រាជធានីភ្នំពេញ ៖ តារាចម្រៀង២ដួងក្នុងផលិតកម្មហង្សមាស គឺអ្នកនាងយក់ ឋិតរដ្ឋា និងកញ្ញាសុន ស្រីពេជ្រ បានព្រមានដើរចេញពីផលិតកម្មហង្សមាស ក្នុងពេលផលិតកម្មនេះនាំចូលតារាចម្រៀង ថ្មីៗជាច្រើន ធ្វើឱ្យ
រាជធានីភ្នំពេញ ៖ តារាចម្រៀង២ដួងក្នុងផលិតកម្មហង្សមាស គឺអ្នកនាងយក់ ឋិតរដ្ឋា និងកញ្ញាសុន ស្រីពេជ្រ បានព្រមានដើរចេញពីផលិតកម្មហង្សមាស ក្នុងពេលផលិតកម្មនេះនាំចូលតារាចម្រៀង ថ្មីៗជាច្រើន ធ្វើឱ្យតារាចម្រៀងចាស់ៗមួយចំនួនហាក់កប់បាត់ ។
ការប្រកាសរបស់តារាចម្រៀងស្រីទាំងពីរនាក់នោះធ្វើឱ្យមានការចាប់អារម្មណ៍ពីមជ្ឈដ្ឋានអ្នកតាមដានសិល្បៈចម្រៀង ខណៈប្រិយមិត្តគាំតារាចម្រៀងទាំងពីរក៏សម្តែងការមិនពេញចិត្តដែរចំពោះផលិតកម្មហង្សមាស ដែលហាក់មិនសូវអើពើនឹងតារាចម្រៀងចាស់ៗ ។
នៅលើហ្វេសប៊ុក របស់តារាចម្រៀងកញ្ញា សុន ស្រីពេជ្រ កាលពីពេល ថ្មីៗកន្លងមកសរសេរបង្ហោះថា«ជម្រើសល្អគឺចាកចេញគេមានមនុស្សច្រើនហើយអីុចឹងយើងគួរចេញទៅចាប់យកទ្រនំថ្មីដែលផ្តល់ក្តីសង្ឃឹមថ្មីសម្រាប់យើងទាន់មានឱកាស» ។
បន្ទាប់ពីសាររបស់កញ្ញាសុន ស្រីពេជ្របង្ហោះបានប៉ុន្មានម៉ោង ស្រាប់តែលុបចេញវិញ ប៉ុន្តែតាមរយៈសារនោះគឺជាហេតុផលមួយដែលសមស្របទៅនឹងអ្វីដែលនាងធ្លាប់បានបញ្ជាក់ពីពេលកន្លងមក ។
កញ្ញាសុន ស្រីពេជ្រ ធ្លាប់អះអាងថា នាងអាចនឹងផ្លាស់ចេញពីផលិតកម្មហង្សមាស បន្ទាប់ពីផលិតកម្មមួយនេះហាក់មិនចេញបទ ថ្មីៗឱ្យនាងច្រៀង បូករួមទាំងមិនបានចូលរួមច្រៀងតាមឆាកប្រគំតន្ត្រី ធំៗផងដែរ ។ បច្ចុប្បន្នផលិតកម្មបានសម្រិតសម្រាំងតែបទសម័យថ្មី ដូច្នេះវាគឺជាមូលហេតុដែលនាងគ្មានបទច្រៀង ហើយអ្នកចម្រៀងដែលអាចច្រៀងបទពីសម័យដើមក៏ត្រូវបានកាត់បន្ថយ ។
សុន ស្រីពេជ្រ នៅមិនទាន់ទម្លាយឱ្យដឹងទេថា នាងនឹងផ្លាស់ទៅកាន់ផលិតកម្មថ្មីណាមួយនោះ ក្នុងពេលដែលជំហរនៃការចាកចេញពីផលិតកម្មហង្សមាសនៅមិនទាន់ប្រាកដនៅឡើយ ។
ដោយឡែកសម្រាប់តារាចម្រៀងជើងចាស់អ្នកនាងយក់ ឋិតរដ្ឋា ក៏ត្អូញត្អែរអំពីរឿងបែបនោះដែរ ហើយនាងព្រមាននឹងចាកចេញពីផលិតកម្មហង្សមាសដូចគ្នា ។
