រាជធានីភ្នំពេញ ៖ នៅរសៀលថ្ងៃសៅរ៍ ទី២១ មករា ដែលជាថ្ងៃកៀកនឹងចូលឆ្នាំចិននោះ ប្រដាល់អន្តរជាតិរបស់ខារ៉ាបាវ នឹងចាប់ផ្ដើមប្រកួតសន្សំពិន្ទុទៀតហើយ នៅក្នុងព្រឹត្តិការណ៍ដណ្ដើមខ្សែក្រវាត់រដូវកាលទី២
រាជធានីភ្នំពេញ ៖ នៅរសៀលថ្ងៃសៅរ៍ ទី២១ មករា ដែលជាថ្ងៃកៀកនឹងចូលឆ្នាំចិននោះ ប្រដាល់អន្តរជាតិរបស់ខារ៉ាបាវ នឹងចាប់ផ្ដើមប្រកួតសន្សំពិន្ទុទៀតហើយ នៅក្នុងព្រឹត្តិការណ៍ដណ្ដើមខ្សែក្រវាត់រដូវកាលទី២ រវាងកីឡាករកម្ពុជា និងបរទេស ដែលកាន់តែដល់វគ្គស្វិតស្វាញ បន្ទាប់ពីសម្រាកអស់១សប្ដាហ៍ ។ មហាជនភាគច្រើនផ្ដោតការចាប់អារម្មណ៍ចំពោះវេទិកាប៉ះគ្នានេះ ដោយសមាសភាពខាងកីឡាករកម្ពុជា ដែលឡើងប្រកួតដណ្ដើមយក៣ពិន្ទុរួមមាន កីឡាករ ពុទ្ធ ឆាយរិទ្ធី និងកីឡាករ រឿង សោភ័ណ្ឌ ប៉ះជាមួយកីឡាករថៃ និងឡាវ ជាថ្មីម្ដងទៀតលើរេញតែមួយ ។
ព្រឹត្តិការណ៍ប្រដាល់អន្តរជាតិដណ្ដើមខ្សែក្រវាត់របស់ភេសជ្ជៈខារ៉ាបាវវគ្គ២ នេះ ត្រូវគេមើលឃើញថា មានការគាំទ្រដាច់ឆ្ងាយតែម្ដង បើធៀបនឹងការប្រកួតអន្តរជាតិកាលពីវគ្គ១ ដោយសារតែសមាសភាពកីឡាករទាំងខាងកម្ពុជា និងខាងបរទេស សុទ្ធតែមានកម្រិតល្អ ហើយមើលទៅម្នាក់ៗបញ្ចេញថ្វីដៃគួរឱ្យទាក់ទាញរៀងខ្លួន ។ កីឡាករកម្ពុជា២រូបរួមមាន ជើងខ្លាំង ពុទ្ធ ឆាយរិទ្ធី និង រឿង សោភ័ណ្ឌ នឹងក្លាយជាគូប្រកួតស៊ីសាច់ហុតឈាមជាមួយកីឡាករឡាវ និងថៃ នៅរសៀលថ្ងៃសៅរ៍ខាងស្អែកនេះ ។ អ្នករៀបចំការប្រកួតបានអះអាងថា កីឡាករកម្ពុជាទាំង២ ត្រូវដល់ជុំប្រកួតគ្នាជាមួយកីឡាករថៃ និងឡាវរៀងខ្លួន ដោយការប៉ះគ្នារវាងកីឡាករកម្ពុជាទាំងពីរ ក៏ធ្វើឱ្យមហាជនចាប់អារម្មណ៍ណាស់ដែរ ដោយសារតែពួកគេសុទ្ធតែជាប់ឈ្មោះថា ក្លាហានហ៊ានតវ៉ានៅពេលគណៈកម្មការឱ្យចាញ់នាពេលកន្លងមក ។ គេមិននឹកស្មានថា ពុទ្ធ ឆាយរិទ្ធី បន្តការប្រកួតនោះផង ដោយសារតែការឱ្យចាញ់លើកមុន គឺគេខឹង ហើយប្រកាសដកខ្លួន ។ លោកថា កីឡាករកម្ពុជាត្រូវបានអះអាងថា សម្ងំហ្វឹកហាត់មិនខុសគ្នានោះទេ ដោយសារតែកីឡាករម្នាក់ៗមិនចង់បាត់ឱកាសដណ្ដើមយកចំណាត់ថ្នាក់លេខ១ ក្នុងពូល ឆ្ពោះទៅរកការប្រកួតដណ្ដើមខ្សែក្រវាត់ និងប្រាក់លាន ។ ទោះបីយ៉ាងណា គេមិនទាន់ដឹងថា កីឡាករណាមួយនឹងមានលទ្ធភាពយកបាន៣ពិន្ទុនៅសប្ដាហ៍ទី២នេះទេ ដោយសារតែភាគីទាំងសងខាងសុទ្ធតែបានត្រៀមទុកពីចម្ងាយ ហើយកីឡាករឡាវ និងថៃ ក៏ត្រូវការឈ្នះយក៣ពិន្ទុថ្ងៃនេះដូចគ្នា ។
