ខេត្ដកណ្ដាល ៖ បុរសអ្នករត់តាក់ស៊ី ម្នាក់ត្រូវបានកំលាំងកងរាជអាវុធហត្ថខេត្ដ ធ្វើការឃាត់ខ្លួន បន្ទាប់ពីបុរសរូបនេះទទួល ប្រាក់បញើដុល្លារអាមេរិកក្លែងក្លាយប្រភេទ ក្រដាស១០០សុទ្ធ សរុបចំនួន១ម៉ឺនដុល្លារ ដឹកតាមរថយន្ដពីខេត្ដបន្ទាយមានជ័យចូលមករាជធានីភ្នំពេញ ។បុរសជាប់ចោទត្រូវបានសមត្ថកិច្ចចាប់ខ្លួនកាលពីវេលាម៉ោង១២ និង១៥នាទីថ្ងៃត្រង់ ថ្ងៃទី៦ មិថុនា កន្លងមកនេះ នៅចំណុចស្ពាន ព្រៃល្វា ក្នុងភូមិព្រៃល្វា ស្រុកពញាឮ ។
លោកអនុសេនីយ៍ឯកស្វាយ សុខា ប្រធាន មន្ទីរស្រាវជ្រាវ និងយុត្ដិធម៌ស្ដីទីកងរាជ អាវុធហត្ថខេត្ដបានឱ្យដឹងថា ដោយអនុវត្ដតាមបទបញ្ជារបស់លោកនាយឧត្ដមសេនីយ៍សៅ សុខា អគ្គមេបញ្ជាការរងកងយោធ ពលខេមរភូមិន្ទ និងជាមេបញ្ជាការកងរាជ អាវុធហត្ថលើផ្ទៃប្រទេស និងមានការបង្អុល បង្ហាញពីលោកឧត្ដមសេនីយ៍ត្រីមាស សុវណ្ណ មេបញ្ជាការកងរាជអាវុធហត្ថខេត្ដ លោក បានដឹកនាំកំលាំងចុះស្ទាក់ចាប់ជនសង្ស័យដែលកំពុងដឹកប្រាក់ដុល្លារ ក្លែងក្លាយបានម្នាក់ឈ្មោះលី សួ ភេទប្រុស អាយុ៤០ឆ្នាំ មុខរបរ រត់តាក់ស៊ី រស់នៅភូមិសាមគ្គី សង្កាត់ឫស្សី កែវ ខណ្ឌឫស្សីកែវ រាជធានីភ្នំពេញ ។
ក្រោយពីឃាត់ខ្លួនជននេះ សមត្ថកិច្ចបាន ដកហូតប្រាក់ដុល្លារអាមេរិកក្លែងក្លាយចំនួន១ម៉ឺនដុល្លារដែលជា ប្រភេទក្រដាសប្រាក់១០០ដុល្លារចំនួន១០០សន្លឹក រថយន្ដកាមរី ឆ្លាមមួយគ្រឿង ពាក់ស្លាកលេខភ្នំពេញ ២I- ០២០៦ និងទូរស័ព្ទដៃចំនួន២គ្រឿង ។លោកស្វាយ សុខា បានឱ្យដឹងទៀតថា ការចាប់បានប្រាក់ដុល្លារក្លែងក្លាយនេះ គឺ ដោយសារមានកំលាំងសំងាត់បានរាយការណ៍ពីខេត្ដបន្ទាយមានជ័យ ឱ្យមន្ទីរស្រាវជ្រាវ យុត្ដិធម៌ខេត្ដកណ្ដាលដឹងថា នៅព្រឹកថ្ងៃទី៦ មិថុនា មានរថយន្ដម៉ាកកាមរីឆ្លាមមួយ គ្រឿង ពាក់ស្លាកលេខភ្នំពេញ ២I-០២០៦ បាន បើកចេញពីចំណតនៅខេត្ដបន្ទាយមានជ័យយ៉ាងប្រញាប់ប្រញាល់ដោយគ្មានដឹក មនុស្សឃើញតែអីវ៉ាន់កញ្ចប់ៗដាក់ក្នុងរថយន្ដ និង ឃ្លុប ឆ្ពោះមកកាន់រាជធានីភ្នំពេញ ។