អ្នកនាងយក់ ឋិតរដ្ឋា សរសេរសារបង្ហោះតាមហ្វេសប៊ុកខ្លីថា«បើគិតថាខ្ញុំមិនមានអ្វីសំខាន់ សម្រាប់អ្នកទៅហើយ! សុំតែអ្នកនិយាយប្រាប់ខ្ញុំតែមួយម៉ាត់បានហើយថា មិនត្រូវការខ្ញុំទៀត! សោះនឹងខ្ញុំរង់ចាំលទ្ធផលចុងក្រោយទាំងអស់សង្ឃឹម !» ។
សារដ៏ខ្លីមួយនេះត្រូវប្រិយមិត្តគាំទ្រអ្នកនាង យក់ ឋិតរដ្ឋា យល់យ៉ាងច្បាស់ថា នាងសរសេរសំដៅទៅលើផលិតកម្មហង្សមាសក្នុងពេលដែលតារាចម្រៀងរូបនេះមិនសូវមានបទច្រៀងច្រើន និងឱកាសបង្ហាញមុខតាមឆាកតន្ត្រីដែលរៀបចំដោយផលិតកម្មមួយនេះក៏ស្ទើរតែគ្មានរូបនាងដែរ ។
ប្រិយមិត្តអ្នកគាំទ្រតារាចម្រៀងអ្នកនាងយក់ ឋិតរដ្ឋា ម្នាក់សរសេររិះគន់ផលិតកម្មហង្សមាសថា«មិនយល់ ហើយក៏ឆ្ងល់ថារស្មីហង្សមាសគេគិតយ៉ាងម៉េចចំពោះគាត់? កម្មវិធី ធំៗត្រូវបានរំលងពីគាត់ពីមួយទៅមួយ ឯ «ខុនស៊ើត» ពីមួយកម្មវិធីទៅមួយកម្មវិធី ពីមួយឆ្នាំទៅមួយឆ្នាំ ហេតុអីគ្មានវត្តមានគាត់? គាត់ក៏ជាតារាហង្សមាស មួយរូបដែរ តែហេតុអីគាត់គ្មានសកម្មភាពក្នុងកម្មវិធីទូរទស្សន៍ដូចគេគ្រប់គ្នា? ឬមួយមកពីគាត់មិនចេះរករឿងអុកឡុកដូចគេ? ហើយមានតែ ក្មេងៗជំនាន់ក្រោយឃើញឡើងច្រៀងអត់ឈប់ឈរ ឬមួយគិតថាគាត់អត់មានអ្នកគាំទ្រ? សូមចាំថា យក់ ថិតរដ្ឋា នៅតែមានអ្នកគាំទ្រជានិច្ច ទោះបីគាត់មានចម្រៀង ច្រៀងច្រើន ឬតិចតែអ្នកដែលស្រលាញ់ និងចងចាំគាត់គឺមិនអាចភ្លេចគាត់បាននោះទេ មិនមែនទាមទារឱ្យគាត់ល្បីល្បាញជាងគេដូចពីមុនទេ តែគ្រាន់តែចង់ឱ្យមានភាពស្មើគ្នារវាងតារាជើងចាស់ដូចគ្នាមិនមែនជាន់ផ្អៀងទៅតែខាងអ្នកញ៉ិកញ៉ក់ ក្មេងៗ ដូចរាល់ថ្ងៃនេះទេ ។ ឬមួយក៏ធ្វើដើម្បីឱ្យគាត់ អស់ចិត្តហើយដើរចេញ? គាត់មិនខ្វះកន្លែងដែលចាំស្វាគមន៍គាត់ទេ តែគាត់គ្រាន់តែមិនចេះdrama មិនចេះវ៉ៃអែបស៊ីអប មិនចេះកូរដូចគេ ទើបអ្នកមិនមើលឃើញតម្លៃនៃសមត្ថភាពគាត់ ។ ហើយបើចុងក្រោយគាត់គ្មានលទ្ធផលគ្មានកម្មវិធី ធំៗដូចគេ សូមប្រាប់គាត់ ត្រង់ៗទៅកុំឱ្យការរង់ចាំរបស់មនុស្ស ត្រង់ៗ និងមានសមត្ថភាពម្នាក់នេះ នៅទ្រាំឈឺចាប់បែបនេះ» ។
ព័ត៌មាននោះនៅមិនទាន់ច្បាស់លាស់នៅឡើយទេ ខណៈពេលដែលកោះសន្តិភាពនៅមិនទាន់អាចស្វែងរកការឆ្លើយបំភ្លឺពីតារាចម្រៀងទាំងពីរនាក់ ក៏ដូចជាអ្នកចាត់ការទូទៅរបស់ផលិតកម្មហង្សមាសបាននៅឡើយទេ គិតត្រឹមថ្ងៃទី១៩ ខែមករា ឆ្នាំ២០១៧ ៕
ចែករំលែកព័តមាននេះ