ខេត្តកំពង់ឆ្នាំង ៖ អតីតយុទ្ធជនពិការជើងដោយសារជាន់មីនម្នាក់ រួមទាំងស្ត្រីជាភរិយាពិការដូចគ្នាដែរនោះ បានលើដៃសំពះអំពាវនាវដល់ប្រមុខរាជរដ្ឋាភិបាល សូមជួយដល់គ្រួសារគាត់ផង ព្រោះតែក្នុងពេលនេះមានការអភិវឌ្ឍន៍ច្រាំងទន្លេ ហើយត្រូវបានអាជ្ញាធរតម្រូវឲ្យប្រជាពលរដ្ឋ រស់តាមដងទន្លេចាកចេញទៅតាំងទីលំនៅថ្មីលើដីក្នុងគម្រោងបង់រំលោះ មានតម្លៃចាប់ពីជាង២ពាន់ទៅជាង៣ពាន់ដុល្លារ តែគ្រួសារគាត់គ្មានលទ្ធភាពទេ។ លោក ជឿន លឿន អាយុ៤២ឆ្នាំ មានទីលំនៅភូមិចុងកោះ សង្កាត់ផ្សារឆ្នាំង ក្រុងកំពង់ឆ្នាំង ជាអតីតជនពិការបានរៀបរាប់ឲ្យដឹងថា ប្រពន្ធគាត់ឈ្មោះ ឡាយ ថា អាយុ៥៩ឆ្នាំ គាត់មានកូនប្រុសម្នាក់ បែកគ្រួសារមានប្រពន្ធកូនហើយ តែសព្វថ្ងៃកូនគាត់បានទុកកូន៣នាក់ឲ្យគាត់ជួយមើលថែ។
ប្រភពដដែលបានបន្តថា រូបគាត់ជាយោធាស្រុកកំពង់លែង ខេត្តកំពង់ឆ្នាំង គាត់បានពិការដោយជាន់មីន នៅឆ្នាំ១៩៨៩ ក្នុងសមរភូមិវាលរោទិ៍ ស្ថិតក្នុងព្រំប្រទល់បីខេត្ត គឺកំពង់ឆ្នាំង កំពង់ចាម និងកំពង់ធំ។ ផ្ទះដែលគាត់រស់នៅនេះគឺតាំងពីឆ្នាំ១៩៨៧ មកម្លេះ ដោយរស់នៅជាប់មាត់ទន្លេ ប៉ុន្តែពេលនេះត្រូវបានអាជ្ញាធរខេត្តអភិវឌ្ឍន៍ធ្វើច្រាំងទន្លេ ដោយឲ្យប្រជាពលរដ្ឋចាកចេញទៅរស់នៅលើដីបង់រំលោះ ដែលរៀបចំដោយអាជ្ញាធរខេត្ត បែបនេះហើយទើបគាត់ជួបបញ្ហាគឺគ្មានលទ្ធភាពទិញដីបង់រំលោះដែលមានតម្លៃពីជាង២ពាន់ទៅជាង៣ពាន់ដុល្លារឡើយ។ ហេតុនេះហើយ រូបគាត់រួមនឹងភរិយា ដែលជាជនពិការដែរនោះ សូមអំពាវនាវដល់សប្បុរសជន មន្ត្រីជំនាញ និងប្រមុខរាជរដ្ឋាភិបាល មេត្តាជួយរកដីឲ្យគ្រួសារគាត់រស់នៅផង ព្រោះសព្វថ្ងៃនេះគាត់ក្រីក្រខ្លាំងណាស់ គ្មានរកអ្វីបានទេ ក្រៅពីប្រាក់ខែជនពិការជាង៣០ម៉ឺនរៀលប៉ុណ្ណោះ ។
បើតាមអាជ្ញាធរមូលដ្ឋានបានឲ្យដឹងថា តាមគម្រោងរបស់អាជ្ញាធរខេត្តនឹងមានការបន្ធូបន្ថយច្រើនចំពោះជនពិការ ស្ត្រីចាស់ជរា ជាដើម ក្នុងការទៅរស់នៅលើដីថ្មីបង់រំលោះនោះ ប៉ុន្តែសម្រាប់អតីតយុទ្ធជនពិការឈ្មោះ ជឿន លឿន នេះពិតជាក្រីក្រខ្លាំងណាស់ សូម្បីបង់រំលោះត្រឹមតែ១ខែ២០ម៉ឺនរៀលក៏គ្មានលទ្ធភាពទិញដែរ។ សូមរំឮកថា កន្លងទៅធ្លាប់ព័ត៌មាន បានផ្សាយពីអតីតយុទ្ធជនពិការ គ្មានដី និងលំនៅដ្ឋាន រស់នៅចំនួន២គ្រួសារ នៅខេត្តកំពង់ឆ្នាំងដូចគ្នានេះដែរ គឺទី១ឈ្មោះ ក្រឹម សា និងទី២ ឈ្មោះ ទី ប្រុស ហើយត្រូវបានសម្តេចតេជោ ហ៊ុន សែន ផ្តល់ក្តីមេត្តាប្រគល់ឲ្យដី និងផ្ទះនៅ តាកែន កោះស្លា បានទៅរស់នៅរហូតដល់សព្វថ្ងៃ សង្ឃឹមថាគ្រួសារខាងលើនេះនឹងបានក្តីសន្តោសមេត្តាពីសម្តេចបន្តទៀតជាពុំខាន៕
ចែករំលែកព័តមាននេះ