បន្ទាប់ពីទទួលបានព័ត៌មាននេះភ្លាម លោកបានដឹកនាំកំលាំងដាក់ប៉ុសិ៍្ដត្រួតពិនិត្យ និងឆែកឆេរនៅចំណុចស្ពានព្រៃល្វា តាមផ្លូវ ជាតិលេខ៥ ក្នុងភូមិព្រៃល្វា ស្រុកពញាឮ។ រហូតដល់វេលាម៉ោង១២ និង១៥នាទីថ្ងៃទី៦ មិថុនា ក៏ឃើញរថយន្ដដែលកំលាំងសំងាត់ បានរាយការណ៍មកដល់គោលដៅត្រួតពិនិត្យ ។ ភ្លាមនោះកម្លាំងកងរាជអាវុធហត្ថ ក៏បានឃាត់រថយន្ដនោះ រួចធ្វើការឆែកឆេរ ឃើញក្រដាសប្រាក់ដុល្លារក្លែងក្លាយជាប្រភេទក្រដាស១០០ដុល្លារចំនួន ១០០សន្លឹក
ស្មើនឹង១ម៉ឺនដុល្លារ ខ្ចប់នឹងក្រដាសពណ៌ លឿង ។ លោកស្វាយ សុខា បានឱ្យដឹងបន្ដថា បន្ទាប់ពីរកឃើញវត្ថុតាងប្រាក់ដុល្លារក្លែងក្លាយយ៉ាងច្រើននេះរួច មក កម្លាំងរបស់ លោកក៏ធ្វើការឃាត់ខ្លួនបុរសអ្នកបើករថយន្ដ នោះនាំមកកាន់ទីបញ្ជាការកងរាជអាវុធហត្ថខេត្ដកណ្ដាល ដើម្បីធ្វើការសាកសួរ ។
តាមចំលើយសារភាពរបស់ជនសង្ស័យ លី សួ បានឱ្យដឹងថា ប្រាក់ដុល្លារក្លែងក្លាយ ទាំងអស់នោះមិនមែនជារបស់ខ្លួនទេ គឺជា របស់គេផ្ញើ ព្រោះនៅព្រឹកនោះខណៈខ្លួន កំពុងរង់ចាំម៉ូយមកភ្នំពេញ មានបុរសម្នាក់ បានមកជួបខ្លួនដោយសុំផ្ញើអីវ៉ាន់មួយកញ្ចប់ មកភ្នំពេញ ដោយប្រាប់ថា ពេលទៅដល់ ភ្នំពេញនឹងមានគេមកទទួលហើយ ។ ពេល នោះខ្លួនក៏បាននិយាយថ្លៃត្រូវរ៉ូវគ្នាហើយ រូច ក៏បានបើករថយន្ដចេញពីខេត្ដបន្ទាយមាន ជ័យ ឆ្ពោះមកកាន់រាជធានីភ្នំពេញតែម្ដង ។ លុះមកដល់ចំណុចខាងលើ ក៏ត្រូវកម្លាំងកង រាជអាវុធហត្ថធ្វើការឆែកឆេរឃើញប្រាក់ដុល្លារក្លែងក្លាយទាំងនោះ ហើយក៏បានធ្វើការ ឃាត់ខ្លួនតែម្ដង ។ជនសង្ស័យលី សួ រួមនឹងវត្ថុតាងត្រូវបាន កម្លាំងកងរាជអាវុធហត្ថខេត្ដកណ្ដាលកសាង សំណុំរឿងបញ្ជូនទៅសាលាដំបូងខេត្ដ ដើម្បីវិនិច្ឆ័យទៅតាមច្បាប់ ៕
ចែករំលែកព័តមាននេះ