រាជធានីភ្នំពេញ ៖ អ្នកចម្រៀងចាប៉ីដងវែងនឹងជួបជុំគ្នា នៅថ្ងៃទី២១ ខែមករា ២០១៧ នេះរួមមានព្រឹទ្ធាចារ្យប្រាជ្ញ ឈួន ព្រឹទ្ធាចារ្យគង់ ណៃ ស្មៀននេត្រ ប៉េ លោកសួន សាន និងអ្នក ចម្រៀងចាប៉ីដងវែងពីខេត្តស្វាយរៀងម្នាក់ទៀត ។ ពួកគាត់នឹងសំណះសំណាល ព្រមទាំងទទួលទានអាហាររួមគ្នានៅឃុំខ្វាវ ស្រុកទ្រាំង ខេត្តតាកែវ ជាទឹកដីកំណើត និងទីកន្លែងស្នាក់នៅបច្ចុប្បន្នរបស់ព្រឹទ្ធាចារ្យប្រាជ្ញ ឈួន ។
ការប្រកាសជួយដល់អ្នកចម្រៀងចាប៉ីដងវែងនិងរៀបចំជួបជុំគ្នានេះ ក្រោយពីតារាចម្រៀងសន វិជ្ជបុត្រ មើលឃើញពីការលំបាករបស់អ្នកចាប៉ីដងវែងដែលមានវ័យកាន់តែជរា និងជីវភាពខ្វះមុខខ្វះក្រោយ ។
លោកសន វិជ្ជបុត្រ បានទាក់ទងទៅកាន់អ្នកចម្រៀងចាប៉ីដងវែងចំនួន៤នាក់ ហើយ ជួបជុំគ្នានៅភ្នំពេញដើម្បីចេញដំណើរទៅកាន់លំនៅឋានរបស់ព្រឹទ្ធាចារ្យប្រាជ្ញ ឈួន នៅព្រឹកថ្ងៃទី២១ ខែមករា ២០១៧ តាមរថយន្តមួយគ្រឿង រួមជាមួយសិល្បករមួយចំនួន ។ កម្មវិធីនោះជាការលើកទឹកចិត្ត ជំរុញឲ្យមានការលើកស្ទួយ និងគាំទ្របន្ថែមពីមហាជន ចំពោះសិល្បៈចាប៉ីដងវែងដែលទើបនឹងដាក់បញ្ចូលជាសម្បត្តិបេតិកភណ្ឌអរូបិយពិភពលោកកាលពីពេល ថ្មីៗកន្លងមក ។
មានអំណោយរបស់លោកសន វិជ្ជបុត្រ សម្រាប់ប្រគល់ជូន គឺជាប្រាក់ដែលសប្បុរសជនមួយចំនួនជួយដល់លោក ហើយលោកធ្វើបុណ្យបន្តទៀត ។ ក្រៅពីនេះក៏មានការរួមគ្នាជាមួយសិល្បករ និងសប្បុរសជនមួយចំនួនទៀតដូចជា កញ្ញាវី រីយ៉ា តារាសម្តែង និងជាថៅកែហាងវីយ៉ា សាឡន, តារាសម្តែងកញ្ញាសួង សុខសារ៉ានីត, តារាចម្រៀងអេនណា និងអេមី, អ្នកស្រី ជេនី រ័ត្ន ប្រធានផ្នែកទីផ្សារ ក្រុមហ៊ុនសុគន្ធវឌ្ឍនៈត្រេឌីង, អតីតារាសម្តែងកញ្ញាថាច់ ផល្លា, លោកស្រី Linny Jay Jay CH រស់នៅប្រទេសអូស្ត្រាលី និងសប្បុរសជនមួយចំនួនទៀត ។
ព្រឹទ្ធាចារ្យ និងសិល្បករចាប៉ីដងវែងនឹងទទួលបានប្រាក់អំណោយ ម្នាក់ៗយ៉ាងតិច១០០ដុល្លារអាមេរិក រួមជាមួយគ្រឿងឧបភោគបរិភោគមួយចំនួនទៀត ។
លោកសន វិជ្ជបុត្រ និយាយថា «ទោះជាអ្វីដែលខ្ញុំ និងសប្បុរសជនរួមគ្នាជួយនៅពេលនេះមិនទាន់គ្រប់គ្រាន់នឹងតម្រូវការរបស់សិល្បករទាំងអស់ក្តី ប៉ុន្តែនេះគឺជាទឹកចិត្តដែលខ្ញុំនិងសប្បុរសជនមាន ។ ខ្ញុំក៏រំពឹងដែរថា ប្រជាពលរដ្ឋខ្មែរ នឹងជួយគាំទ្រ លើកទឹកចិត្តបន្តដល់សិល្បៈ ក៏ដូចជាសិល្បករផ្នែកចាប៉ីដងវែងនេះ» ៕
ចែករំលែកព័តមាននេះ