យុទ្ធជនពិការនិងប្រពន្ធកូនលើកម្រាមដៃ១០សុំសម្តេចតេជោជួយ
ខេត្តកំពង់ឆ្នាំង ៖ អតីតយុទ្ធជនម្នាក់ដែលពិការជើងដោយសារជាន់មីន រួមទាំងភរិយាក៏ពិការដែរនោះ បានលើកដៃសំពះអំពាវនាវដល់ប្រមុខរាជរដ្ឋាភិបាល
ខេត្តកំពង់ឆ្នាំង ៖ អតីតយុទ្ធជនម្នាក់ដែលពិការជើងដោយសារជាន់មីន រួមទាំងភរិយាក៏ពិការដែរនោះ បានលើកដៃសំពះអំពាវនាវដល់ប្រមុខរាជរដ្ឋាភិបាល សូមជួយដល់គ្រួសារគាត់ផង ព្រោះក្នុងពេលនេះមានការអភិវឌ្ឍច្រាំងទន្លេ ហើយអាជ្ញាធរតម្រូវឱ្យប្រជាពលរដ្ឋរស់នៅតាមដងទន្លេចាកចេញទៅតាំងទីលំនៅថ្មី លើដីក្នុងគម្រោងបង់រំលស់ មានតម្លៃចាប់ពីជាង២ពាន់ទៅជាង៣ពាន់ដុល្លារ តែគ្រួសារគាត់គ្មានលទ្ធភាព ។ គ្រួសារខាងលើនេះ មានទីលំនៅក្នុងភូមិចុងកោះ សង្កាត់ផ្សារឆ្នាំង ក្រុងកំពង់ឆ្នាំង ។
លោក ជឿន លឿន អាយុ៤២ឆ្នាំ ជាអតីតយុទ្ធជនពិការ រៀបរាប់ថា ប្រពន្ធគាត់ឈ្មោះ ឡាយ ថា អាយុ៥៩ឆ្នាំ គ្រួសារគាត់មានកូនប្រុសម្នាក់ តែបែកមានប្រពន្ធហើយ និងសព្វថ្ងៃនេះបានទុកកូនៗពួកគេ៣នាក់ឱ្យគាត់ជួយមើលថែ ។ រូបគាត់ជាអតីតយោធាស្រុកកំពង់លែង តែបានពិការដោយសារជាន់មីននៅឆ្នាំ១៩៨៩ ក្នុងសមរភូមិវាលរោទ ស្ថិតក្នុងព្រំប្រទល់៣ខេត្ត គឺកំពង់ឆ្នាំង កំពង់ចាម និងកំពង់ធំ ។
ផ្ទះដែលគាត់រស់នៅនេះគឺតាំងពីឆ្នាំ១៩៨៧មកម្ល៉េះ ដោយរស់នៅជាប់មាត់ទន្លេ ប៉ុន្តែពេលនេះអាជ្ញាធរខេត្តធ្វើការអភិវឌ្ឍច្រាំងទន្លេ ដោយឱ្យប្រជាពលរដ្ឋចាកចេញទៅរស់នៅលើដីបង់រំលស់ ដែលរៀបចំដោយអាជ្ញាធរខេត្ត ។
ដោយសារបែបនេះហើយទើបគាត់ជួបបញ្ហា គឺគ្មានលទ្ធភាពទិញដីបង់រំលស់ ដែលមានតម្លៃពីជាង២ពាន់ទៅជាង៣ពាន់ដុល្លារឡើយ ។ ពេលនេះ រូបគាត់និងភរិយាដែលជាជនពិការដែរនោះមានតែការអំពាវនាវដល់សប្បុរសជន មន្ត្រីជំនាញ និងប្រមុខរាជរដ្ឋាភិបាល មេត្តាជួយរកដីឱ្យគ្រួសារគាត់រស់នៅផង ព្រោះសព្វថ្ងៃនេះគាត់ក្រីក្រខ្លាំងណាស់ គ្មានរកអ្វីបានទេក្រៅពីប្រាក់ខែជនពិការជាង៣០ម៉ឺនរៀលប៉ុណ្ណោះ ។
បើតាមមន្ត្រីអាជ្ញាធរមូលដ្ឋានឲ្យដឹងថា តាមគម្រោងរបស់អាជ្ញាធរខេត្ត នឹងមានការបន្ធូរបន្ថយច្រើនចំពោះជនពិការ ស្ត្រីចាស់ជរាជាដើម ក្នុងការទៅរស់នៅលើដីថ្មីបង់រំលស់នោះ ប៉ុន្តែសម្រាប់អតីតយុទ្ធជនពិការឈ្មោះ ជឿន លឿន នេះពិតជាក្រីក្រខ្លាំងណាស់ សូម្បីបង់រំលស់ត្រឹមតែ១ខែ២០ម៉ឺនរៀល ក៏គ្មានលទ្ធភាពទិញដែរ ៕
ចែករំលែកព័តមាននេះ