សូមសរសើរ ! ព្រះរាជអាជ្ញាបញ្ជាឲ្យដោះលែងស្ត្រីអ្នករើសអេតចាយ
ខេត្តកំពង់ស្ពឺ ៖ បន្ទាប់ពី«កោះសន្តិភាព»ចេញផ្សាយអត្ថបទមួយក្រោមចំណងជើងថា ក្រោយចាប់ខ្លួនស្ត្រីរើសអេតចាយ នគរបាលស្រុកភ្នំស្រួចរងការរិះគន់យ៉ាងចាស់ដៃ …
ខេត្តកំពង់ស្ពឺ ៖ បន្ទាប់ពី«កោះសន្តិភាព»ចេញផ្សាយអត្ថបទមួយក្រោមចំណងជើងថា ក្រោយចាប់ខ្លួនស្ត្រីរើសអេតចាយ នគរបាលស្រុកភ្នំស្រួចរងការរិះគន់យ៉ាងចាស់ដៃ …
ខេត្តកំពង់ស្ពឺ ៖ បន្ទាប់ពី«កោះសន្តិភាព»ចេញផ្សាយអត្ថបទមួយក្រោមចំណងជើងថា ក្រោយចាប់ខ្លួនស្ត្រីរើសអេតចាយ នគរបាលស្រុកភ្នំស្រួចរងការរិះគន់យ៉ាងចាស់ដៃ នៅល្ងាចថ្ងៃទី២០ ខែមករា ឆ្នាំ២០១៧នេះ ស្ត្រីអ្នករើសអេតចាយរូបនោះត្រូវបានព្រះរាជអាជ្ញាអមសាលាដំបូងខេត្តកំពង់ស្ពឺបញ្ជាឲ្យសមត្ថកិច្ចដោះលែងវិញហើយ ។
គូររម្លឹកថា ស្ត្រីម្នាក់ឈ្មោះ សោម សុខ ហៅ នី សុខ អាយុ២៥ឆ្នាំ ជាអ្នករើសអេតចាយ រស់នៅក្នុងភូមិពាមអន្ទង់ ឃុំតាំងសំរោង ស្រុកភ្នំស្រួច ខេត្តកំពង់ស្ពឺ ត្រូវបានសមត្ថកិច្ចប៉ុស្តិ៍រដ្ឋបាលឃុំត្រែងត្រយឹងចាប់ខ្លួនកាលពីល្ងាចថ្ងៃទី១៩ ខែមករា ឆ្នាំ២០១៧ នៅចំណុចភូមិទី១ ឃុំត្រែងត្រយឹង តាមពាក្យបណ្តឹងរបស់ឈ្មោះ ជៀន គីមយ៉ូ រស់នៅរាជធានីភ្នំពេញ ដែលប្តឹងចោទប្រកាន់ពីបទលួចដែក ។
ស្ត្រីសង្ស័យបានរៀបរាប់ទាំងទឹកភ្នែកប្រាប់អ្នកយកព័ត៌មានថា នាងគឺជាស្ត្រីមេម៉ាយកូន២នាក់ កូនស្រីបងអាយុ៨ឆ្នាំ កូនប្រុសប្អូនអាយុ៥ឆ្នាំ ហើយម្តាយឈ្មោះ យឹម ហេង អាយុ៥២ឆ្នាំ មានជំងឺប្រចាំកាយទៀតផង ។ តាំងពីចែកផ្លូវជាមួយប្តីរួចមក នាងបានប្រកបរបរដើររើសអេតចាយលក់យកប្រាក់ដើម្បីទិញអង្ករ និងម្ហូប ព្រមទាំងថ្នាំព្យាបាលម្តាយទៀត ។ រហូតដល់ថ្ងៃទី១៩ ខែមករា នាងបានទៅរើសកម្ទេចដែកក្នុងដីឡូត៍មួយកន្លែង គោលបំណងយកទៅលក់ដើម្បីទិញបាយឱ្យកូន និងម្តាយបានហូប ពេលកំពុងរើសក៏ស្រាប់តែត្រូវម្ចាស់គេមកចាប់ខ្លួនប្រគល់ឱ្យនគរបាល ដោយចោទថា ជាចោរលួចដែកទៅវិញ ។
ស្ត្រីឈ្មោះ យឹម ហេង អាយុ៥២ឆ្នាំ ម្តាយស្ត្រីសង្ស័យ បានលើកដៃសំពះ និងសំណូមពរដល់តុលាការ សូមមេត្តាផ្តល់ក្តីអាណិតដល់រូបគាត់ ជួយសម្រួលឱ្យកូនស្រីរបស់គាត់រួចផុតពីការចោទប្រកាន់ ដើម្បីវិលមកផ្ទះប្រកបរបរចិញ្ចឹមកូនៗ និងរូបគាត់ជាម្តាយផង សព្វថ្ងៃគាត់រស់នៅបានអាស្រ័យលើកូនស្រីម្នាក់នេះដើររើសអេតចាយយកមកលក់ទិញថ្នាំសង្កូវព្យាបាលជំងឺគាត់ ដើម្បីមានជីវិតរស់នៅមើលឃើញមុខចៅៗ បើកូនត្រូវជាប់គុក ជីវិតគាត់ និងចៅមិនដឹងថារំពឹងលើអ្វីទៀតទេ ។
ប្រភពពីសមត្ថកិច្ចនគរបាលម្នាក់បានឲ្យដឹងថា បន្ទាប់ពីដឹងរឿងដ៏គួរសង្វេគរបស់ស្ត្រីសង្ស័យ មន្ត្រីប៉ូលិសជាន់ខ្ពស់នៅខេត្តកំពង់ស្ពឺម្នាក់បានស្នើទៅតុលាការសុំឲ្យជួយសម្រួលដោះលែងស្ត្រីសង្ស័យ ហើយលោកព្រះរាជអាជ្ញាអមសាលាដំបូងខេត្តកំពង់ស្ពឺក៏បញ្ជាមកខាងសមត្ថកិច្ចវិញ ដោយមិនបាច់កសាងសំណុំរឿងបញ្ជូនស្ត្រីសង្ស័យទៅតុលាការទេ ដោយគ្រាន់តែធ្វើលិខិតកិច្ចសន្យា រួចដោះលែងឲ្យមានសេរីភាពវិញទៅ ។
ជាចុងក្រោយ ទាំងស្ត្រីអ្នករើសអេតចាយ ទាំងម្តាយ និងកូនៗ ក៏សូមថ្លែងអំណរគុណដល់លោកព្រះរាជអាជ្ញាអមសាលាដំបូងខេត្តកំពង់ លោកស្នងការនគរបាលខេត្ត និងសមត្ថកិច្ចគ្រប់ជាន់ថ្នាក់ដែលបានយោគយល់អធ្យាស្រ័យយល់ព្រមដោះលែងគាត់ឲ្យមានសេរីភាព ជាពិសេសក៏សូមថ្លែងអំណរគុណដល់ សារព័ត៌មាន «កោះសន្តិភាព» ដែលបានជួយផ្សព្វផ្សាយពីជីវិតក៏កម្សត់ និងដ៏សែនសង្វេគរបស់ក្រុមគ្រួសារគាត់ រហូតដល់លោកព្រះរាជអាជ្ញា ព្រមដោះលែងគាត់ឲ្យមានសេរីភាពវិញ ៕
ចែករំលែកព័តមាននេះ