រាជធានីភ្នំពេញ ៖ សេចក្តីរាយការណ៍បឋមឱ្យដឹងថា មានការភ្ញាក់ផ្អើលដល់ប៉ូលិសប៉ុស្តិ៍ចោមចៅ ខណៈយុវជនជាមុខសញ្ញាចោរលួចទូរស័ព្ទដៃម្នាក់ ដែលត្រូវកម្លាំងចាប់ខ្លួនបានកាលពីថ្ងៃទី១៦ មករា កន្លងមក ដោយធ្វើការបញ្ជូនជនសង្ស័យនេះ ទៅខាងព្រហ្មទណ្ឌខណ្ឌពោធិ៍សែនជ័យ ដើម្បីចាត់ការតាមច្បាប់បន្តទៀត ។
តែអ្វីដែលភ្ញាក់នោះ ស្រាប់តែនៅព្រឹកថ្ងៃទី២០ មករា នេះ បែរលេចមុខជនសង្ស័យរូបនេះ មកសុំម៉ូតូរបស់ខ្លួនពីកម្លាំងប៉ុស្តិ៍ចោមចៅវិញ ដែលធ្វើឱ្យប៉ូលិសគ្រប់គ្នាងឿងឆ្ងល់ថា ទើបចាប់បាន៤ថ្ងៃមុនសោះ បែរជារួចខ្លួនដើរយ៉ាងសេរីទៅវិញ។
ជនសង្ស័យខាងលើមានឈ្មោះអេង លី អាយុ២២ឆ្នាំ មានទីលំនៅផ្ទះជួលក្នុងភូមិបប្រកខាងត្បូង ក្នុងសង្កាត់កាកាប ។ ពេលដែលប៉ូលិសភ្ញាក់ផ្អើល ក៏បានសួរទៅជនសង្ស័យថា «ម៉េចក៏ឯងរួចខ្លួនចេញមកបាន?» ជនសង្ស័យឆ្លើយថា «មានអីពិបាក ឱ្យគេតែ៤-១០ម៉ឺនរៀលទៅ…បានហើយ» ។ ពេលនោះប៉ូលិសក៏សួរបន្តថា «ឯងឱ្យអ្នកណាគេ?» ជនសង្ស័យរូបនេះ មិនបានឆ្លើយនឹងសំណួរចុងក្រោយរបស់ប៉ូលិសទេ ។
ទោះបីជាយ៉ាងណា ប៉ូលិសប៉ុស្តិ៍ចោមចៅមិនបានប្រគល់ម៉ូតូទៅឱ្យសង្ស័យទេ ដោយប្រាប់ថា ទៅយកឯកសារឱ្យត្រឹមត្រូវមក ។ បន្ទាប់មក គេឃើញជននេះជិះម៉ូតូផ្សេងទៀត ចេញបាត់ទៅ ។
ចែករំលែកព័តមាននេះ