ការវាយប្រហារអត្តឃាតមួយដែលសំដៅយុទ្ធជននៃបណ្តាក្រុមប្រដាប់អាវុធដែលចុះហត្ថលេខាលើកិច្ចព្រមព្រៀងសន្តិភាពនៅប្រទេសម៉ាលី ដែលបណ្តាលឱ្យមនុស្សស្លាប់ជិត៦០នាក់កាលពីថ្ងៃទី១៨ មករា នៅទីក្រុង GAO ជាទីក្រុងសំខាន់នាភាគខាងជើងប្រទេសនេះ ត្រូវបានពួកអាល់កៃដាតំបន់ MAGHREB អ៊ិស្លាម AQMI ថាជាស្នាដៃពួកគេ ។
ពួកយុទ្ធជនរងការវាយប្រហារនេះស្ថិតក្នុងក្រុមសម្របសម្រួលបណ្តាចលនានៅ AZAWAD (CMA) ជាអតីតក្រុមឧទ្ទាមគ្របដណ្តប់ ដោយពួកកុលសម្ព័ន្ធ TOUAREG ឬបណ្តាក្រុមប្រដាប់អាវុធស្និទ្ធរដ្ឋាភិបាល ដែលរៀបចំការល្បាតចម្រុះគ្រោងដោយកិច្ចព្រមព្រៀងសន្តិភាព ដែលចុះហត្ថលេខាកាលពីខែឧសភា-មិថុនា ឆ្នាំ២០១៥ រវាងរដ្ឋាភិបាលម៉ាលី និងបណ្តាក្រុមប្រដាប់អាវុធទាំងនេះ ។
ការល្បាតរួមដែលនឹងចូលរួមផងដែរ ដោយកងយោធាម៉ាលីក្នុងគោលដៅរំលាយកម្លាំងចូលគ្នាក្នុងកងទ័ពម៉ាលីតែមួយ ។
ប្រធានាធិបតីម៉ាលី លោក IBRAHIM BOUBACAR KEITA ប្រកាសការកាន់មរណទុក្ខជាតិរយៈពេល៣ថ្ងៃក្រោយការវាយប្រហារនេះ ជាការវាយប្រហារយ៉ាងបង្ហូរឈាមបំផុតនៃប្រវត្តិសាស្ត្រម៉ាលី ។ ក្នុងសង្កថាមួយតាមទូរទស្សន៍ប្រធានាធិបតីរូបនេះប្រកាសពីមនុស្សស្លាប់យ៉ាងតិច៦០នាក់ និងរបួស១១៥នាក់ ។
រដ្ឋាភិបាលម៉ាលីរៀបរាប់ពីជនអត្តឃាត៥នាក់ស្ថិតក្នុងចំណោមអ្នកស្លាប់ ក៏ប៉ុន្តែក្នុងសេចក្តីប្រកាសរបស់ខ្លួន ក្រុម AQMI និយាយពីជនអត្តឃាតម្នាក់ប៉ុណ្ណោះដែលស្លាប់ ហើយជននោះមានឈ្មោះថា ABDELHADI AL FOULANI ។
ក្រុមដដែលនេះធ្លាប់ប្រកាសទទួលខុសត្រូវរួចហើយ លើការវាយប្រហារអត្តឃាតបំផ្ទុះរថយន្តប្រឆាំងព្រលានយន្តហោះទីក្រុង GAO កាលពីថ្ងៃទី២៩ វិច្ឆិកា ឆ្នាំ២០១៦ ។ ការវាយប្រហារនេះយោងតាមបេសកកម្ម អ.ស.ប នៅម៉ាលី MINUSMA ថា បណ្តាលឱ្យមនុស្សស្លាប់ច្រើនសិបនាក់ ៕
ចែករំលែកព័តមាននេះ