រាជធានីភ្នំពេញ ៖ ស្ថាប័នមីក្រូហិរញ្ញវត្ថុនានាបានសម្តែងនូវសុទិដ្ឋិនិយមពីកំណើនឥណទាននៅឆ្នាំនេះ ដោយសារលក្ខខណ្ឌអាកាសធាតុ បរិយាកាសនយោបាយ និងកំណើនសេដ្ឋកិច្ចរបស់កម្ពុជានៅតែមានសញ្ញាល្អប្រសើរ ។
លោក ស៊ីម សេនាជាតិ អគ្គនាយកគ្រឹះស្ថានមីក្រូហិរញ្ញវត្ថុប្រាសាក់ បានថ្លែងកាលពីថ្ងៃទី១៨ មករា កន្លងមកថា លោកជឿជាក់ពីស្ថានភាពនៃការផ្តល់ឥណទានសម្រាប់ឆ្នាំនេះមានភាពល្អប្រសើរបើធៀបនឹងឆ្នាំមុន ដោយសារអាកាសធាតុរំពឹងថា នឹងមានភាពល្អប្រសើរ សេដ្ឋកិច្ចបន្តមានកំណើនរឹងមាំ និងស្ថានភាពនយោបាយនៅរក្សាភាពនឹងន ទោះបីជាមានការបោះឆ្នោតក្រុមប្រឹក្សាឃុំ-សង្កាត់ក្តី ។ លោកបន្តថា ៖ « ខ្ញុំរំពឹងថា ការផ្តល់ឥណទានរបស់យើង នឹងសម្រេចបានកំណើនប្រមាណ៣០% ធៀបនឹងឆ្នាំមុនមានកំណើនត្រឹម២០%ប៉ុណ្ណោះ » ។
ប្រាសាក់បានផ្តល់ឥណទានរហូតដល់១.០៣០លានដុល្លារ កើនពី៨៥៦លានដុល្លារកាលពីឆ្នាំ២០១៥ និងទំហំប្រាក់បញ្ញើបានកើនពី៤៦៧ ដល់៦១៩លានដុល្លារអាមេរិក ស្មើនឹងកំណើន៣២%ក្នុងចន្លោះឆ្នាំ២០១៥ និង២០១៦ ។
លោកឧកញ៉ា ហួត អេងតុង អគ្គនាយកគ្រឹះស្ថានមីក្រូហិរញ្ញវត្ថុហត្ថាកសិករ និងជាប្រធានសមាគមមីក្រូហិរញ្ញវត្ថុកម្ពុជា ក៏បានសម្ដែងនូវសុទិដ្ឋិនិយមផងដែរសម្រាប់ការផ្តល់ឥណទាននៅឆ្នាំនេះ ធៀបនឹងឆ្នាំមុន ។ លោកបន្ដថា ទំហំឥណទានរំពឹងកើនចន្លោះពី២៥ដល់៣០% ធៀបនឹងកំណើន២០%កាលពីឆ្នាំមុន ខណៈការផ្តល់ឥណទានចន្លោះឆ្នាំ២០១៥ និង២០១៦ បានកើនឡើងក្នុងទំហំទឹកប្រាក់ពី៣៦៥ ដល់៤៤៥លានដុល្លារអាមេរិក ។
លោកមានប្រសាសន៍ថា ៖ « ខ្ញុំនៅតែមានជំនឿថា ការផ្តល់ឥណទាននឹងកើនឡើងនៅឆ្នាំនេះ ដោយសារស្ថានភាពនយោបាយល្អ និងវិស័យដែលទ្រទ្រង់សេដ្ឋកិច្ចជាតិដូចជា វិស័យទេសចរណ៍ និងសំណង់នៅតែមានកំណើនខ្ពស់» ។
ទោះជាយ៉ាងណា បើតាមលោក គា បូរាណ អគ្គនាយកគ្រឹះស្ថានមីក្រូហិរញ្ញវត្ថុ AMK ហាក់ដូចជាស្ទាក់ស្ទើរក្នុងការនិយាយពីស្ថានភាពឆ្នាំនេះ ។ លោកបញ្ជាក់ថា ដោយសារស្ថានភាពឆ្នាំ២០១៦ មិនសូវមានភាពល្អប្រសើរ លោកមិនទាន់ហ៊ានសន្និដ្ឋាននៅឡើយទេ ប៉ុន្តែប្រសិនជាតម្លៃកសិផលរបស់កសិករមានភាពល្អប្រសើរ និងលក្ខខណ្ឌអាកាសធាតុអំណោយផល ការផ្តល់ឥណទាននឹងកើនឡើងធៀបនឹងឆ្នាំមុន ។
ការផ្តល់ឥណទានរបស់ AMK បានកើនឡើង១៨% នៅចន្លោះឆ្នាំ២០១៥ និង២០១៦ ដោយទំហំទឹកប្រាក់បានកើនពី១២៨ ដល់១៥២លានដុល្លារអាមេរិក ។
លោកបន្តថា ៖ « ខ្ញុំរំពឹងថា កំណើននៃការផ្តល់ឥណទានរបស់ AMK នឹងសម្រេចបានប្រមាណ២០% ដូចគ្នាកាលពីឆ្នាំ២០១៦ ដោយសារសម្ពាធឥណទានកើនឡើងក្នុងចំណោមប្រជាពលរដ្ឋ ។ ស្ថាប័នមីក្រូហិរញ្ញវត្ថុនានាបានប្រុងប្រយ័ត្នក្នុងការផ្តល់ឥណទាន ដោយសារកម្រិតនៃការផ្តល់ឥណទានបានកើនខ្ពស់រួចទៅហើយ » ។
ធនាគារជាតិនៃកម្ពុជា កាលពីឆ្នាំមុនបានដាក់ចេញនូវវិធានការមួយចំនួនដើម្បីបន្ថយល្បឿននៃការផ្តល់ឥណទានពីស្ថាប័នហិរញ្ញវត្ថុនានា និងបង្ការហានិភ័យក្នុងសេដ្ឋកិច្ចកម្ពុជា ៕
ចែករំលែកព័តមាននេះ