ថ្មីៗនេះមហាជនកំពុងផ្ទុះការចាប់អារម្មណ៍ខ្លាំងមែនទែនទៅលើកូនប្រុសស្រី របស់តារាសម្ដែងប្រុសមួយរូប ដែលជាតួអង្គក្នុងរឿង «ទុំទាវ» ក្រោយកូនៗលោកទទួលបានលិខិត
រាជធានីភ្នំពេញ ៖ ថ្មីៗនេះមហាជនកំពុងផ្ទុះការចាប់អារម្មណ៍ខ្លាំងមែនទែនទៅលើកូនប្រុសស្រី របស់តារាសម្ដែងប្រុសមួយរូប ដែលជាតួអង្គក្នុងរឿង «ទុំទាវ» ក្រោយកូនៗលោកទទួលបានលិខិតសរសើរពីសាលារៀនមួយក្នុងប្រទេសអូស្រា្តលី លើមុខវិជ្ជាផ្នែកគណិតវិទ្យា និង គំនូរ ក្នុងការប្រកួតប្រជែងលើសិស្សដទៃទៀត។
បើនិយាយដល់តួអង្គឯកដ៏ល្បីល្បាញ ក្នុងរឿង «ទុំទាវ» ដែលជារឿងបែបប្រលោមលោកដ៏ល្បីល្បាញរបស់ខ្មែរយើង ជឿជាក់ថា ប្រិយមិត្តអ្នកគាំទ្រប្រាកដជាបានស្គាល់ច្បាស់រួចមកហើយ នៅតួរអង្គទុំ ដែលមានឈ្មោះពិតថា លោក ស៊ុក សុភា ។ ក្នុងរឿង «ទុំទាវ» នេះដែរ គឺតារាសម្ដែងប្រុសលោក ស៊ុក សុភា ទទួលបានការគាំទ្រភ្លូកទឹកភ្លូកដីពីសំណាក់មហាជន ដែលបច្ចុប្បន្នលោកនៅតែទទួលបានការគាំទ្រឥតថមថយ ទោះបីលោកឈប់ពីសិល្បៈយូរឆ្នាំហើយក្ដី ។
មួយវិញទៀត ក្រោយរៀបការជាមួយភរិយាជាង១០ឆ្នាំ តារាសម្ដែងប្រុស លោក ស៊ុក សុភា ក៏ទទួលបានកូនៗរហូតដល់ទៅ៥នាក់ជាចំណងដៃគ្រួសារស្នេហ៍ និងបានចាកចេញពីប្រទេសកម្ពុជា ដែលជាទីកន្លែងកំណើតទៅរស់នៅលើទឹកដីប្រទេសអូស្ត្រាលី ជាមួយក្រុមគ្រួសារយ៉ាងមានសេចក្ដីសុខសុភមង្គល។ ក្រោយទៅរស់នៅទឹកដីនៃប្រទេសថ្មី លោក ស៊ុក សុភា ក៏ស្ងាត់បាត់មុខពីសិល្បៈឈឹងតែម្ដង ពោលគឺគ្មានដំណឹងក្នុងការវិលចូលសិល្បៈវិញឡើយ ដែលជាហេតុធ្វើអោយេបណ្ដាអ្នកគាំទ្រនឹករលឹកដល់លោកជាខ្លាំង។
យ៉ាងណាមិញ កាលពីថ្ងៃទី១៨ ខែសីហា ឆ្នាំ២០២២ ម្សិលមិញនេះ បណ្ដាអ្នកគាំទ្រក្នុងប្រទេសកម្ពុជា ផ្ទុះការភ្ញាក់ផ្អើលជាខ្លាំង ក្រោយតារាសម្ដែងប្រុសក្នុងរឿង «ទុំទាវ» រូបនេះ បានបង្ហោះរូបភាពកូនៗដល់ទៅ២នាក់ ដែលទទួលបានលិខិតសរសើរពីសាលារៀន Zuzanna ក្នុងទឹកដីប្រទេសអូស្ត្រាលី ផ្នែកគណិតវិទ្យា និង គំនូរ ប្រជែងលើសិស្សដទៃទៀត។
នេះបើយោងតាមការបង្ហោះរូបភាពលើបណ្ដាញសង្គម ដែលបង្ហាញអំពីកូនប្រុសស្រីទទួលបានលិខិតសរសើរពីសាលារៀន លោក ស៊ុក សុភា ក៏បានបង្ហាញអារម្មណ៍រំភើបដូច្នោះថា «Congratulations Zuzanna Robinson & Nichole ថ្ងៃនេះ កូនប្រុសស្រីទទួលបានលិខិតសរសើរពីសាលារៀន Zuzanna ពូកែខាងគណិតវិទ្យា Robinson ពូកែខាងគំនូរ កូនខ្មែរធ្វើបាន» ។
ក្រោយឃើញការបង្ហាញពីសមត្ថភាពកូនប្រុសស្រីរបស់តារាសម្ដែងប្រុសរូបនេះភ្លាម បានធ្វើអោយមហាជនអ្នកគាំទ្រសម្ដែងការត្រេកអរ និងសារទដល់តារាប្រុសរូបនេះជាខ្លាំង ដែលមានកូនៗមានសមត្ថភាពខ្ពស់ និងជាគំរូល្អដល់ក្មេងៗផងដែរ។
សូមរំលឹកថា អតីតតារាសម្ដែងក្នុងរឿង «ទុំទាវ» ដែលដើរជាតួរអង្គ «នេនទុំ» លោក ស៊ុក សុភា បានចាកចេញពីវិថីសិល្បៈអស់រយៈពេលជាង១០ឆ្នាំមកហើយ ដោយលោកបានផ្លាស់ប្ដូរជីវិតថ្មី ទៅសាងគ្រួសាររៀបការជាមួយអ្នកនាង លុយ ហ្សារីណា និងកំពុងរស់នៅយ៉ាងមានក្ដីសុខលើទឹកដីប្រទេសអូស្ត្រាលី ដោយអ្នកទាំងពីទទួលបាននូវចំណងដៃបុត្រាបុត្រី ចំនួន៥នាក់ផងដែរ។
ដោយឡែកក្នុងឆ្នាំ២០២២នេះ តារាសម្ដែងប្រុស ស៊ុក សុភា ក៏បានវិលមកប្រទេសកំណើតរបស់ខ្លួន បន្ទាប់ពីខកខានអស់រយៈពេលជាង១០ឆ្នាំ ខណៈពេលដែលការមកលេងស្រុកកំណើតនេះដែរ គឺត្រូវបានគេដឹងថា លោកមានបញ្ហាជាមួយគ្រួសារនៅឯប្រទេសអូស្ត្រាលី ទើបលោកគេចមកកម្ពុជាមួយរយៈ។ បន្ទាប់ពីស្នាក់នៅក្នុងប្រទេសកំណើតអស់រយៈពេលជាង២ខែរួចមក លោកក៏សម្រេចចិត្តចេញទៅប្រទេសអូស្ត្រាលីវិញ ដើម្បីរួមរស់ជួបជុំគ្រួសារដូចធម្មតា ក្រោយមានការសម្របសម្រួល និងត្រូវរ៉ូវគ្នាវិញជាមួយនឹងភរិយា។
ចែករំលែកព័តមាននេះ