លោកគីម ជុងអ៊ុន រៀបចំពិធីអរគុណពេទ្យយោធាជួយប្រទេសយកជ័យជម្នះលើកូវីដ
កូរ៉េខាងជើង ៖ មេដឹកនាំកូរ៉េខាងជើង លោក Kim Jong Un បានរៀបចំពិធីមួយដើម្បីថ្លែងអំណរ
កូរ៉េខាងជើង ៖ មេដឹកនាំកូរ៉េខាងជើង លោក Kim Jong Un បានរៀបចំពិធីមួយដើម្បីថ្លែងអំណរគុណ និងកោតសរសើរដល់គ្រូពេទ្យយោធា ដែលបានដឹកនាំប្រទេសក្នុងការប្រយុទ្ធប្រឆាំងនឹងមេរោគឆ្លងនៅក្នុងរដ្ឋធានីព្យុងយ៉ាង។ នេះបើយោងតាមការចុះផ្សាយរបស់ប្រព័ន្ធផ្សព្វផ្សាយរដ្ឋ KCNA នៅថ្ងៃសុក្រ ទី ១៩ សីហានេះ។
ពេទ្យយោធារាប់ពាន់នាក់មកពីកងទ័ពប្រជាជនកូរ៉េ ដែលត្រូវបានបញ្ជូនទៅកាន់រណសិរ្សប្រយុទ្ធនឹងជំងឺរាតត្បាត ត្រូវបានរំសាយចេញវិញ បន្ទាប់ពីមេដឹកនាំកំពូលរបស់កូរ៉េខាងជើងប្រកាសពីជ័យជន្នះលើកូវីដ ១៩ និងបានបន្ធូរបន្ថយការរឹតបន្តឹងកាលពីសប្តាហ៍មុន។
លោក Kim Jong Un បានប្រារព្ធពិធីនោះនៅសាលវប្បធម៌ ២៥មេសា (Apr 25 House of Culture) ក្នុងទីក្រុងព្យុងយ៉ាងកាលពីថ្ងៃព្រហស្បតិ៍ ទី ១៨ ដើម្បីអបអរសាទរដល់វីរភាពរបស់ពេទ្យទាហានដែលនៅជួរមុខក្នុងការប្រយុទ្ធប្រឆាំងនឹងកូវីដ ១៩នៅក្នុងទីក្រុង។
KCNA ចុះផ្សាយថា នៅសប្តាហ៍នេះ ពេទ្យយោធាបានវិលត្រឡប់ទៅកាន់អង្គភាពរបស់ពួកគេវិញកាលពីថ្ងៃអាទិត្យដោយមិនមានការប្រារព្ធពិធីជូនដំណើរអ្វីឡើយ ប៉ុន្តែលោក Kim Jong Un និយាយថាលោកមានអារម្មណ៍សោកស្តាយដែលលោកមិនបានធ្វើគ្រប់គ្រាន់ដើម្បីទទួលស្គាល់ជាសាធារណៈចំពោះការលះបង់របស់ពួកគេ។
សូមបញ្ជាក់ថា កូរ៉េខាងជើងមិនបានបញ្ជាក់ពីចំនួនប្រជាជនដែលកើតកូវីដ ១៩នោះទេ ដោយរបបផ្តាច់ការនេះទំនងជាខ្វះឧបករណ៍ធ្វើតេស្តទ្រង់ទ្រាយធំ។
អ្នកជំនាញជំងឺឆ្លងមានការសង្ស័យពីការអះអាងពីជ័យជម្នះរបស់កូរ៉េខាងជើង ហើយអង្គការសុខភាពពិភពលោកនិយាយថា ស្ថានភាពកូវីដ ១៩នៅកូរ៉េខាងជើងអាចមានសភាពកាន់តែអាក្រក់ទៅៗ៕ (យោងតាមប្រភព៖ Reuters)
ចែករំលែកព័តមាននេះ