រាជធានីភ្នំពេញ ៖ មន្ត្រីជាន់ខ្ពស់ក្រសួងពាណិជ្ជកម្មបានថ្លែងថា កិច្ចសម្រួលពាណិជ្ជកម្មតាមប្រព័ន្ធអេឡិចត្រូនិកឆ្លងកាត់ព្រំដែន នឹងជួយសម្រួលនីតិវិធី និងបង្កើនទំហំនៃការនាំចេញរបស់កម្ពុជា ។
លោក សុខ សុភ័ក្ត្រ អនុរដ្ឋលេខាធិការនៃក្រសួងពាណិជ្ជកម្ម បានថ្លែងក្នុងសិក្ខាសាលាស្ដីពី «កិច្ចសម្រួលពាណិជ្ជកម្មតាមប្រព័ន្ធអេឡិចត្រូនិកឆ្លងកាត់ព្រំដែន» កាលពីថ្ងៃទី១៨ មករា កន្លងមកថា បច្ចុប្បន្នការធ្វើពាណិជ្ជកម្មជាលក្ខណៈអន្តរជាតិមានសារសំខាន់ណាស់សម្រាប់ប្រទេសនីមួយៗ ដោយនាំឲ្យមានប្រតិបត្តិការឆ្លងកាត់ព្រំដែនរឹតតែច្រើនឡើង ។ ប្រតិបត្តិការទាំងនោះ ចាំបាច់ឆ្លងកាត់នីតិវិធីស្មុគស្មាញ បង្កើតជាបន្ទុកធ្ងន់ធ្ងរដល់អ្នកនាំចេញ និងនាំចូល ដែលជួយសម្រាលបន្ទុក ក៏ដូចជាកាត់បន្ថយចំណាយប្រតិបត្តិការ ។
លោកបន្តថា ៖ « រាជរដ្ឋាភិបាលបានសម្រួលនីតិវិធីគយ និងនីតិវិធីតាមព្រំដែនដទៃទៀត សម្រាប់ការធ្វើពាណិជ្ជកម្មអន្តរជាតិ តាមរយៈការដាក់ឲ្យប្រើប្រាស់នូវវិធានការសម្រួលពាណិជ្ជកម្មមួយចំនួន ។ កិច្ចព្រមព្រៀងក្របខ័ណ្ឌស្ដីពីកិច្ចសម្រួលពាណិជ្ជកម្មតាមប្រព័ន្ធអេឡិចត្រូនិកឆ្លងកាត់ព្រំដែននៅអាស៊ីប៉ាស៊ីហ្វិក ជាការផ្ដួចផ្ដើមរបស់អង្គការ UNESCAP ដែលអាចនាំនូវផលចំណេញក្នុងរយៈពេលវែងសម្រាប់តំបន់ តាមរយៈការធ្វើពាណិជ្ជកម្មឆ្លងកាត់ព្រំដែន ដោយមិនចាំបាច់ប្រើក្រដាស ឬតាមអេឡិចត្រូនិក » ។
លោក សុខ សុភ័ក្ត្រ បន្ថែមថា ដើម្បីឲ្យការធ្វើពាណិជ្ជកម្មអន្តរជាតិរឹតតែមានប្រសិទ្ធភាព និងតម្លាភាព ព្រមទាំងអនុលោមតាមច្បាប់ដែលមានជាធរមាន រដ្ឋមន្ត្រីក្រសួងពាណិជ្ជកម្មគាំទ្រយ៉ាងខ្លាំងក្នុងការអនុវត្តកិច្ចព្រមព្រៀងសម្រួលពាណិជ្ជកម្ម ហើយក្រសួងបានស្នើសុំជំនួយបច្ចេកទេសបន្ថែមពីដៃគូអភិវឌ្ឍន៍ ដើម្បីរៀបចំនីតិវិធីស្របតាមទម្រង់ B និង C ។
លោកបន្ថែមទៀតថា ៖ « ការបង្កើតឲ្យមានបង្អួចតែមួយ គឺជាចំណុចអាទិភាពចម្បងសម្រាប់ដោះស្រាយបញ្ហានីតិវិធី និងហេដ្ឋារចនាសម្ព័ន្ធ ។ ចំណុចអាទិភាពទី២ គឺកិច្ចសម្រួលពាណិជ្ជកម្មកម្រិតសកល តាមរយៈការបង្កើតបុស្តិ៍ចេញចូលតែមួយនៅតាមព្រំដែន » ។
យោងតាមការស្រាវជ្រាវរបស់ UNESCAP ការដាក់ឲ្យប្រើប្រាស់ប្រព័ន្ធសម្រួលពាណិជ្ជកម្មតាមអេឡិចត្រូនិកទូទាំងតំបន់ អាចនាំឲ្យទំហំនៃការនាំចេញកើនឡើង២៥៧ប៊ីលានដុល្លារអាមេរិកប្រចាំឆ្នាំ ហើយបើទោះជាការដាក់ឲ្យប្រើប្រាស់ប្រព័ន្ធនេះ មិនគ្របដណ្ដប់ទូទាំងតំបន់ក៏ដោយ ក៏អាចនាំឲ្យទំហំនៃការនាំចេញកើនឡើង៣៦ប៊ីលានដុល្លារអាមេរិកប្រចាំឆ្នាំផងដែរ ហើយថេរវេលាសម្រាប់ធ្វើការនាំចេញធ្លាក់ចុះ ។
លោកបណ្ឌិត ម៉ី កល្យាណ ទីប្រឹក្សាជាន់ខ្ពស់ឧត្តមក្រុមប្រឹក្សាសេដ្ឋកិច្ចជាតិ បានថ្លែងថា ជានិន្នាការប្រទេសជឿនលឿន គឺគេបាននិងកំពុងធ្វើការងារនេះហើយ ហើយបន្តិចម្តងៗកម្ពុជាកំពុងដើរលើផ្លូវដូចគ្នានេះ សំខាន់ឲ្យតែប្រព័ន្ធគ្រប់គ្រងរបស់យើងដំណើរការល្អ ការធ្វើពាណិជ្ជកម្មតាមប្រព័ន្ធអេឡិចត្រូនិកនេះពិតជាល្អ ដោយសារវាកាត់បន្ថយពេលវេលា និងនីតិវិធីស្មុគស្មាញមួយចំនួន ។
លោកបន្តថា ៖ «កម្ពុជាកំពុងដើរតាមលំអាននេះ ប៉ុន្តែប្រព័ន្ធការងាររបស់យើងមិនទាន់មានភាពរឹងដៃ រឹងជើងនៅឡើយ ដែលទាមទារឲ្យយើងធ្វើបន្តិចម្តងៗរហូតដល់ឈានទៅដំណើរការបានរលូន ប៉ុន្តែជាទស្សនវិជ្ជារបស់ខ្ញុំ បើចង់ទិញទំនិញ ខ្ញុំទៅផ្សារដោយខ្លួនឯង ព្រោះអាចជួបគេជួបឯងផង និងមានពេលវេលាសម្រាប់លំហែផង ហើយក្របខ័ណ្ឌនៃការធ្វើពាណិជ្ជកម្មខ្នាតធំទាមទារឲ្យការធ្វើពាណិជ្ជកម្មតាមប្រព័ន្ធអេឡិចត្រូនិក » ៕
ចែករំលែកព័តមាននេះ