វេបសាយ«អាំងដេប៉ងដង់» របស់អាមេរិកកាលពីពេល ថ្មីៗកន្លងមកបានផ្សាយរឿងរ៉ាវរបស់គូស្នេហ៍មួយគូដែលទទួលការចាប់អារម្មណ៍ខ្លាំងពីអ្នកលេងអុីនធើរណែត ព្រោះខាងស្រីត្រូវក្រុមគ្រួសារកាត់កាល់ចោលដោយសារសេពគប់ជាមួយបុរសស្បែកខ្មៅ ។
នាងAllie Dowdle អាយុ១៨ឆ្នាំ នៅរដ្ឋថេនណេស៊ី សហរដ្ឋអាមេរិក ឱ្យដឹងថានាងចាប់ផ្តើមសេពគប់ជាមួយលោកMichael Swift ជាមិត្តរួមថ្នាក់តាំងពីឆ្នាំមុន និងសម្រេចចិត្តណែនាំគេឱ្យអ្នកផ្ទះស្គាល់ ។ នៅពេលរៀបរាប់ឱ្យឪពុក-ម្តាយស្តាប់ រួមទាំងយករូបថតរបស់គេឱ្យមើល ស្រាប់តែកើតការជំទាស់ ហើយឪពុកដាក់កំហិតឈប់ឱ្យទាក់ទងបុរសរូបនោះ ។
Allie Dowdle និយាយថា «ខ្ញុំមិនយល់ហេតុអី្វបានជាមនុស្សយើងប្រកាន់ពណ៌សម្បុរបែបនេះ !
ខ្ញុំមិនអាចណែនាំពន្យល់ពីរឿងនេះបានទេ ។ ទោះបីជាមានបម្រាមក៏ដោយ ប៉ុន្តែនាងខ្ញុំនៅតែសេពគប់ Michael បន្ត »
នៅខែធ្នូកន្លងមកនាង Allie Dowdle ព្យាយាមនាំសង្សារទៅជួបឪពុក-ម្តាយដោយសង្ឃឹមថាពួកគាត់ប្តូរចិត្ត ប៉ុន្តែជាអកុសលបែរជាស្ថានការណ៍កាន់តែអាក្រក់ឡើង ព្រោះឪពុកដល់ថ្នាក់ប្រកាសកាត់កាលកូនស្រី ដោយយកប្រាក់ពីធនាគារទាំងអស់របស់នាង យកទូរស័ព្ទ រថយន្ត រួមទាំងមិនបង់ថ្លៃសាលាទៀតផង» ។
រឿងរ៉ាវនោះរីកកាន់តែធំព្រោះនាងAllie Dowdle ប្រឈមមុខបាត់បង់ការសិក្សា ប្រសិនបើគ្មានប្រាក់ ។ ហេតុដូច្នេះនាងសម្រេចចិត្តប្រកាសរកការបរិច្ចាគប្រាក់តាមវេបសាយ«GoFundME» ដោយរៀបរាបើរឿងរ៉ាវស្នេហារបស់នាងដែលត្រូវបានក្រុមគ្រួសារកាត់កាលព្រោះតែស្រលាញ់បុរសស្បែកខ្មៅ ។ តាមរយៈការអំពាវនាវនោះ អ្នកលេងអុីនធើរណែតបរិច្ចាគប្រាក់ជាង៣១.០០០ដុល្លារជួយនាងAllie Dowdle ក្រោយពីរៃអង្គាស៣ថ្ងៃ ។
ចំណែកលោកប៊ីល ដូវដល ឪពុករបស់នាងAllie ឱ្យដឹងថាលោក និងប្រពន្ធទទួលយកបានទោះជាកូនស្រីសេពគប់ជាមួយនរណាក៏ដោយ ប៉ុន្តែមិនយល់ស្របដែលនាងសេពគប់ជាមួយMichael និងបុរសផ្សេងទៀតក្នុងពេលកន្លងមក ។ ចំពោះហេតុដែលលោកកាត់់ផ្តាច់ប្រាក់ឧបត្ថម្ភគ្រប់បែបយ៉ាងនោះ ព្រោះកូនស្រីដែលខ្លួនខំចិញ្ចឹមនាពេលកន្លងមកបាត់បង់ចរិតនិស្ស័យធម្មជាតិ ហើយប្រាកដណាស់នាងត្រូវការចាកចេញទៅក្រៅ និងរស់នៅដោយខ្លួនឯង ៕
ចែករំលែកព័តមាននេះ