ជាងខ្វះបច្ចេកទេស វាយកម្ទេចផ្ទះវីឡាមួយកន្លែង បាក់ជញ្ជាំងមួយផ្ទាំងធំចូលទៅក្នុងហាងលក់ទំនិញ
រាជធានីភ្នំពេញ ៖ ផ្ទះវីឡាដ៏ធំមួយដែលគេដឹងថាជាផ្ទះរបស់លោក ប៉ា សុជាតិវង្ស អភិបាលសាលារាជធានីភ្នំពេញ ដែលទើបតែទិញ
រាជធានីភ្នំពេញ ៖ ផ្ទះវីឡាដ៏ធំមួយដែលគេដឹងថាជាផ្ទះរបស់លោក ប៉ា សុជាតិវង្ស អភិបាលសាលារាជធានីភ្នំពេញ ដែលទើបតែទិញ និងមានគម្រោងសាងសងង់ជាថ្មីបានបាក់ជញ្ជាំងថ្មមួយផ្ទាំងធំចូលទៅក្នុងហាងលក់សម្ភារប្រើប្រាស់មកពីប្រទេសជប៉ុនមួយកន្លែងដែលមានយីហោ TOTO ដែលមានជញ្ជាំងជាប់គ្នា ខណៈដែលមានក្រុមជាងមួយក្រុមនាំគ្នាវាយកម្ទេចដោយខ្វះការប្រុងប្រយ័ត្នក៏បណ្តាលឲ្យបាក់នោះ សំណាងល្អមិនបានបង្កឲ្យមានមនុស្សណាម្នាក់រងគ្រោះថ្នាក់។
ហេតុការណ៍នេះដែរ បានបង្កឱ្យមានការភ្ញាក់ផ្អើលកើតឡើងកាលពីវេលាម៉ោង២ និង៣០នាទីរសៀល ថ្ងៃទី២០ ខែមករា ឆ្នាំ២០១៧ នេះ នៅចំណុចហាងលក់សម្ភារប្រើប្រាស់មកពីប្រទេសជប៉ុនយីហោ TOTO (ទល់មុខវត្តចិនដំដែក) ផ្លូវលេខ៤៧ ក្នុងសង្កាត់ស្រះចក ខណ្ឌដូនពេញ។ តាមប្រភពព័ត៌មានពីបុគ្គលិកបម្រើការក្នុងហាងខាងលើបានបានប្រាប់ឱ្យដឹងថា មុនពេលកើតហេតុពួកនាងកំពុងតែប្រមាណជាង១០នាក់ កំពុងតែនាំគ្នារៀបចំលក់ដូរ និងនាំភ្ញៀវដើររកទិញទំនិញនៅក្នុងហាងសុខៗនៅក៏ស្រាប់តែឭសំឡេងបាក់ជញ្ជាំងថ្មម្ខាងលាន់ឮសូរគ្រាំង ដោយពួកនាង និងភ្ញៀវមានការភិតភ័យយ៉ាងខ្លាំងនាំគ្នារត់ចែកជើងចេញទៅខាងក្រៅហាងទាំងអស់គ្នា។
ដោយការបាក់ជញ្ជាំងថ្មមួយផ្ទាំងធំនេះ គឺបណ្តាលមកពីក្រុមជាងមួយក្រុមនាំគ្នាដែលកំពុងតែនាំគ្នាវាយផ្ទះវីឡាមួយ ដែលមានជញ្ជាំងជាប់គ្នានោះនាំគ្នាវាយកម្ទេចដោយខ្វះការប្រុងប្រយ័ត្នទើបបណ្តាលឲ្យបាក់ចូលមកខាងក្នុងហាងរបស់នាង ខណៈពេលដែលពួកនាងកំពុងតែនៅខាងក្នុង លក់ទំនិញឲ្យភ្ញៀវនោះ។ តាមប្រភពពីមន្ត្រីមូលដ្ឋានម្នាក់បានប្រាប់ឱ្យដឹងថា ករណីបាក់ជញ្ជាំងថ្មមួយផ្ទាំងធំចូលទៅខាងក្នុងហាងលក់សម្ភារប្រើប្រាស់មកពីប្រទេសជប៉ុននេះ ពិតជាមានប្រាកដមែនតែមិនបានបណ្តាលឲ្យមានមនុស្សណាម្នាក់រងគ្រោះថ្នាក់ឡើយ ដោយបង្កមកពីក្រុមជាងទាំងនោះធ្វើការដោយខុសបច្ចេកទេសទើបបណ្តាលឲ្យមានរឿងបែបនេះកើតឡើង។
ក្រោយពេលដែលកើតហេតុរួចហើយ ក៏មានអ្នកតំណាងភាគីខាងម្ចាស់ផ្ទះបង្កចេញមុខមកធ្វើការដោះស្រាយ ដើម្បីព្រមសងថ្លៃខូចខាតសម្ភារហាងដែលរងការខូចខាត និងធ្វើជញ្ជាំងសារជាថ្មីឡើងវិញ ដើម្បីបញ្ចប់រឿងកុំឲ្យវែងឆ្ងាយ។ ផ្ទះវីឡាដ៏ធំមួយខាងលើនេះ ត្រូវបានប្រភពមួយចំនួនលួចប្រាប់ឱ្យដឹងថា ជាផ្ទះរបស់លោក ប៉ា សុជាតិវង្ស អភិបាលរាជធានីភ្នំពេញដែលទើបតែនឹងទិញពីគេ ដោយមានគម្រោងសាងសង់ជាថ្មីក៏ជួលក្រុមជាងមួយក្រុមឲ្យវាយកម្ទេច តែដោយសារតែការធ្វេសប្រហែសក៏ធ្វើឲ្យបាក់ជញ្ជាំងថ្មមួយផ្ទាំងធំចូលទៅក្នុងហាងខាងលើតែម្តង៕
ចែករំលែកព័តមាននេះ