន្លែងកើតហេតុឃើញមានអាវរងារ១ និងទូរស័ព្ទដៃ១គ្រឿង លុះពេលដែលសមត្ថកិច្ចបានឆែកលេខទៅទើបដឹងថា ជារបស់ជនសង្ស័យឈ្មោះ សុខនៅ និងដោយទទួលបញ្ជាពីលោក ហួត វុទ្ធី ព្រះរាជអាជ្ញាអមសាលាដំបូងខេត្ត នៅព្រឹកថ្ងៃទី២១ ខែមករា សមត្ថកិច្ចមូលដ្ឋានបានហៅជននោះមកសួរនាំនៅប៉ុស្តិ៍នគរបាល ។
នៅចំពោះមុខសមត្ថកិច្ច ជនសង្ស័យបានឆ្លើយសារភាពថាបានប្រព្រឹត្តដូចការចោទប្រកាន់មែន ទើបសមត្ថកិច្ចសម្រេចឃាត់ខ្លួនបញ្ជូនទៅអធិការដ្ឋាននគរបាលស្រុកស្រីសន្ធរ និងបញ្ជូនបន្តទៅស្នងការដ្ឋាននគរបាលខេត្តតែម្តង ។
លោកអធិការនគរបាលស្រុកស្រីសន្ធរ បញ្ជាក់ថា នៅយប់ថ្ងៃកើតហេតុ ជនល្មោភកាមបានស៊ើបដឹងថា ម្តាយរបស់ស្ត្រីរងគ្រោះចេញទៅបុណ្យគេនៅរាជធានីភ្នំពេញ ឯប្តីស្ត្រីរងគ្រោះបានទៅស៊ីឈ្មួលបើករថយន្តឲ្យគេនៅខេត្តសៀមរាប ចំណែកឪពុកជាមនុស្សចាស់ជរា ទើបគិតថាធ្វើអ្វីមិនកើត ក៏សម្រេចចិត្តមកប៉ងចាប់រំលោភ តែមិនបានសម្រេច បែរជាត្រូវសមត្ថកិច្ចចាប់ខ្លួនបញ្ជូនទៅសាលាដំបូងខេត្តទៅវិញ ៕
ចែករំលែកព័តមាននេះ