ផ្អើលពាសពេញប្រទេសថៃ តារាស្រីជួរមុខក្នុងពិភពសិល្បៈរបស់ថៃមានឈ្មោះល្បីល្បាញខ្លាំងមែនទែន ហើយអ្នកទាំងអស់គ្នាប្រាកដជាបានស្គាល់ហើយ នោះគឺនាង
ថៃ ៖ ផ្អើលពាសពេញប្រទេសថៃ តារាស្រីជួរមុខក្នុងពិភពសិល្បៈរបស់ថៃដែលមានឈ្មោះល្បីល្បាញខ្លាំងនាង Pinky Savika ដែលទស្សនិកជនខ្មែរធ្លាប់បានស្គាល់ក្នុងតួអង្គ «នាងផ្គាយព្រឹក» ពេលកុមាភាព ត្រូវបានសមត្ថកិច្ចចាប់ខ្លួន ជុំវិញរឿងរ៉ាវបោកប្រាក់លុយជាច្រើនពាន់លានបាត។
ប្រាកដណាស់ ថ្វីត្បិតតែមួយរយៈពេលនេះ តារាស្រីរូបនេះនាងមិនសូវលេចមុខសម្ដែងនៅក្នុងសិល្បៈជាញឹកញាប់ក្តី តែនាង Pinky នៅតែទទួលបានប្រជាប្រិយភាពនិងមានសន្ទុះនៃការគាំទ្រយ៉ាងកខ្លាំងក្លាពីសំណាក់មហាជនទាំងក្នុង និងក្រៅប្រទេសដដែល ។
តែអ្វីដែលនឹកស្មានមិនដល់ និងស្ទើរតែមិនគួរអោយជឿទៅវិញនោះ នាល្ងាចថ្ងៃទី ១៨ ខែសីហា ឆ្នាំ២០២២ មហាជនជាច្រើនដែលនិយមប្រើប្រាស់បណ្ដាញទំនាក់ទំនងសង្គមហ្វេសប៊ុក ក៏ដូចជានៅក្នុងអ៊ីនស្តាក្រាម (IG) ពិតជាមានការភ្ញាក់ព្រឺតតែម្ដង ដោយសារនៅសុខៗស្រាប់តែផ្ទុះដំណឹងព្រោងព្រៀតថា តារាស្រី Pinky Savika ត្រូវបានតុលាការបញ្ជូនខ្លួនទៅពន្ធនាគារហើយ ពីបទ «ឆបោ.កលុយប្រជាជនតាមប្រព័ន្ធអេឡិចត្រូនិចជាច្រើននាក់» និងមានទំហំទឹកប្រាក់ជាច្រើនពាន់លានបាតផងដែរ។
ប្រភពព័ត៌មានសិល្បៈកម្សាន្ដថៃ Khaosod ដែលបានឱ្យដឹងថា កំពូលតារាសម្ដែងស្រីជួរមុខ ដែលមានរូបសម្រស់ស្រស់ស្អាតអំណោយផលពីធម្មជាតិ នាង Pinky រួមទាំងបងប្រុស និងម្ដាយរបស់នាង ត្រូវបានសមត្ថកិច្ចធ្វើការឃាត់ខ្លួននិងបញ្ជូនទៅពន្ធនាគារ ពីបទ «ឆបោ.កលុយតាមរយៈបណ្ដាញសង្គម» ។
តាមការរាយការណ៍ពីសំណាក់សារព័ត៌មានក្នុងស្រុកថៃ បានឱ្យដឹងទៀតថា តុលាការសម្រេចចិត្តមិនឱ្យតារាស្រី Pinky និងក្រុមគ្រួសារធានាខ្លួននៅក្រៅឃុំឡើយ ក្រោមហេតុផលថា «ទម្ងន់នៃទោសមានកម្រិតធ្ងន់ពេក» ដោយមានជនរងគ្រោះជាង ៩៨២៤ នាក់ឯណោះ ហើយសរុបជាទឹកប្រាក់ចំនួនជាង២ពាន់លានបាត (ប្រមាណជិត ៥៦លានដុល្លារ)។ ហើយនៅក្នុងករណីនេះផងដែរ ក៏មានអ្នកចូលរួមរហូតដល់១៩នាក់ឯណោះ ដោយភាគច្រើនសុទ្ធសឹងជាតារា អ្នកសិល្បៈ មានមុខមាត់ និងហាយសូរនៅក្នុងសង្គម។
