តាមអីុនធើរណេតផ្សាយនាថ្ងៃទី១៨ មករា ស្ថាបនិក WIKILEAKS លោក JULIAN ASSANGE អះអាងថា លោកត្រៀមខ្លួនទៅកាន់សហរដ្ឋអាេមរិកជាកន្លែងលោកអាចរងការចោទប្រកាន់ធ្ងន់ធ្ងរក្នុងលក្ខខណ្ឌ
តាមអីុនធើរណេតផ្សាយនាថ្ងៃទី១៨ មករា ស្ថាបនិក WIKILEAKS លោក JULIAN ASSANGE អះអាងថា លោកត្រៀមខ្លួនទៅកាន់សហរដ្ឋអាេមរិកជាកន្លែងលោកអាចរងការចោទប្រកាន់ធ្ងន់ធ្ងរក្នុងលក្ខខណ្ឌដែលសិទ្ធិទាំងឡាយរបស់លោកត្រូវបានធានា ។
បន្ទាប់ពីការសម្រេចរបស់លោកបារ៉ាក់ អូបាម៉ា លើកលែងទោសឱ្យនាង CHELSEA MANNING ដែលទទួលការកាត់ទោសកាលពីឆ្នាំ២០១៣ ដាក់គុក៣៥ឆ្នាំពីបទបញ្ជូនឯកសារសម្ងាត់ជាង៧០០.០០០ ឱ្យ WIKILEAKS វ៉េបសាយនេះសរសេរបង្ហោះតាម TWITTER ថា លោក ASSANGE ត្រៀមខ្លួនទៅកាន់សហរដ្ឋអាមេរិកក្នុងលក្ខខណ្ឌដែលបណ្តាសិទ្ធិរបស់លោកត្រូវបានធានា ។
កាលពីសប្តាហ៍មុន WIKILEAKS ធ្លាប់និយាយថា លោក JULIAN ASSANGE នឹងយល់ព្រមឱ្យធ្វើបត្យាប័នទៅកាន់សហរដ្ឋអាមេរិក ប្រសិនបើប្រធានាធិបតីអាមេរិកធ្វើការលើកលែងទោសដល់នាង CHELSEA MANNING ។ ទោះយ៉ាងណា បណ្តាអ្នកទទួលខុសត្រូវនៃសេតវិមានអះអាងថា ពុំមានទំនាក់ទំនងណាមួយរវាងសារនេះរបស់ WIKILEAKS និងការសម្រេចចិត្តរបស់លោកបារ៉ាក់ អូបាម៉ា ឡើយ ។
មេធាវីរបស់លោក ASSANGE នៅសហរដ្ឋអាមេរិក លោក BARRY POLLACK រំលឹកថា កូនក្តីរបស់លោកនៅពុំទាន់មានការចោទប្រកាន់ជាផ្លូវការនៅឡើយ នៅសហរដ្ឋអាមេរិក និងថា ក្រសួងយុត្តិធម៌អាមេរិកក៏ពុំមានស្នើសុំធ្វើបត្យាប័នរូបលោកដែរ ។
លោក JULIAN ASSANGE ភៀសខ្លួននៅក្នុងស្ថានទូតអេក្វាទ័រប្រចាំក្រុងឡុងដ៍ចាប់តាំងពីខែមិថុនា ឆ្នាំ២០១២ មក ដើម្បីចៀសវាងពីការចាប់បញ្ជូនខ្លួនលោកទៅកាន់ស៊ុយអ៊ែត ដែលនៅទីនោះ លោកទទួលការចោទប្រកាន់ពីបទចាប់រំលោភដែលលោកបានបដិសេធ ៕
ចែករំលែកព័តមាននេះ