ប្រទេសបារាំង ៖ លោកចៅហ្វាយក្រុង Anne Hidalgo បានស្នើសុំថវិកាសម្រាប់កែកុនប៉មអេហ្វែល(Eiffel Tower)ដែលមានទឹកប្រាក់៣០០លានអឺរ៉ូ ស្មើប្រមាណ៣១៨លានដុល្លារអាមេរិក ។ គម្រោងកែកុននោះរួមមាន ការធ្វើឲ្យកាន់តែប្រសើរទៅលើជណ្តើរយន្ត ការពង្រឹងសន្តិសុខ ការបំពាក់ភ្លើងលម្អ និងកែកុនច្រកចូលទស្សនា ។
ប៉មអេហ្វែលបានទាក់ទាញភ្ញៀវទេសចរឲ្យចូលមកទស្សនាចំនួន៦លាននាក់ក្នុងមួយឆ្នាំៗ ហើយអាចរកថវិកាជូនជាតិរហូតដល់៨២លានអឺរ៉ូ ស្មើនឹងប្រមាណ៨៧លានដុល្លារ។ ថវិកាប្រហែលជា ១៣,៧លានអឺរ៉ូ (១៤,៥លានដុល្លារ)ត្រូវប្រើប្រាស់សម្រាប់ជួសជុលថែទាំ ។ ចំពោះគម្រោងកែកុនខាងលើវិញ គឺត្រូវដំឡើងប្រាក់ចំណាយប្រចាំឆ្នាំដល់ទៅ២០លានអឺរ៉ូ (២១លានដុល្លារ) ឯណោះ ។
ខាងការិយាល័យចៅហ្វាយក្រុងនិយាយថា ការកែលម្អនេះនឹងអាចពង្រឹងគុណភាពនៃការដើរកម្សាន្តទស្សនារបស់ភ្ញៀវទេសចរក្នុងទីក្រុងនៅប្រទេសបារាំង និងជួយឲ្យទីក្រុងប៉ារីសយកឈ្នះទីក្រុង Budapest និង Los Angeles ក្នុងការធ្វើជាម្ចាស់ផ្ទះសម្រាប់កីឡាអូឡាំពិកឆ្នាំ២០២៤ ផងដែរ ។
គួរបញ្ជាក់ថា ប៉មអេហ្វែលនេះត្រូវបានបញ្ចប់ការសាងសង់ក្នុងឆ្នាំ១៨៨៩ ដើម្បីអបអរគម្រប់ខួប១០០ឆ្នាំនៃបដិវត្តន៍បារាំង ។ ប៉មនេះដើមឡើយ គឺសាងសង់ឡើងជាបណ្តោះអាសន្នប៉ុណ្ណោះ ប៉ុន្តែអាជ្ញាធរសម្រេចថា ទុកវាសម្រាប់ការផ្សព្វផ្សាយវិទ្យុ ហើយក៏មិនបានរុះរើឡើយ។ វានៅក្នុងចំណោមបូជនីយដ្ឋាន ដែលមានភ្ញៀវមកទស្សនាច្រើនជាងគេលើពិភពលោក ។
មន្ត្រីបានបង្កើនសន្តិសុខនៅទីនោះ បន្ទាប់ពីមានព្រឹត្តិការណ៍ភេរវកម្មជាច្រើនករណីបន្តបន្ទាប់គ្នាក្នុងប្រទេសបារាំង ដែលបង្កការប៉ះពាល់យ៉ាងខ្លាំងដល់វិស័យទេសចរណ៍ ៕
ចែករំលែកព័តមាននេះ