ខេត្តបន្ទាយមានជ័យ ៖ មន្ត្រីជាន់ខ្ពស់ក្នុងកងរាជអាវុធហត្ថខេត្តមួយរូបដែលគេស្គាល់ថា ធ្លាប់ជាមេបញ្ជាការរងនិងក្រោយការកែសម្រួលមានតួនាទីជាអនុប្រធានមន្ទីរផែនការប្រតិបត្តិការរបស់កងរាជអាវុធហត្ថខេត្ត បានត្រូវកម្លាំងកងរាជអាវុធហត្ថខេត្តដឹកនាំផ្ទាល់ដោយលោកឧត្តមសេនីយ៍ត្រីរ័ត្ន ស្រ៊ាង ចាប់ឃាត់ខ្លួនកាលពីវេលាម៉ោង៤និង៣០នាទីរសៀលថ្ងៃទី២៣ ខែមីនា ឆ្នាំ២០១១ នៅអតីតទីសត្តឃាតជ្រូក ស្ថិតក្នុងភូមិបាលិលេយ្យ សង្កាត់ប៉ោយប៉ែត ក្រុងប៉ោយប៉ែត ពីបទជាប់ពាក់ព័ន្ធនឹងករណីផលិតនិងចែកចាយគ្រឿងញៀន ។
លោកឧត្តមសេនីយ៍ត្រីរ័ត្ន ស្រ៊ាង មេបញ្ជាការកងរាជអាវុធហត្ថខេត្ត មានប្រសាសន៍ថា បន្ទាប់ពីសមត្ថកិច្ចកងរាជអាវុធហត្ថធ្វើការបង្ក្រាបទីតាំងផលិតនិងចែកចាយគ្រឿងញៀនដ៏ធំមួយកន្លែងក្នុងភូមិបាលិលេយ្យ សង្កាត់ប៉ោយប៉ែត ក៏មានការស្រាវជ្រាវ និងឈានដល់ការឃាត់ខ្លួនឈ្មោះហាម ម៉េង ភេទប្រុស អាយុ៣៧ឆ្នាំ មានតួនាទីជាអនុប្រធានមន្ទីរផែនការប្រតិបត្តិការកងរាជអាវុធហត្ថខេត្ត ។
ចំណែកលោកពេជ្រ វិជ្ជាធរ ចៅក្រមស៊ើបអង្កេតសាលាដំបូងបានមានប្រសាសន៍ប្រាប់អ្នកកាសែតនៅវេលាម៉ោង១០ព្រឹកថ្ងៃទី២៤ មីនាថា ឈ្មោះហាម ម៉េង ត្រូវបានបញ្ជូនទៅឃុំខ្លួនបណ្តោះអាសន្ននៅពន្ធនាគារខេត្ត នាវេលាម៉ោង៨និង៣០នាទីយប់ថ្ងៃទី២៣ មីនា ដើម្បីធ្វើការស្រាវជ្រាវបន្ត តែចំពោះការពាក់ព័ន្ធនឹងករណីណាមួយនោះ លោកមិនទាន់ហ៊ានប្រាប់នៅឡើយនោះទេ ។ ពាក់ព័ន្ធនឹងការឃុំខ្លួនឈ្មោះហាម ម៉េង នេះជាបណ្តោះអាសន្ន បើតាមប្រភពព័ត៌មានផ្លូវការថា ពាក់ព័ន្ធនឹងបញ្ហាគ្រឿងញៀនដែលកម្លាំងកងរាជអាវុធហត្ថខេត្តបានចុះបង្ក្រាបទីតាំងផលិត និងកែច្នៃគ្រឿងញៀនមួយកន្លែងកាលពីថ្ងៃទី២២ មីនា នៅប៉ោយប៉ែត ។
គួររំលឹកថា ទីតាំងលួចកែច្នៃផលិតនិងចែកចាយថ្នាំញៀនធំចំនួន២កន្លែងកណ្តាលក្រុងប៉ោយប៉ែត បានត្រូវកម្លាំងកងរាជអាវុធហត្ថខេត្តបន្ទាយមានជ័យ សហការជាមួយកម្លាំងប៉េអឹម លើផ្ទៃប្រទេសឆ្មក់ចូលបង្ក្រាបកាលពីវេលាម៉ោង១០យប់ថ្ងៃទី២២ មីនា និងចាប់ខ្លួនជនសង្ស័យប្រុសស្រី៣នាក់ ព្រមទាំងរឹបអូសបានឧបករណ៍កែច្នៃផលិតថ្នាំញៀនមួយចំនួនធំ និងផលិតផលថ្នាំញៀនប្រភេទយ៉ាម៉ា (WY) ជាងមួយម៉ឺន គ្រាប់ ។