លោក ញាណ សុធី អ្នករៀបចំការប្រកួតប្រចាំនៅទូរទស្សន៍អាស៊ីអាគ្នេយ៍បានថ្លែងប្រាប់ថា កីឡាករជើងខ្លាំងកម្ពុជា២រូបខាងលើ នឹងបើកឆាកប្រកួតក្នុងព្រឹត្តិការណ៍ដណ្ដើមខ្សែក្រវាត់ជើងឯកខារ៉ាបាវនៅវេលាល្ងាចខានស្អែក ។ កីឡាករ ពុទ្ធ ឆាយរិទ្ធី មកពីក្លិបពុទ្ធសិរីវង្សកីឡា ប៉ះប្រកួតជាមួយកីឡាករឡាវឈ្មោះ ថា អ៊ួឡាន ក្នុងនាមជាគូបើកឆាកអន្តរជាតិដណ្ដើមពិន្ទុនៅក្នុងព្រឹត្តិការណ៍ ដោយជំនួបរវាងពួកគេបានកើតឡើងដោយសារតែការចាប់ឆ្នោត និងការរៀបចំរូបមន្តប្រកួតដែលចាត់ចែងឡើងដោយក្រុមគណៈកម្មការបច្ចេកទេស ។ លោកថា កីឡាករ ពុទ្ធ ឆាយរិទ្ធី ចាត់ទុកថា ជាជើងខ្លាំងម្នាក់នៅលើសង្វៀនប្រដាល់អន្តរជាតិនាពេលកន្លងមក ទើបការប៉ះប្រកួតក្នុងសប្ដាហ៍នេះ សម្រាប់សង្វៀនខារ៉ាបាវ គឺកីឡាកររូបនេះនឹងធ្វើឱ្យអ្នកគាំទ្រអស់ចិត្ត ។លោកជឿជាក់ទៅលើសមត្ថភាពពូកែគេច និងពូកែវាយសន្ធាប់របស់កីឡាករកម្ពុជា ពុទ្ធ ឆាយរិទ្ធី តែមិនហ៊ានប្រាកដថា គេអាចយកបាន៣ពិន្ទុសម្រាប់ល្ងាចខានស្អែកទេ ។
លោកបានត្រឹមតែរំពឹងថា ការប្រកួតបើកឆាករបស់គូអន្តរជាតិនេះ នឹងទាក់ទាញចំណាប់អារម្មណ៍ខ្លាំងក្លាតែប៉ុណ្ណោះ ដោយសារកីឡាករឡាវមិនមែនធម្មតា ។ កីឡាករឡាវរូបនេះធ្លាប់ប្រកួត៦៥លើក ឈ្នះ៥៤លើក និងចាញ់១១លើក ក្នុងពេលដែលកីឡាករកម្ពុជា ឆ្លងកាត់ការប្រកួត៨៤លើក ឈ្នះ៦៧លើក ចាញ់១៦លើក និងស្មើ១លើក ។
សម្រាប់កីឡាករ រឿង សោភ័ណ្ឌ លោកញាណ សុធី បញ្ជាក់ថា គេកាន់តែនឹងបញ្ចេញថ្វីដៃមិនធម្មតាទៀត ហើយក្នុងជំនួបជាមួយកីឡាករថៃឈ្មោះ សាំង យ៊ុត ក្នុងការដណ្ដើមឱ្យបាន៣ពិន្ទុនៅក្នុងព្រឹត្តិការណ៍អន្តរជាតិខារ៉ាបាវនេះ ។ ការប្រកួត២លើកកន្លងមក កីឡាករ រឿង សោភ័ណ្ឌ ឈ្នះ១ ចាញ់១ ទើបត្រូវការឈ្នះលើកនេះ ដាច់ខាតដើម្បីដណ្ដើមឱកាសទៅឡើងយកតំណែង ។ លោកថា កីឡាករថៃ សាំង យ៊ុត ធ្លាប់ប្រកួត៧៥លើក ឈ្នះ៦១លើក ចាញ់១៣លើក និងស្មើ១លើក ក្នុងពេលកីឡាករកម្ពុជាធ្លាប់ប្រកួតបាន១៤៤លើក ឈ្នះ១២៧លើក ចាញ់១៥លើក និងស្មើ២លើក ៕
ចែករំលែកព័តមាននេះ