រាជធានីភ្នំពេញ ៖ ហេតុអ្វីបានជាគ្រឿងញៀន និងល្បែងស៊ីសង នៅតែមានក្នុងសង្កាត់ស្រះចក? នេះជាសំណួរ ដែលប្រជាពលរដ្ឋរស់នៅក្នុងតំបន់បឹងកក់ សង្កាត់ស្រះចក ខណ្ឌដូនពេញលើកឡើង នៅពេលដែលកម្លាំងប្រជាការពារខណ្ឌដូនពេញចុះបង្ក្រាបការប្រើប្រាស់ និងជួញដូរគ្រឿងញៀន ក៏ដូចជាបង្ក្រាបល្បែងស៊ីសង «ហ្គេមបាញ់ត្រី» ក្នុងមូលដ្ឋានមិនដែលឃើញគណៈបញ្ជាការឯកភាពសង្កាត់ស្រះចកចូលរួមឡើយ ។
ជាក់ស្តែង កាលពីថ្ងៃទី១៩ មករា កម្លាំងប្រជាការពារខណ្ឌដូនពេញ ដឹកនាំដោយលោកគឹម វុត្ថា និងមានការឯកភាពពីលោកសៀង សុខ ព្រះរាជអាជ្ញារងសាលាដំបូងរាជធានីភ្នំពេញ និងលោកសុខ ពេញវុធ អភិបាលខណ្ឌដូនពេញ បានចុះពិនិត្យទីតាំងល្បែងស៊ីសងប្រភេទហ្គេមបាញ់ត្រីក្នុងមូលដ្ឋាន សង្កាត់ស្រះចក ដោយអវត្តមានអាជ្ញាធរមូលដ្ឋាន ។
មន្ត្រីសាលាខណ្ឌដូនពេញមួយរូបបាននិយាយថា នេះមិនមែនជាលើកទីមួយទេ ដែលកម្លាំងប្រជាការពារខណ្ឌដូនពេញ និងកម្លាំងកងរាជអាវុធហត្ថខណ្ឌដូនពេញចុះបង្ក្រាបទីតាំងហ្គេមបាញ់ត្រី និងបង្ក្រាបការជួញដូរនិងប្រើប្រាស់គ្រឿងញៀនក្នុងសង្កាត់ស្រះចក
នៅថ្ងៃទី១៩ មករា កម្លាំងប្រជាការពារខណ្ឌដូនពេញ បានចុះពិនិត្យទីតាំងហ្គេមបាញ់ត្រីចំនួន៣កន្លែងឃើញថា ទីតាំងខាងលើបានចាក់សោបិទទ្វារទាំងអស់ ដោយពុំឃើញមានម្ចាស់ ឬអ្នកគ្រប់គ្រងឡើយ បន្ទាប់មកគណៈបញ្ជារការឯកភាពខណ្ឌ បានសម្រេចកាត់សោទ្វារបន្ទប់ហ្គេមទាំង៣ទីតាំង ដែលស្ថិតនៅតាមបណ្តោយផ្លូវរថភ្លើង ចំណុចភូមិ២ ភូមិ៣ បន្ទប់ផ្ទះជួល និង ផ្លូវជាតិលេខ៥ មុខភោជីយដ្ឋានចតុមុខ ភូមិ១៦ សង្កាត់ស្រះចក ខណ្ឌដូនពេញ ។
ជាលទ្ធផល ប្រមូលបានទូហ្គេមបាញ់ត្រីចំនួន៣គ្រឿង, កៅអីចំនួន១៤ និងបានយកមករក្សាទុកនៅសាលាខណ្ឌដូនពេញ ដើម្បីធ្វើកាគ្រប់គ្រងជាបណ្តោះអាសន្ន ។ ដោយឡែកការបង្ក្រាបការជួញដូរ និងប្រើប្រាស់គ្រឿងក្នុងសង្កាត់ស្រះចកនាពេលកន្លងមកសាលាខណ្ឌដូនពេញ សហការជាមួយកម្លាំងកងរាជអាវុធហត្ថខណ្ឌដូនពេញ ដកហូតថ្នាំញៀនរាប់រយកញ្ចប់ និងឃាត់ខ្លួនជនសង្ស័យជាងមួយរយនាក់ បញ្ជូនទៅតុលាការរាជធានីភ្នំពេញផងដែរ ។
តើហេតុអ្វីបានជាការបង្ក្រាបការជួញដូរ និងប្រើប្រាស់គ្រឿងញៀន និងល្បែងស៊ីសងក្នុងសង្កាត់ស្រះចក មិនអស់ពីមូលដ្ឋាន?
ចែករំលែកព័តមាននេះ