ខេត្តព្រៃវែង ៖ មន្ត្រីជំនាញពេទ្យសត្វខេត្តព្រៃវែង កាលពីព្រឹកថ្ងៃទី១៩ មករា បានបើកប្រតិបត្តិការចុះត្រួតពិនិត្យអនាម័យ និងផលិតផលដែលមានដើមពីសត្វ ស្ថិតនៅចំណុចភូមិព្រៃអាស្ទាំង ឃុំអង្គររាជ្យ ស្រុកព្រះស្តេច ខេត្តព្រៃវែង ដោយរកឃើញគ្រឿងក្នុងគោខូចគុណភាព១២៥គីឡូក្រាម ដែលត្រូវឈ្មួញនាំចូលពីប្រទេសវៀតណាម តាមច្រកទ្វារអន្តរជាតិចក្រី ព្រមទាំងធ្វើការឃាត់ខ្លួនឈ្មួញ ដែលនាំចូលម្នាក់ផងដែរ ។
ប្រភពឱ្យដឹងថា ឈ្មួញដែលដឹកគ្រឿងក្នុងគោខូចគុណភាព ឈ្មោះលាស់ ទ្រី ភេទប្រុស អាយុ៥៥ឆ្នាំ មានទីលំនៅនៅភូមិកោះតាជោ ឃុំគគីធំ ស្រុកគៀនស្វាយ ខេត្តកណ្តាល ។ គ្រឿងក្នុងគោដែលរកឃើញនេះជាប្រភេទសាច់ដែលខូចគុណភាព ដែលមានដាក់លាយសារធាតុគីមីអាចរក្សាទុកបានយូរ ហើយជាពិសេសការដឹកជញ្ជូនគឺគ្មានការត្រួតពិនិត្យពីមន្ត្រីជំនាញ ដោយពុំមានលិខិតបញ្ជាក់ពីអនាម័យសត្វ និងគុណភាពផលិតផលពីមន្ត្រីពេទ្យសត្វ និង ពុំមានលិខិតអនុញ្ញាតិអោយនាំចូលពីក្រសួងកសិកម្ម រុក្ខាប្រមាញ់និងនេសាទនោះទេ ។
បច្ចុប្បន្ន ឈ្មួញដែលប្រព្រឹទ្ធ ត្រូវការិយាល័យជំនាញបានកសាងសំណុំរឿងបញ្ជូនទៅមន្ទីរកសិកម្ម រុក្ខាប្រមាញ់ និងនេសាទ ដើម្បីចាត់ការបន្ត ។
ចែករំលែកព័តមាននេះ