ក្រសួងការពារប្រទេសរុស្ស៊ី ប្រកាសនាថ្ងៃទី១៨ មករា ថា កងយន្តហោះរុស្ស៊ី និងតួកគី បានធ្វើការវាយប្រហារតាមអាកាសរួមគ្នាជាលើកដំបូងនៅស៊ីរីប្រឆាំងទីតាំងទាំងឡាយរបស់ពួកជីហាដ ក្រុមរដ្ឋអ៊ិស្លាម
ក្រសួងការពារប្រទេសរុស្ស៊ី ប្រកាសនាថ្ងៃទី១៨ មករា ថា កងយន្តហោះរុស្ស៊ី និងតួកគី បានធ្វើការវាយប្រហារតាមអាកាសរួមគ្នាជាលើកដំបូងនៅស៊ីរីប្រឆាំងទីតាំងទាំងឡាយរបស់ពួកជីហាដ ក្រុមរដ្ឋអ៊ិស្លាម នៅទីក្រុង AL BAB ខេត្តអាឡែប ។
ក្នុងសន្និសីតសារព័ត៌មានមួយ ឧត្តមសេនីយ៍ស័រហ្គេយរូដស្គយ នៃអគ្គសេនាធិការដ្ឋានកងទ័ពរុស្ស៊ីគូសបញ្ជាក់ថា ថ្ងៃទី១៨ មករា កងទ័ពរុស្ស៊ី និងកងទ័ពតួកគី បានធ្វើប្រតិបត្តិការតាមអាកាសរួមគ្នាលើកដំបូង ដើម្បីវាយប្រហារក្រុមរដ្ឋអ៊ិស្លាម នៅតំបន់ក្រុង AL BAB ភាគខាងជើងស៊ីរី ជិតព្រំដែនតួកគី ។
ប្រតិបត្តិការនេះ ដែលក្រុងមូស្គូនិយាយថា មានប្រសិទ្ធភាពធ្វើឡើងដោយមានការព្រមព្រៀងរបស់ក្រុងដាម៉ាស់ ។ មានយន្តហោះរុស្ស៊ី៩គ្រឿង និងយន្តហោះតួកគី៨គ្រឿងបានរួមគ្នាវាយប្រហារលើបណ្តាទីតាំងក្រុមរដ្ឋអ៊ិស្លាមចំនួន៣៦កន្លែង ដែលទីតាំងវាយប្រហារទាំងនេះកំណត់រួមគ្នាដោយអគ្គសេនាធិការដ្ឋាននៃប្រទេសទាំង២ ។
ក្រុងមូស្គូ និងក្រុងអង់ការ៉ា ធ្លាប់ប្រកាសពីការចុះហត្ថលេខាកាលពីថ្ងៃទី១២ មករា លើកិច្ចព្រមព្រៀងមួយដែលផ្តោតលើបណ្តាយន្តការសម្រាប់សម្របសម្រួលការវាយប្រហារតាមអាកាសរបស់ពួកគេនៅស៊ីរីប្រឆាំងបណ្តាគោលដៅរបស់ពួកភេរវករ ៕
ចែករំលែកព័តមាននេះ