ដំណឹងមួយនេះផងដែរ ក៏បានធ្វើអោយអ្នកគាំទ្រមួយចំនួននាំគ្នាផ្ទុះការខឹងសម្បារ និងមានការស្រងាកចិត្តជាខ្លាំង ខណៈពេលឃើញព័ត៌មានបែបនេះ ព្រោះមិននឹកស្មានថា មនុស្សដែលគ្រប់គ្នាខំស្រលាញ់ គាំទ្ររហូតមកបែរជាហ៊ានធ្វើទង្វើបែបនេះទាល់តែសោះ ដោយពួកគេនាំគ្នាចូលទៅខមិនថា «តុលាការបង្គាប់មិនឲ្យនៅក្រៅឃុំ ជនជាប់ចោទទាំងអស់ មានជនជាប់ចោទ ១៩ នាក់ ក្នុងករណីនេះ ត្រូវបានឃុំខ្លួននៅថ្ងៃនេះ»។
អ្នកប្រើប្រាស់បណ្តាញសង្គមនៅថៃខ្លះបានបញ្ចេញមតិថា «តារាមិនមែនមានន័យថា គេជាមនុស្សល្អទេ គ្រប់វិស័យសុទ្ធតែមានអាជីព មានទាំងមនុស្សល្អ និងមនុស្សអាក្រក់ កុំទុកចិត្តគាត់ ព្រោះគាត់ជាតារា ព្រោះយើងមិនដែលស្គាល់គាត់ទេ គ្រាន់តែឃើញគាត់ក្នុងរឿង » «ភាពលោ.ភលន់ធ្វើឱ្យមនុស្សគិតខុស ធ្វើខុស គិតម្តងទៀត ដើម្បីកុំឱ្យបាត់បង់អនាគតរបស់អ្នក» « សោកស្ដាយខ្លាំងណាស់ ជាតារាល្បីផង ហេតុអីក៏ធ្វើបែបនេះទៅវិញ?» ។
ហើយក៏មានអ្នកគាំទ្រមួយចំនួនខ្លះទៀត ដោយម្នាក់ៗក៏នៅតែផ្តល់កម្លាំងចិត្ត «ស៊ូៗឡើង កុំបាក់ទឹកចិត្ត កុំអស់សង្ឃឹម និងត្រូវដើរទៅមុខបន្តទៀត គ្មាននរណាម្នាក់កើតមកល្អគ្រប់ដបនិងមិនចេះខុសនោះទេ កុំខ្វល់ពីសម្ដីរបស់គេ អ្នកណាចង់និយាយអ្វីក៏និយាយទៅ រឹងមាំឡើងអាយដល» ហើយពួកគេនឹងកំពុងតែរង់ចាំមើលការដោះស្រាយជំហានបន្តទៀតរបស់តារាស្រី Pinky ដូចគ្នាដែរថា តើនឹងទៅជាយ៉ាងណា? ។
សូមបញ្ជាក់ថា ល្បិចនៃការឆបោ.កលុយនេះ គឺឱ្យជនរងគ្រោះយកលុយមកបណ្ដាក់ទុនក្នុងការរកស៊ីប្ដូរលុយជាសកល ដោយឆ្លងកាត់វែបសាយ ( Forex – 3d .com ) ហើយនឹងរំពឹងថា ទទួលបានផលចំណេញចាប់ពី ៦០ ដល់ ៨០ ភាគរយ ៕
ចែករំលែកព័តមាននេះ