រាជធានីភ្នំពេញ ៖ លំហូរវិនិយោគផ្ទាល់ពីបរទេសនៅឆ្នាំ២០១៦ មានទឹកប្រាក់ប្រមាណ២.១៥៥លានដុល្លារ កើនឡើងប្រមាណ២៥% សមាមាត្រនឹង១១% នៃផលិតផលក្នុងស្រុកសរុប (ផ.ស.ស) ដែលគាំទ្រជាចម្បងដោយ
រាជធានីភ្នំពេញ ៖ លំហូរវិនិយោគផ្ទាល់ពីបរទេសនៅឆ្នាំ២០១៦ មានទឹកប្រាក់ប្រមាណ២.១៥៥លានដុល្លារ កើនឡើងប្រមាណ២៥% សមាមាត្រនឹង១១% នៃផលិតផលក្នុងស្រុកសរុប (ផ.ស.ស) ដែលគាំទ្រជាចម្បងដោយលំហូរវិនិយោគក្នុងវិស័យហិរញ្ញវត្ថុ សណ្ឋាគារ និងអចលនទ្រព្យ ។ នេះបើយោងតាមរបាយការណ៍ប្រចាំឆ្នាំ២០១៦ របស់ធនាគារជាតិនៃកម្ពុជា ។
របាយការណ៍គូសបញ្ជាក់ថា នៅឆ្នាំ២០១៦ លំហូរវិនិយោគផ្ទាល់ពីបរទេសទៅលើវិស័យកសិកម្មមានទឹកប្រាក់២៣២លានដុល្លារ, ប្រតិបត្តិការ និងអាជីវកម្មធនធានរ៉ែ១៩លានដុល្លារ, កម្មន្តសាល៣៩០លានដុល្លារ, ហិរញ្ញវត្ថុ៥៣៩លានដុល្លារ, សកម្មភាពស្នាក់នៅ និងអាហារ២២៨លានដុល្លារ, ព័ត៌មានវិទ្យា និងទូរគមនាគមន៍១៥លានដុល្លារ, សំណង់៦៩លានដុល្លារ, អគ្គិសនី១៥លានដុល្លារ, អចលនទ្រព្យ ៣៧០លានដុល្លារ និងវិស័យផ្សេងទៀតមានទឹកប្រាក់២៧៨លានដុល្លារ ។
ការវិនិយោគបរទេសក្នុងវិស័យហិរញ្ញវត្ថុ ជាពិសេសវិស័យធនាគារមានកំណើនក្នុងរង្វង់៥% ធៀបទៅនឹងឆ្នាំ២០១៥ ដោយសារការបង្កើនដើមទុនរបស់គ្រឹះស្ថានធនាគារ និងហិរញ្ញវត្ថុ ។
លោក ជា ចាន់តូ ទេសាភិបាលធនាគារជាតិនៃកម្ពុជា មានប្រសាសន៍ថា តាមរយៈការត្រួតពិនិត្យទាំងកម្រិតមីក្រូ និងការតាមដានហានិភ័យនានាជាប្រចាំ គឺស្ថិរភាពវិស័យធនាគារបន្តរក្សាបានយ៉ាងរឹងមាំ ដែលបានរួមចំណែកជាចម្បងដល់ស្ថិរភាពហិរញ្ញវត្ថុទាំងមូល ដោយសារការគ្របដណ្តប់នៃធនាគារក្នុងវិស័យហិរញ្ញវត្ថុ។ នៅឆ្នាំ២០១៦ ធនាគារជាតិនៃកម្ពុជា បានពង្រឹងបទប្បញ្ញត្តិលើអនុបាតក្របខ័ណ្ឌសន្ទនីយភាពស្របតាមគោលការណ៍គ្រឹះបាសែល III និងការបង្កើនដើមទុនចុះបញ្ជីអប្បបរមារបស់គ្រឹះស្ថានធនាគារនិងហិរញ្ញវត្ថុ បន្ថែមលើវិធានការដែលមានស្រាប់ ។
លោកបន្តថា វិធានការទាំងនេះគួបផ្សំនឹងស្ថានភាពទីផ្សារ និងការប្រុងប្រយ័ត្នរបស់គ្រឹះស្ថាននាំឱ្យកំណើនឥណទានថយចុះ ហើយរំពឹងថា នឹងបន្តថមថយនាពេលខាងមុខ ដែលនឹងជួយពង្រឹងស្ថិរភាពហិរញ្ញវត្ថុឱ្យកាន់តែរឹងមាំ ។ លើសពីនេះ វិធានការម៉ាក្រូប្រុងប្រយ័ត្នមួយចំនួនទៀត ក៏កំពុងត្រូវបានសិក្សា និងគ្រោងដាក់ឱ្យអនុវត្តនាឆ្នាំ២០១៧នេះផងដែរ ៕
ចែករំលែកព័តមាននេះ