ខេត្តកំពង់ឆ្នាំង ៖ ប្រជាពលរដ្ឋជាច្រើនគ្រួសាររស់នៅភូមិចុងកោះ សង្កាត់ផ្សារឆ្នាំង ក្រុងកំពង់ឆ្នាំង នៅព្រឹកថ្ងៃទី២២ ខែមករា ឆ្នាំ២០១៧ បាននាំគ្នាតវ៉ា និងសំណូមពរដល់អាជ្ញាធរខេត្ត និងប្រមុខរាជរដ្ឋាភិបាល ពីបញ្ហាការរៀបចំអភិវឌ្ឍច្រាំងទន្លេរបស់អាជ្ញាធរខេត្ត ដែលបានធ្វើឲ្យប៉ះពាល់ការរស់នៅរបស់ពួកគាត់ ។ ការតវ៉ានេះ បន្ទាប់អាជ្ញាធរខេត្តតម្រូវឲ្យអ្នករស់នៅជាប់មាត់ទន្លេ២១០គ្រួសារចាកចេញដើម្បីធ្វើការអភិវឌ្ឍន៍ ។
ប្រជាពលរដ្ឋបានលើកឡើងថា ពួកគាត់មិនប្រឆាំងដល់ការអភិវឌ្ឍន៍របស់អាជ្ញាធរខេត្តទេ តែពួកគាត់សំណូមពរថា ពួកគាត់សុំថ្លៃរុះរើផ្ទះមួយគ្រួសារ១៥០០ដុល្លារ ស្មើៗគ្នា ដោយពុំគិតផ្ទះតូច ឬធំឡើយ និងសុំដីរស់នៅមានទំហំ១០ម៉ែត្រគុណ២០ម៉ែត្រ ដោយមិនឲ្យយកប្រាក់ ឬបង់រំលោះឡើយ ។
ដោយឡែក ប្រជាពលរដ្ឋ១៧គ្រួសារទៀតក៏បានចេញមុខតវ៉ាដែរ ដោយពួកគាត់ប្រាប់ថា ពួកគាត់ត្រូវបានចាកចេញតាមអាជ្ញាធរហើយ គឺបានទៅរស់នៅលើដីទិញគេ តែមកដល់ពេលនេះពួកគាត់មិនត្រូវបានអាជ្ញាធរដោះស្រាយគោលនយោបាយឡើយ ។ ចំណែកមួយគ្រួសារផ្សេងទៀតក៏មានរឿងប្រហាក់ប្រហែលគ្នានេះដែរ ។
ជុំវិញបញ្ហានេះ លោក ស៊ុន សុវណ្ណរិទ្ឋ អភិបាលរងខេត្តកំពង់ឆ្នាំង និងជាប្រធានគណៈកម្មការរៀបចំអភិវឌ្ឍន៍ច្រាំងទន្លេ បានបញ្ជាក់ប្រាប់ថា ប្រជាពលរដ្ឋក្នុងភូមិចុងកោះចំនួន២១០គ្រួសារបានឯកភាពគ្នាជាមួយអាជ្ញាធរខេត្តអស់ហើយ ដោយពួកគាត់ទទួលយកជម្រើសផ្សេងៗគ្នា ក្នុងនោះជំហានទី១ គឺប្រជាពលរដ្ឋ៤៧គ្រួសារ បានស្ម័គ្រចិត្តទទួលប្រាក់ដោះស្រាយគោលនយោបាយថ្លៃរុះរើផ្ទះ ហើយមិនយកដីទេ គឺដោះស្រាយចប់ហើយ ។ ចំណែកជំហានទី២ គឺ១៥០គ្រួសារគាត់ព្រមយកដី ហើយបានព្រមព្រាង និងឯកភាពគ្នាជាមួយអាជ្ញាធរអស់ហើយ ដែលពេលនេះអាជ្ញាធរកំពុងតែរៀបចំបណ្តាញអគ្គីសនី និងតបណ្តាញទឹកឲ្យពួកគាត់ ។ ចំណែកជំហានទី៣ សល់១០គ្រួសារដែលពួកគាត់មិនយកដី គឺយកលុយ នេះក៏ព្រមព្រាងគ្នា ផ្តិតមេដៃអស់ហើយដែរ គ្មានអ្វីដែលត្រូវលំបាកឡើយ ។ ចំណែករឿង១៧គ្រួសារដែលថា ចាកចេញនោះ គឺពួកគាត់រស់នៅលើផ្ទះបណ្តែតទឹក គាត់ព្រមចាកចេញតាំងពីអាជ្ញាធរខេត្តរុញផ្ទះបណ្តែតទឹកចេញឲ្យផុតពីមុខក្រុងកំពង់ឆ្នាំងមកម្លេះ មិនមែនអ្នករស់នៅតាមមាត់ទន្លេសសរជាប់ដីទេ ។ ដោយឡែករឿងអ្នកតវ៉ា គឺមកពីមានអ្នកនៅពីក្រោយខ្នង គ្មានឆន្ទៈដោះស្រាយជាមួយអាជ្ញាធរ គឺចាំតែប្រឆាំងហ្មង ។
ជុំវិញបញ្ហារៀបចំសណ្តាប់ធ្នាប់នេះដែរក៏លេចឮបាតុភាពមិនប្រក្រតីដែរថា ខ្លះមានខ្ទមស្លឹកសឹងថាធ្វើមិនអស់ដល់១០ម៉ឺនរៀលផង ក៏បានទទួលរបបដោះស្រាយដល់ទី៨០០ដុល្លាដែរ ចំណែកខ្លះបានរុះរើផុតពីកន្លែងដែលត្រូវដេញហើយ បែរជាមិនបានប្រាក់ទៅវិញ ។ ជុំករណីរៀបចំដេញផ្ទះតាមមាត់ទន្លេដើម្បីអភិវឌ្ឍន៍នេះ បើមានអ្វីប្លែក យើងនឹងធ្វើបច្ចុប្បន្នភាពបន្ថែមទៀត ៕
ចែករំលែកព័តមាននេះ