ស្ទះហើយលឿនទៀត ! ៣គ្រឿងបុកបន្តកន្ទុយគ្នា
រាជធានីភ្នំពេញ ៖ រថយន្តស្ទូចម៉ាកហ៊ីយ៉ាន់ដាយ១គ្រឿងខណៈផ្លូវកំពុងស្ទះផង ហើយបើកលឿនទៀត ស្រាប់តែជ្រុលចង្កូទៅបុករថយន្តដឹកទំនិញ១គ្រឿង បណ្ដាលឲ្យ …
រាជធានីភ្នំពេញ ៖ រថយន្តស្ទូចម៉ាកហ៊ីយ៉ាន់ដាយ១គ្រឿងខណៈផ្លូវកំពុងស្ទះផង ហើយបើកលឿនទៀត ស្រាប់តែជ្រុលចង្កូទៅបុករថយន្តដឹកទំនិញ១គ្រឿង បណ្ដាលឲ្យរថយន្តដឹកទំនិញនោះជ្រុលទៅបុករថយន្តហាយលែនឌ័រ១គ្រឿង ។ ហេតុការណ៍នេះកើតឡើងកាលពីវេលាម៉ោង៦ និង៤០នាទីព្រលប់ ថ្ងៃទី១៩ ខែមករា ឆ្នាំ២០១៧ នៅចំណុចជិតច្រកចូលវត្តសន្សំកុសល តាមបណ្ដោយផ្លូវលេខ២៧១ សង្កាត់បឹងទំពុន ខណ្ឌមានជ័យ ។
ប្រភពព័ត៌មានបានឲ្យដឹងថា មុនពេលកើតហេតុគេបានឃើញបុរស២នាក់បានបើករថយន្តស្ទូច ម៉ាកហ៊ីយ៉ាន់ដាយ ពណ៌បៃតង ពាក់ស្លាកលេខ ក ០៧៣៣ ភព៣ ធ្វើដំណើរតាមបណ្ដោយផ្លូវលេខ២៧១ ទិសដៅពីជើងទៅត្បូងក្នុងល្បឿនលឿន ខណៈមកដល់ចំណុចកើតហេតុ ដោយសារតែផ្លូវស្ទះ ហើយរថយន្តជាន់ហ្វ្រាំងមិនស៊ីក៏ជ្រុលទៅបុករថយន្តដឹកទំនិញម៉ាក FRONTIER ពណ៌ស ពាក់ស្លាកលេខ ភ្នំពេញ 2AM-6027 ដែលធ្វើដំណើរស្របទិសគ្នាចំពីក្រោយពេញទំហឹង បណ្តាលឲ្យរថយន្តដឹកទំនិញបែកស្តុបក្រោយចំហៀងខាងឆ្វេង ហើយរថយន្តដឹកទំនិញក៏ជ្រុលទៅបុករថយន្តម៉ាកហាយលែនឌ័រ ពណ៌ទឹកប្រាក់ មិនចាំស្លាកលេខ បណ្ដាលឲ្យឲ្យកំពិតកាងខាងក្រោយបន្តិចបន្តួច ចំណែករថយន្តស្ទូចវិញរងកាខូចខាតកំពិតស្រុញខ្ទេចផ្នែកខាងមុខ និងប៉ោងទ្វារខាងស្ដាំមួយចំហៀងផងដែរ តែសំណាងល្អមិនបណ្តាលមានគ្រោះថ្នាក់ដល់មនុស្សនោះទេ ។
ក្រោយពេលកើតហេតុ ខាងរថយន្តហាយលែនឌ័រមិនចង់មានរឿងវែងឆ្ងាយ បានបើករថយន្តចេញទៅបាត់ ទុកឲ្យរថយន្តស្ទូចបង្ក និងរថយន្តដឹកទំនិញ នៅធ្វើការចរចាគ្នា ដោយខាងរថយន្តស្ទូចបានចេញថ្លៃការជួសជុលឲ្យទៅខាងរថយន្តរថយន្តដឹកទំនិញ ដើម្បីបញ្ចប់រឿង ៕
ចែករំលែកព័តមាននេះ