រាជធានីភ្នំពេញ ៖ បន្ទាប់ពីអាជ្ញាធរខណ្ឌពោធិ៍សែនជ័យបានចុះទៅណែនាំ និងជូនដំណឹងដល់ក្រុមអាជីវករក្រីក្រតាមជនបទជាយក្រុងដែលនាំគ្នាលក់តាមចិញ្ចើមផ្លូវដោយចោទថាធ្វើឱ្យប៉ះពាល់ដល់សណ្តាប់ធ្នាប់សាធារណៈ
រាជធានីភ្នំពេញ ៖ បន្ទាប់ពីអាជ្ញាធរខណ្ឌពោធិ៍សែនជ័យបានចុះទៅណែនាំ និងជូនដំណឹងដល់ក្រុមអាជីវករក្រីក្រតាមជនបទជាយក្រុងដែលនាំគ្នាលក់តាមចិញ្ចើមផ្លូវដោយចោទថាធ្វើឱ្យប៉ះពាល់ដល់សណ្តាប់ធ្នាប់សាធារណៈ បង្កឱ្យកកស្ទះចរាចរណ៍ បាត់បង់សោភ័ណភាព និងបង្កភាពអនាធិបតេយ្យលើដងផ្លូវ ដូចជាចោលសម្រាមជាដើម ជាច្រើនលើកច្រើនសាមកហើយ ។
ដោយឃើញអាជីវករនៅតែផ្គើនមិនព្រមរុះរើចេញ នៅវេលាម៉ោង៩យប់ថ្ងៃទី១៨ មករា លោកហែម ដារិទ្ធិ អភិបាលខណ្ឌពោធិ៍សែនជ័យ និងលោក សេង គន្ធ អភិបាលរងខណ្ឌបានដឹកនាំកម្លាំងចម្រុះ ចាត់វិធានការក្តៅចុះរុះរើសម្ភារនៅកន្លែង ដែលអាជីវករយកចិញ្ចើមផ្លូវលក់ដូរ ប្រកបមុខរបររកស៊ី ស្ថិតនៅតាមបណ្តោយផ្លូវទំនប់កប់ស្រូវ មុខរោងចក្រប៊ឺរី ក្នុងសង្កាត់ចោមចៅ ខណ្ឌពោធិ៍សែនជ័យ ដោយកំទេចចោលទាំងស្រុងតែម្តង ។
គួរបញ្ជាក់ផងដែរថា នៅតាមផ្លូវនេះអាជីវករលក់ដូរទាំងយប់ទាំងថ្ងៃ រហូតដល់ម៉ោង៨យប់ទើបឈប់ ។ បន្ទាប់ពីអាជីវករឈប់លក់ដូរហើយ អាជ្ញាធរខណ្ឌពោធិ៍សែនជ័យបានដឹកនាំកម្លាំងចុះទៅរុះរើគ្រែ និងរោងរបស់អាជីវករ
លើកដាក់រថយន្តយកទៅដុតចោលទាំងអស់ ។
លោក ហែម ដារិទ្ធិ បានឱ្យដឹងថា មុននឹងលោកចាត់វិធានការបែបនេះ កន្លងមកលោកធ្លាប់បានចុះអប់រំណែនាំ និងជូនដំណឹងប្រាប់ដល់ក្រុមអាជីវករអ្នកលក់ដូរទាំងអស់ជាច្រើនលើកជាច្រើនសាមកហើយ កុំឱ្យយកផ្លូវប្រកបមុខរបរអាជីកម្មបង្កភាពអនាធិបតេយ្យរញ៉េរញ៉ៃតាមផ្លូវ ប៉ះពាល់ដល់សណ្តាប់ធ្នាប់សាធារណៈនិងបង្កការកកស្ទះចរាចរណ៍ បាត់បង់សោភ័ណភាព និងបង្កជាបញ្ហាអនាម័យជាដើម ។
លោកក៏បានបញ្ជាក់ថា បញ្ហារំលោភយកផ្លូវធ្វើអាជីវកម្មបែបនេះ បានធ្វើឱ្យប៉ះពាល់យ៉ាងខ្លាំងដល់សង្គម តែក្រុមអាជីករទាំងអស់មិនព្រមស្តាប់ការហាមប្រាមរបស់អាជ្ញាធរឡើយ ថែមទាំងនៅបន្តលក់យ៉ាងគគ្រឹកគគ្រេងដដែល ហើយលោកបានទទួលបញ្ជាពីសាលារាជធានីភ្នំពេញ បានដឹកនាំកម្លាំងចុះទៅរុះរើគ្រែ និងរោងចោល ហើយប្រមូលដឹកយកទៅដុតចោលតែម្តង ដើម្បីកុំឱ្យអាជីវករនៅតែបន្តលក់ទៀត ។
ក្នុងករណីដូចគ្នានេះដែរនៅតាមបណ្តោយផ្លូវវេងស្រេងចំណុចស្តុបលូ៥ក៏មហារញ៉េរញ៉ៃផងដែរ តាំងពីមិនទាន់អភិវឌ្ឍន៍ជាផ្លូវបេតុង រហូតដល់ផ្លូវវេងស្រេងត្រូវបានស្ថាបនាជាផ្លូវបេតុងហើយក្តី ក៏ការលក់ដូររញ៉េរញ៉ៃនៅតែរំលោភ បំពានលើដងផ្លូវបង្កឱ្យមានការធ្វើដំណើរជួបការលំបាកនៅពេលព្រឹក និងល្ងាច ។ អ្នកធ្វើដំណើរបានស្តីបន្ទោសដល់អាជ្ញាធរ ដែលមិនបានយកចិត្តទុកដាក់ហើយមើលរំលងបញ្ហានេះ ៕
ចែករំលែកព័តមាននេះ