ជនសង្ស័យដែលកម្លាំងប៉េអឹមធ្វើការឃាត់ខ្លួននេះរួមមាន១-ឈ្មោះលី សេងឡា ភេទប្រុស អាយុ៣៨ឆ្នាំ មានស្រុកកំណើតនៅស្រុកទ្រាំង ខេត្តតាកែវ ២-ឈ្មោះដាក់រ៉ូនី ខាន់តាក់គិរី ជាជនជាតិសៀម ត្រូវជាប្រពន្ធរបស់ឈ្មោះលី សេងឡា និង៣-ឈ្មោះឆេង ដឺលីន ភេទប្រុស អាយុ៣០ឆ្នាំ មានស្រុកកំណើតនៅស្រុកកោះធំ ខេត្តកណ្តាល ។ ពួកគេទាំង៣នាក់ស្នាក់នៅបន្ទប់ជួលម្ខាងផ្លូវពីគ្នាដោយឈ្មោះឆេង ដឺលីន នៅបន្ទប់ជួលផ្សេងពីឈ្មោះលី សេងឡា និងប្រពន្ធ។
ក្នុងការបង្ក្រាបទីតាំងកែច្នៃនិងផលិត ព្រមទាំងចែកចាយថ្នាំញៀនទាំង២កន្លែងនេះ សមត្ថកិច្ចរឹបអូសបានឧបករណ៍កែច្នៃសម្រាប់ផលិតយ៉ាងច្រើនសន្ធឹកសន្ធាប់ មានទាំងម៉ាស៊ីនសម្ងួត និងវត្ថុធាតុផ្សំជាច្រើនមុខ ជញ្ជីងសម្រាប់ថ្លឹង ព្រមទាំងថ្នាំញៀនប្រមាណជាងមួយម៉ឺនគ្រាប់។ ចំណែកនៅក្នុងបន្ទប់របស់ពួកគេទាំង២កន្លែងឃើញមានប្រភេទម្សៅលាយហើយពុំទាន់ផលិតជាច្រើនដាក់ក្នុងចាន ហើយក៏មានទាំងគ្រាប់កាំភ្លើងអាកាចំនួនមួយបង់មាន២៥គ្រាប់ក្នុងបន្ទប់របស់ប្តីប្រពន្ធជនជាតិសៀមនោះផងដែរ ។
ក្នុងប្រតិបត្តិការបង្ក្រាបនេះ គេឃើញមានវត្តមានលោកថាច់ ចាន់បូរ៉ុម នាយរងការិយាល័យ ស្រាវជ្រាវប្រឆាំងគ្រឿងញៀននៃកងរាជអាវុធហត្ថលើផ្ទៃប្រទេស រួមជាមួយកងកម្លាំងខេត្ត និងស្រុក ។ តាមលោកឱ បូរិន មេបញ្ជាការរងកងរាជអាវុធហត្ថខេត្តបន្ទាយមានជ័យបានថ្លែងប្រាប់អ្នកយកព័ត៌មានថា ប្រតិបត្តិការបង្ក្រាបទីតាំងផលិត និងចែកចាយខាងលើនេះ គឺអនុវត្តតាមបទបញ្ជាផ្ទាល់ពីលោកនាយឧត្តមសេនីយ៍ផ្កាយមាស៤ សៅ សុខា អគ្គមេបញ្ជាការរងកងយោធពលខេមរភូមិន្ទ និងជាមេបញ្ជាការកងរាជអាវុធហត្ថលើផ្ទៃប្រទេស ព្រមទាំងការណែនាំបញ្ជាផ្ទាល់ពីលោកឧត្តមសេនីយ៍ត្រី រ័ត្ន ស្រ៊ាង មេបញ្ជាការកងរាជអាវុធហត្ថខេត្ត និងលោកម៉ែន ភិរម្យ មេបញ្ជាការរង និងជាប្រធានមន្ទីរស្រាវជ្រាវយុត្តិធម៌នៃកងរាជអាវុធហត្ថខេត្ត និងកម្លាំងប៉េអឹមក្នុងក្រុងចូលរួមផងដែរ ។ សកម្មភាពចុះបង្ក្រាបទាំងយប់នេះបានផ្អាកនៅវេលាម៉ោងជិត១២យប់ថ្ងៃដដែល ។ ចំណែកវត្ថុតាង និងជនសង្ស័យត្រូវបានបញ្ជូនទៅទីបញ្ជាការកងរាជអាវុធហត្ថខេត្ត ទើបឈានដល់ការចាប់ខ្លួនមន្ត្រីប៉េអឹមរូបនេះ ៕
រក្សា+ស.អមតៈ
ចែករំលែកព័តមាននេះ